1 Oute Teman minphuinpaw Elifaz nynh khung zah:

2 "Ccungccaw hynh Pachia hanlan

ccungkia kho vema?

A haw huaccepaw heize

Pachia hanlan ccungkia kho vema?✝

3 Na ding lanze, na dingnaw tuh

Athunghuapaw hanlan lungtuanaw

hankhakheit thua vema?

Tuhkhyhze na ziazae tuh

ccaenaw a um khyhnaw liate,

Pachia hanlan thanenaw a um vema?

4 Ae thuiheinaw hynh amaw kha

sawtuate a raw na ri keiccu

athua zawtou?

Byapiazung lang ae kaethe zawtou?

5 Na hoyleinaw tuh myarya ale khaw?

Na seinaw tuh thangthya khyh.

6 Na uno nynh ae koiipaw

uccaw hanlan a boeining kha

akonglang um leite na kyngpah zah,

a sasete na nung.

7 A thawbangpaw kha

nia lanpaw tui na pya khyh,

a vuelawpaw kha looh na kang.

8 Huhan a hoipaw nynh

ram kha hoi zah,

mih maedo-um hae paw nynh

tuin ram kya khua a sah hae.

9 Nomae hae kha mih kuih ccakaete

na cciasah hae zah

ngawraw hae kuih kha na khya vae.

10 Tukeiccuze na pepan khe

kaang phang um zah,

rinaw nynh tualeipite ae thuanua,

11 ngaw na muih kho khyh nawlan

mohnaw nynh ae thuanua;

tui alepaw nynh nang kha ae vu.

12 "Pachia tuh vaaw ahang huanaw kya

um khyh tou?

Ahang huanaw umpaw

awsi hae heize dotua,

pawcih baban mou ahang hae!

13 Thuasalama nang nynh tuh,

‘Pachia nynh pawmou a ny?

Mohnaw nynh marae ziping zah

bya a pia kho cih zawtou?

14 Ngaw a muih khyh nawlan,

marae zipaw maeking nynh

Pachia kha phang a lungde,

vaawlui adawkuhpaw vawlan khe

a cceih bungthung,’ na ci.

15 Ccungccaw hoylei hae paw nynh

a zui hae paw laanpi arynpaw kha

nang nynh na zui ung cih tou?

16 Minmin tuh mih ccyh

azaw mawkhe suede thua hae zah,

mih thonaw aleihpaw kha

tui alepaw nynh a loupya hae.

17 Minmin nynh Pachia kha,

‘Kae makhaete oun cciataw,

Athunghuapaw nynh kaening hynh

pawmou oun cyih kho cih?’

a cipya hae.

18 Tuhzemah Pachia nynh mih inn kha

ahoypaw uccaw te phe a biasah,

thuasalama ccungccaw hoylei hae paw

mih paccynkunaw kha tuh

ka nawccah khyh.

19 Miding hae nynh tuh-e tuh

muih hae zah mih lungtua;

seinaw hoi lei hae paw nynh

saryate nuinse hae zah,

20 ‘Thanccingte, aening oun rawse hae paw tuh

a roh vae hae, maee nynh

mih sisua kha a upya vae hae,’

a ci hae.

21 "Pachia te ccawkuh oh lah,

daenaw raetua;

tuhteze tuh hoynaw nynh

ae thuanua cih.

22 A mung kya-e ccangpyanaw kha

lawkuh lah,

a bya kha na thinlung kya

ccykeku tua.

23 Athunghuapaw kalan

na kithui zetuh, raethui na thua cih,

na inn kyate dingleinaw kha

na vua ze thuasah,

24 sui kha laenoi lang na ria zah

Ofir sui kha vawkhu e

lungpyng lang na ria ze thuasah,

25 te Athunghuapaw tuh na sui te

aphutepaw na ngunphua athua zetuh,

26 Athunghuapaw tungvaw

na lungrythua cih zah,

Pachia liate na lungtua cih.

27 Amaw kalan saw na sang cih zah,

ae thaepah cih,

bya na kinkupaw kha na pya cih.

28 Cyi lan na tuakupaw kha

ccingsahpya athua cih zah,

na ccianaw laanpi tuh a aw cih.

29 Mingccang hae kha zakawsangsah

athua hae ze, tuh-e tuh ryku lan

umpaw nynh thua cite na ho cih.

pawccecize a thinlung nepaw kha

a khum.

30 Pachia nynh a sei hae paw kha

heize a luesah cih hae;

na kuih athyaanaw liate

minmin tuh a lue cih hae," a ci.