1 "Ccungccaw hae nynh

laephi vawlan hin ryalaw

arupaw hoi khyh hae tou?

mih nin hae tuh vaeluapaw

ccungccaw nin hae te

lokuh khyh tou?

2 Myndae myarya a rypaw

see hawte thua zah,

a ryalaw mee a ngaehoipaw

vaeluapaw hawte nynh thua.

3 Tuhcite alakaw lan asaw patae

rya ka lah zah,

riathae lan umpaw

khuazi hae kha pya ka thua.

4 He ka huekuh te,

‘Hohtuhmou ka tho cih?’ ka ci.

Thuasalama khuazi tuh

myarya sae zah,

khua phe dae lan cia

ka paleihkuh bungthung.

5 Zanpaw te athupaw nynh

ka ngesaw kha boeining hawte

phang yn bong hae;

ka ving tuh tang zah phaephae paw.

6 Ka nin hae tuh boeikuatu kya-e

phaeccya laeze ranghua zah,

ngaehoinaw um leite

dyadya alia hae.

7 "Ka hiinnaw tuh khivae sasaw

hung athuapaw kha liathuitua;

ka mit nynh hoynaw kha

papin muihthui vae lan khyh.

8 Kae yn muihpaw mit nynh

bua yn muih vae lan khyh;

he nae do tuh,

ka um vae lan khyh.

9 Maeking tuh thyaa zah

azo hawte, Michi khua lang

a rungbungpaw tuh

yn kaethung vae khyh;

10 a inn lang kilae vae khyh zah,

a umnaw nynh mah

amaw kha nyh vae khyh.

11 Tukeiccuze ka munglae

ka sungkuh lan khyh;

lungriathaete ka ho cih;

lungvawsaw te ka ccohkuh cih.

12 Kae tuh rili khyhze

nakaa-hupi ka thua zah tetou

rintu nae nungpya?

13 ‘Ka ikhung nynh

ka thaw yn dansah cih,

ka iphae nynh

ka ccohkupaw hynh

yn daesah cih,’ cite

he ka ho te,

14 ka maan kya nae siisakuh zah,

vizin hae khate nae risah,

15 tukeiccuze dyngmiakunaw te

chinaw kha hynh-e pyn laeze

ka pokuh hua cih.

16 Ka hiinnaw hynh

ka lungthang vae;

zungzae ka hiin lan khyh.

Ka ccyh tuh khivae sasaw

hung athua keiccuze

ka makhaete yn umsah.

17 Ccungccaw hynh

paw thua zahte mou

myarya aphu na tesah zah

na peki?✝

18 Awkhua takyh na via zah,

atu te atu na syntawtua?

19 Ka kyate ccanglang

sosoh na hawi lan khyh tou?

Ka tuin ka due mawlaezung

ka makhaete nae umsah

lan khyh tou?

20 Ka la sei lanze,

ccungccaw a dotu,

nang kha pawmou kae cyi?

Pawccemou kae hynh

themuing lang nae dia?

Pawccemou kae hynh

na hanlan phupaw

aripaw lang ka tang?

21 Pawccemou ka cyiseinaw hynh

nae ngaethya khyh zah,

ka hoyleinaw hynh

dae nae lawpya khyh?

Pawccecize atu laephi kya

ka ih cih;

nae ccung zemah

ka um vae lan khyh," a ci.