1 Sathaw hae nynh hohtuh ccyh mou

ataw a than hae cipaw na nyh tou?

Sazuh nynh a taw thanpaw kha

akaw-aleih na nyh tou?

2 A taw poi ccyh sawpaw kha

na ria kho tou?

a taw than ccyh kha na nyh tou?

3 Mih taw than khylan

a ryakhaeku ccyh hae te

mih taw a toiku ccyh kha na nyh tou?

4 Mih taw hae tuh oun tang hae zah,

ramkaw kya oun lethung hae;

ccanglang cceih hae zah,

mih pi kalan ki vae khyh hae.

5 "Hum nynh mou ramkaw e lann kha

a rythyte ccianaw kaw a pya?

Hum nynh mou lann khiinawpaw

arui kha a supah?

6 Ramkaw kha a inn lang ka pya zah,

lonua apo leinaw loi ram kha

a umnaw hmin lang ka pya vae.

7 Siarisiarae a umnaw khuapi kha

pawlangria khyh zah,

ryalaw nawtu hae sianuanaw kha

thae khyh.

8 Mua hae tuh tuh-e lann

a paeekunaw hmin thua zah,

ahinpaw aku miakaw kha a ccungku.

9 "Ccungtepaw nynh na rya

ae lawpah ry cih tou?

Na sahiinkhia kya khuazi

a rya ry cih tou?

10 Liarui te khiite lei na thuenah

kho cih tou?

Tuhkhyhze na nulang zuikute

accya kya lei a thue cih tou?

11 Ccungtepaw tuh myarya a thawsae

keiccuze na doliakuh cih tou?

Na ryalaw kha a tungvaw

na ap kho cih tou?

12 Aning nynh yn ki cih zah,

na ccathae kha

na looh mianawpaw kalan

yn thuakhae cih cite na zyn tou?

13 "Kalauh pavaw tuh a sake ming

zya salamah

a sake kha thawte a bia.

14 Aning nynh a tui kha

laekhu kya cciataw zah,

laephi kyakhe so kaleih lan

la um hae sah a ci.

15 Ming hae ccu nynh a tui kha

a koisei cih,

loramsaw nynh a sydesei cih cipaw kha

phe a ning.

16 A taw hae kha amaw taw

athua lei hae paw hawte,

mih tungvaw thawccinaw hoi khyh;

a ryalaw kha alakaw lan

atangsei cih cipaw a thinphang khyh;

17 pawccecize Pachia nynh

kalauh pavaw kha

hawnaw a hoi lei lante rae zah,

nythyanaw kha pyabua khyh.

18 Myarya ahangnaw kya

a sake a daw vae ze,

marang te marang a ccikuhpaw kha

a nuinse hae.

19 "Marang thawzung kha

nang nynh na pya tou?

Marang nging kya a sy kha

na saesah tou?

20 Marang kha tungkhipaw hawte

na thohsakuh tou?

A naduh kya-e roi tuh ri lan a um.

21 A ccutin te pue zah,

a thawzung kyakhe a lungtuakhaekuh;

rhaw hae zunghe te

tukku khylan a cceih.

22 Rinaw kha nuinse zah siikuh khyh;

thaloi rhaw kha kitaw khyh.

23 Aning kha rawsete the bawng tuh

aroi ccae zah,

dalahdalah akpaw ccoi te

sivaw toikuhpaw ccoi tuh

awrarih lan a aw hae.

24 Puatho, thinriate laephi kha a laang;

mungkae roi a thae tuh

daebabi lan um kho khyh.

25 Mungkae roi he accae tuh, ‘Alei!’ a ci.

Asawnaw kyate rhawmyn kha a thae,

rhawbawi hae kya-e

kawpya siaruanaw roi kha a thae.

26 Mosi nynh ahangnaw kya zou zah,

a sake dawte alia lang a zoupaw tuh

nang na hawnaw liate tou athua?

27 Mosipi nynh palung lang

zouthung zah, ahangnaw kya

a bu a luakupaw tuh nang nynh

kaw na pya keiccu tou athua?

28 Aning tuh lungpi vawlan um zah

akhynnaw lungpi karynkarenaw kyakhe

a bu a luaku.

29 Tuin kyate ae lanpaw saw kha a doku;

a mit nynh asawnaw kyate

saw kha a muih.

30 A taw hae nynh chii kha a zu hae;✝

sawchihpaw a umnaw kyakhe

khah-e mosipi tuh a um," a ci.