1 Ka mit te byakinkunaw

kae rae vae,

tukeiccuze pawtemou

liaccady tuh ka do kho ung cih?

2 Luki lang e Pachia kyate

ka ccou lanpaw tuh

pawmou athua cih?

Ahangnaw umpaw

Athunghuapaw kyate

ka rho tuh pawmou athua cih?

3 Vawsawnawpi nynh

a ding lei hae paw kha

thuanua khyh hae tou?

ronaw nynh hoyleinaw

a rae hae paw kha

thuanua khyh hae tou?

4 Pachia nynh ka ccianaw

laanpi kha phe a muih khaw?

Ka ccu ka kawpaw balyn kha

phe a ria khaw?

5 "Hynnaw laanpi ka zui zah,

ka ccu nynh ling lan

a rangsaku lanze,

6 ahmepaw akhin te kae kha

khin ka thua sah lah,

Pachia nynh ka dingnaw kha

nyh vae sah!

7 Ka ccu nynh laante lang

a cciasei ze thuasah,

ka thinlung nynh ka mit rynaw kha

a zui ze thuasah,

ka kuih kya athupaw

a beku ze thuasah

8 ccacii ka tupaw athae kha

milae nynh ae sah lah,

kamaw hanlan yn popaw aku kha

poh khaee thua sah.

9 "Ka thinlung kha milae zu nynh

yn soihku ze thuasah,

ka innpaw a thuakaw kyakhe

rekute ka buhkhaw ze thuasah

10 ka zu nynh milae sung kha suhpah sah lah,

milae nynh ka zu vawlan

a ccu kawraw sah.

11 Tuhcihawpaw tuh

myarya nungsikuhpaw seinaw thua zah,

detah lanpaw seinaw nynh thua;

12 tuhcihawpaw seinaw tuh

phe ccung mamia lang

a upaw maee thua zah,

ka hoipaw balyn kha

khaleih thang lan a upaw maee nynh thua.

13 "Ka seenung nynh thuasah,

ka seepaw nynh thuasah

ka tungvaw byalungnaw hoi hae zah,

mih bya kha ka ngaepya khyh hae ze,

14 Pachia he yn thokuh te,

pawtemou ka cyih cih?

Akaw-aleih he yn khialia te,

pawtemou ka khung cih?

15 Vue lungkhu kya yn raetupaw nynh

minmin kha so rae khyh hae tou?

Ccangkheit kyalyapaw Pachia nynh

aening kha vue kya

oun rae kalang khyh tou?

16 "Ryachipaw nynh a rypaw

hankhakheit kha pya leite

ka um boi zawtou?

Nomae hae mit kha

ka rosah boi zawtou?

17 ngawraw hae kha aesah bua leite

ka makhae kyalya te

ka ae boi zawtou?

18 pawccecize ka di lya mawte

ngawraw hae kha paaw hawte

ka do-oih hae zah,

ka pui takaw mawte nomae hae kha

ka bawm hae,

19 boeining a hoi khyh keiccuze

a chihpaw lukhakheit kha

ka muih ze thuasah,

bongkupaw a hoi leipaw ryachipaw kha

ka muih ze thuasah,

20 ka tuuming te a khualung khyh zah,

a khuacci keiccuze hythua

yn pya khyh ze thuasah,

21 byapiazung kya bawmtu

ka hoipaw kha ka nyku keiccuze

ngawraw tungvaw ka kuih

ka hangnua ze thuasah,

22 ka kuihbaw tuh ka raw kyate

ccah sah lah, ka kuih tuh

atungkunaw kyate thoh khya sah.

23 Pawccecize kae tuh

Pachia kya-e vawsawnaw kha

ka rih zah, a lesaenaw kha

ka hawilia ngan khyh.

24 "Sui kha ka doliakuh zah,

sui ccipaw tuh ka khynnaw nynh

thua ka ci ze thuasah,

25 ka hoirumnaw tuh lung zah,

ka kuih nynh pataepi

a muethya keiccuze

ka lungtua ze thuasah,

26 khuanin he apaw vae ze

khuanin kha ka do zah,

phu-enawte a cceih cciamangpaw

sawpaw kha he ka do vae ze,

27 tuh-e hae nynh ka thinlung kha

aruh lante yn soih hae zah,

tuh-e hae tuh sawtuanaw pyate

ka mung nynh ka kuih kha

a myng ze thuasah,

28 e hae hynh byapiatu nynh

de a tah lanpaw hoyleinaw nynh thua,

pawccecize luki lang e Pachia kha

vuapaw nynh thua.

29 "Kae yn huapaw nynh

vawsaw a teing vae ze

ka lungtua zawtou?

Hoyleinaw a tung vae ze

ka lungtua zawtou?

30 A hiinnaw kha thyalawte

ka mung kha seinaw ka raesah khyh.

31 Ka innbyn hae nynh,

‘A saw kha kae byn ravo nyn!’

cite ho boi khyh hae,

32 khuaccong hae paw hanlan

ka thuakaw kha ka hungpah hae zah,

mikhia hae tuh laanpi kya

rya boi khyh hae;

33,34 Zapi patae raw kha ka rih zah,

phin kae lokuh hae paw nynh

saryakunaw kha ka thinphang keiccuze,

ka hoyleinaw kha ka by kya thuruhte,

ming hae nynh a cyi hae hawte

ka cyiseimenaw kha

ka phei boi zawtou?

Inn atolang pou leite daetedae lan

ka um boi zawtou?

35 Lukhakheit nynh ka bya hynh

yn thaepah vae sah!

(Ka kinkupaw bya miakaw

akyh cinawpaw hein kya

ka minthuh a um!

Athunghuapaw nynh yn leih vae sah!)

Yn rawsetupaw nynh

sei yn benawpaw ccaw kha

zei vae sah!

36 Thanccingte tuh-e ccaw tuh

ka raw kya ka khangkuh cih,

bawilukhung hawte

ka khungkuh cih;

37 Ka cyisahnaw balyn kha

amaw kya ka hopah cih;

siapharan ccapaw kha

naenuaku hawte amaw kha

ka naenuakuh cih.

38 Ka laephi nynh kae kha

rawsete sia zah,

tuh-e laephi kya leithuenaw

aringkuhpaw hae nynh mah

pynkheihlan a rawkhae hae ze thuasah,

39 amee pya leite laephi kyate

a poupaw kha ka la ae zah,

a hoitu hae kha vawsawnaw

ka la pya hae ze thuasah,

40 chanvuih ku hanpaw

hinpaw ku kha po sah lah,

barli ku hanpaw lonua kha

po vae sah," a ci.

Job bya tuh athang.