1 "Pou Job, atu ka hopaw hynh thae lah,

ka bya balyn hynh ngaetua.

2 Dotua, ka khalang ka aw zah,

ka khalang lungkhu umpaw

ka lae nynh bya a ho.

3 Ka thinlung a dingnaw kong kha

ka bya nynh a langsaku,

ka nypaw kha ka mung nynh

hmerarih lan a ho.

4 Pachia muisaw nynh kae kha

yn rae vae,

Athunghuapaw kya-e hy nynh

hiinnaw yn pya.

5 Bya nae khung kho ze yn khungtua;

ka malang hin thadyn lah,

na bya kha hoyte paccynku tua,

6 Pachia malang tuh kae mah

nang hawte nynh ka thua;

kae hynh mah anglae te

raepaw nynh ka thua.

7 Ka raw nae rinaw nynh

na thin ae phangsah nan sah;

kae nangsepaw bya hynh

na tungvaw kya ri lan khyh.

8 "Thanccingte, ka thaenaw khe

phe na ho vae zah,

na hopaw roi kha phe ka thae vae.

9 ‘Ka thyaa, ka cyiseipaw um khyh;

a thyaapaw ka thua zah,

ka tungvaw hoyleinaw um khyh.

10 Pachia nynh ka cyiseinaw kha

yn ccungpah zah,

kae kha a rhaw lang yn ria;

11 ka ccu kha sivawrui te yn khii zah,✝

ka ccianaw takyh yn rin,’ na ci.

12 "Thuasalama e kya nang tuh na sei.

Bya kae khungru cih:

Pachia tuh ccungccaw laeze

a lesaehua.

13 Pawccemou Pachia kha

na rawse zah,

‘Pachia nynh ka bya kha

yn khungru khyh,’ na ci?

14 Ccungccaw nynh a thaethya khyh zemah,

Pachia nynh atu phuinccang,

nyalang phuinccangte a ho.

15 Ccungccaw hae nynh mih ikhung vawlan

thuhbabu lan a i lya hae khe,✝

mih maan kya, khuazi vizin kyakhe,

16 Pachia nynh mih nakaring kha uasah zah,

raeringnaw pyate a risah hae.

17 Tuh-e tuh Pachia nynh

ccungccaw hae kha

mih cyisahnaw kyate maeleihsaku khylan,

lysakunaw kyate thungkhaw khylan,

18 mih muisaw kha Michi khua kyate

luesah khylan te

chinaw Vawpi zuanaw kyate

mih hiinnaw kha

haang khylan nynh thua.

19 Minmin kha mih ikhung vawlan khe

ccinaw te detah thua hae zah,

mih ru kha palei ccisah athua;

20 tuhteze nynh mih hiinnaw nynh

sanlou kha hua zah,

looh athuapaw kha ae ry khyh hae.

21 Mih ngesaw tuh myaryamaw thah zah,

muih boi leipaw mih ru hae tuh

oun langkuh vae hae.

22 Mih muisaw tuh Michi khua lang

naekuh vae zah,

mih hiinnaw tuh chinaw

a thuakhae hae paw kalan

a naekuh vae.

23 Thuasalama minmin laku e

lu kheit hanlan vaaw ccungccapaw lu kheit,

hopiatu lu kheit, thong kheit kyaze lu kheit,

ccungccaw dingnaw

a siakhaepaw um zah,

24 aning tungvaw thawccinaw

a hoipaw vaaw ccungccapaw nynh,

‘Michi khua lang a ccia khyh

nawlan, amaw kha luesah tua;

aning sawkhawnawpaw kha

phe ka muih vae;

25 a ngesaw tuh ngeno ngesaw lang

tang sah lah,

a ngawphue lya thawzung

a hoi lya hawte thuathui vae sah,’ a ci.

26 Te Pachia kalan sawsang zah

Pachia nynh a ccoupya,

Pachia malang khe lungtuate

langkuh zah, Pachia nynh

a dingnaw hanlan a sangru.

27 Tuh-e ccungccapaw nynh

ming hae kyakhe hlawsah zah,

‘Kae tuh ka sei, dingnaw kyate

ka cceihsei,

thuasalama tuh-e seinaw mee kha

ka teing khyh.

28 Michi khua lang ccianaw kyate

ka muisaw kha

yn shawkhaw vae zah,

ka hiinnaw nynh awnaw kha

a muih cih,’ a ci.

29 "E hae balyn hynh

Pachia nynh ccungccaw hae kya

atu te atu a cyi ccaccing,

30 ccungccaw hae nynh hiinnaw kya-e

awnaw kha a muih kho nawlan hae,

mih muisaw kha Michi khua kyate

a kikhae.

31 Job, ka bya hynh pekite

yn ngaepya tua,

daetedae lan umtua, bya ka ho cih.

32 Ho lanpaw hankhakheit na hoi ze,

bya yn khungtua;

nang kha thyaaccousah lan

kae ry keiccuze bya hotua.

33 Ho lanpaw na hoi khyh ze,

ka bya yn ngaepya tua;

daetedae lan umtua,

hawnaw kha kae ccangpah cih," a ci.