1 Oute Job nynh khung zah:

2 "Thanccingte, e hynh

hynhcih mawte nynh

athua cipaw ka ny;✝

thuasalama ccungccaw nynh

Pachia malang pawtemou

a ding kho cih?

3 Ccungccaw nynh Pachia kha

bya a ei ry lanze,

avae thong kheit kyaze

vaekheit sanmah

khung kho lan khyh.

4 Pachia tuh a thinlung kya

haw zah, a thawzung tuh

a thawsae,

hum nynh mou amaw kha

rawsete a tae kho cih?

5 Mua hae kha nue zah,

mua hae tuh nyhkuh khyh hae,

a thinria zah mua hae kha

a dawleih hae;

6 laephi kha a umnaw hmin kya

hy zah,

a tung hae tuh a thyngkuh hae;

7 khuanin kha kawpya zah,

khuanin tuh thua leite a um;

awsi hae kha awsah khyh hae;

8 a makhaete vaawlui kha daw zah,

Rili tuileih kha a syde;

9 Pachia nynh Bear awsiphu,

Orion awsiphu, Awsitaruh,

Awsitaruh te✝

alia lang e awsi umnaw

adawkhawkuhpaw kha a rae,

10 nythya kho leipaw uccaw hae te

ngaeang lan umpaw

uccaw riatae lei kha a rae.

11 Dotua, ka pe po cceih zah

ka muih khyh;

a ccia zemah ka lung ka lan

la thua khyh.

12 Aning nynh dae a law;

hum nynh mou a kang kho cih?

Hum nynh mou amaw kha,

‘Pawmou na cyi?’

a cipah ngan cih?

13 "Pachia nynh a thinrianaw kha

daesah lan khyh;

Rahab a bawmtu hae tuh

amaw pe khe a bakhung hae.

14 Tukeiccuze amaw malang

paw bya mou ka pokuh cih zah,

pawtemou ka khung kho cih?

15 Seinaw hoi leipaw

ka thua zemah,

amaw kha bya ka khung

ngan khyh;

kae yn ruphutu kalan

thawccinaw ka ngiakuh cih.

16 Amaw kha ka ko zah

yn oi zemah,

ka bya yn ngaepah cih cite

ka zyn khyh.

17 Pawccecize khise te

kae kha yn syro zah,

akonglang um leite

ka vaemaw kha yn lungsah pya;

18 ka hy sanmah yn suesah mang khyh,

accihpaw teingnaw khate

phe yn biasah.

19 Thawzung te taeku athua lanze,

Pachia tuh a thawsaepaw nynh thua!

Byading kong athua lanze,

hum nynh mou ccaekia lang

yn tangpah kho cih?

20 Seinaw hoi leipaw

ka thua zemah,

ka khalang toulou nynh

kamaw hynh sei yn be cih;

ccaenaw um leipaw

ka thua zemah,

ka thinlung akoupaw kha

a langsakuh cih.

21 Kae tuh ccaenaw um leipaw

nynh ka thua;

kamaw te kamaw

ka nyhkuh khyh;

ka hiinnaw hynh ka hua.

22 Ka ho lanpaw bya kaw kheit tuh,

Pachia nynh ccaenaw um leipaw

te ccungccaw hoy leipaw kha

parouh mawte a ro hae.

23 Vawsawnawpi nynh

vaekheitmawte chinaw kha

he yn thuakhae tuh,

seinaw hoi leipaw a teingnaw kha

Pachia nynh a nuinse.

24 Laephi hynh ccungccaw hoylei

hae paw kuih kya pya athua;

byapiatu hae mit kha

phang a hu hae, tuh-e tuh

Pachia nynh a cyi khyh lanze,

hum nynh mou a cyih?

25 "Ka ccyh tuh a ccuepaw laeze

aranghua;

ka ccyh tuh po a ccue zemah

hoynaw muih khyh.

26 Kohlung hawte thuasah,

saw a zounua bungpaw

mosipi hawte thuasah

myarya a thyrang.

27 ‘Ka vawsawnaw hynh

ka ning cih;

ngaethyanaw mitmae hynh

ka vua cih zah lungpawte

ka um cih,’ ka ci lanze,

28 ka teingnaw balyn hynh ka rih,

pawccecize seinaw

hoi leipaw lang

nae ria lan khyh cipaw ka ny.

29 Kae tuh seibe ka thua cih;

pawccemou accakaepaw lang

ka banghan cih?

30 Saepia te ka singkuh zah,

ka kuih hynh thyaapaping lan

ka thyaasaku zemah,

31 athupaw lungkhu lang

nae phangde mamin cih zah,

ka boeining hae toulou nynh

yn hua cih hae.

32 Pachia tuh kae nynh

byakhung kho lanpaw te

byapianaw kalan pynkheihlan

cciakhae lan ciate,

kamaw hawte ccungccaw mah

thua khyh.

33 Kaening lu ning tungvaw

kaw a hoipaw,

kaening laku hopiatu um khyh.

34 Pachia nynh a ccungngue kha

ka kyate lah zah,

amaw rawrinaw nynh

ka thin yn phangsah khyh zetuh,

35 amaw rawri leite ka hopah cih,

pawccecize ka tuaku hawte

ka thua khyh cipaw ka ny.