As 10 parábolas mais importantes de Jesus

3 Nayo Yesu kawalongela mbuli nyingi kwa kulinga mbuli. "Tegelezeni! Mlimi kaita kumiza mbeyu. 4 Viyakalile yomiza mbeyu, zimwenga zilagalila mzila, ndege weza wazidonda. 5 Zimwenga zilagalila mmabwe hanhu hakalile na ulongo mdodo. Mbeyu zioneka zilopola kota mbali kwavija hakala na ulongo mdodo. 6 Na zua vidilawile mbeyu zotile zinyala kwavija mizizi yake haingile ng’hani, ivo mbeyu zotile zifa. 7 Zimwenga zilagalile mmiwa, miwa iyo ikula na kuzizonga. 8 Zimwenga zilagalila muulongo unogile, mmela wota, ukula na kulela, zimwenga mhule mia, zimwenga sitini na zimwenga salasini. 9 Yesu kakomeleza kwa kulonga, Yeli na maguti yahulike!

Mfano wa munhu wa Samalia yeli na wende

25 Bahaja kema Mfundaji wa ndagizi imwe kamgeza Yesu, kamuuza, "Mfundaji, nhende choni mhate ugima ulibule uhelelo?" 26 Yesu kamuuza, "Mgamayandiko gandikwaze kwa mbuli ya ndagizi za Musa? Na gweye kumanya choni? 27 Ija munhu Kedika, kalonga "Mtogole Mndewa Mulungu wako kwa moyo wako wose, na kwa muhe wako wose na ludabwa wako wose, na kwa ubala wako wose, ‘Na mwing’he wende miago kama vuuwing’ha mwenyego.’ " 28 Yesu kamlongela "Kulonga goya," "Tenda ivo na gweye kokua na ugima."

29 Mbali ija mfundaji wa ndagizi viyalondile kuilagusa kua kana ubala kamuuza Yesu, "Miangu nie yelihi?"

30 Yesu kedika kalonga, munhu imwe kalawa Yelusalem kuita Yeliko, viyakalile nzila wabavi wamvamila na kumvula vivalo vake na kutoa na kumboka chila chinhu, na wamleka bahaja behi na kudanganika. 31 Labaho mlava nhambiko imwe kakala yobita nzila ija, viyamonile munhu ija yavamiligwe na wabavi kabita kumgwazo. 32 Amala kabita mwanahina wa mlava nhambiko imwe nayo viyamonile munhu ija yavamiligwe na wabavi kabita kumgwazo ivija. 33 Mbali munhu imwe wa isi ya Samalia viyakalile muumwanza, kabita haja hakalile munhu ija na viyamonile kamonela bazi. 34 Kaita kwa munhu ija kamsunha goya vilonda vake amala kamgela divai na kumfunga, baho kamkweza mchihongwe wake amala kamgala muing’anda yakugona nyambenyambe ili wamlole goya. 35 Viivikile igolo, ija munhu wa isi ya Samalia kalava vihande vidi va madini ga sente ng’hulu kamwing’ha mlolezi wa ija ng’anda, na kamlongela, "Mlole goya ino mtamu na kama sente zokongezeka, niye nahabwela nokwiza kukuliha."

36 Labaho Yesu kauza, Vuutonga kwa wanhu waja wadatu yelihi iyo miage munhu ija yatoigwe na Majambazi?"

37 Na mfundaji wa ndagizi za Musa kedika, kalonga "Ija yamonele bazi iyo miage." Yesu kamlongela, "Genda kasang’hane ivoivo."

4 "Kama Munhu imwe kumwenu yahawa na bung’hukilalo mia amala bung’hukilalo imwe kaga, honda yawaleke waja wamwenga tisini na tisa, amala sekeyaite kuchiwala kuzambwila ija imwe yagile mbaka yamone? 5 Nayo yahamona, kompika mmayega gake kuno kodeng’helela. 6 Na yahavika ukae yake, kowakema mbwiga zake na ivija wayage na kuwalongela, ‘Chideng’helele hamwe kwa vija nimpata ija bung’hukilalo wangu yagile.’ 7 Niye nowalongeleni, ivija hokua na deng’o kuulanga kwa Mulungu, kwa munhu imwe yali na malozo yahaleka malozo gake, kubita waja wanhu tisini na tisa wotogoligwa kwa Mulungu na hawagesa kuleka malozo.

Mfano wa mbwanga yagile

11 Baho Yesu kagendelela kulonga, hakala na muhu imwe yakalile na wabwanga waidi. 12 Baho ija mdodo kamlongela tati yake, "Tata ning’he uhazi wangu. Tata kabagula amala kamwing’ha vinhu vake. 13 Mchipindi chidodo, mbwanga ija mdo kasola vinhu vave vose kaita isi ya kutali na hamwao, uko kapwililisa vinhu vake vose kwa luhadu. 14 Na viyakomeleze kupwililisa vinhu vose, nzala ng’hulu ingila muisi ija, nayo kasigala kabule chinhu chochose. 15 Baho mbwanga ija kaita kwa mwenekae imwe kupula sang’hano, iyo mwenekae kamgala mumgunda wake kulisa nguluwe. 16 Ivo kakala kolonda kuja ndia iyoja nguluwe mbali habule munhu yamwing’ile ndiya yoyose. 17 Mbali viyatongile mmoyo wake, kailongela, "Kwa tati yangu hana watumigwa wengi woja ndiya na kusigaza habali niye nidanganike na nzala! 18 Nobwela kwa tati yangu na kumlongela, "Tata nhenda malozo kumwako na kuulanga kwa Mulungu. 19 Silondeka kukemigwa mwanago kaidi, mbali unhende kama imwe mwa watumigwa wako.’ " 20 Ivo kasegela kubwela kwa tati yake.

"Mbali viyakalile kutali mnzila, tati yake kamona na kumonela bazi, tataake kamkimbilila kumhagatila na kumlamsa. 21 Mbwanga ija kamlongela tataake, ‘Nhenda malozo kumwako na kuulanga kwa Mulungu, silondeka kukemigwa mwanago kaidi.’ 22 Mbali tati yake kawalagiza watumigwa wake, ‘Lopoleni, ‘Ngalileni valo dinogile, mumvaze, na kumumvaze mhete mchidole chake na mumvaze vilatu mmagulu gake. 23 Amala kasoleni bofu da ng’ombe yanonile mumchinje, chije na chitende lusona. 24 Kwa vija mwanangu ino kakala kama munhu yadanganike, nayo sambi mgima, kakala yagile, sambi nayo kaoneka.’ Baho wasonga kudeng’helela.

25 "Chipindi icho ija mbwanga mkulu kakala kumgunda, viyavikilile habehi na ukae, kahulika dizi da nyila kuno wanhu wovina. 26 Kamkema mtumigwa imwe kamuuza, choni chigendelela hano? 27 Iyo mtumigwa kamlongela, mdodo wako keza, labaho na tati yako kamchinjila bofu da ng’ombe yanonile kwa vija mwanage kabwela ukae yeli mgima. 28 Ija mkulu wake kehiligwa, na kalema hata kwingila mng’anda. Baho tati yake kalwa kunze na kumpula ng’hani. 29 Mbali iyo mbwanga kamwidika tati yake kamlongela, ‘Tata lola, niye nikala nikusang’hanila milao mingi, hata zua dimwe sinaleka kuzitogola ndagizi zako, na hunaning’ha hata mbuzi imwe mhate kudeng’helela na mbwiza zangu! 30 Mbali viyezile ino mwanago yapwililise vinhu na weli na luhadu, gweye kumchinjila ndama yanonile! 31 Tati yake kamlongela, ‘Go mwana, gweye kukala na niye mazua gose, na vinhu vino vose nili navo ni vako ivija. 32 Chilondeke kutendigwa ni kuvina na kudeng’helela kwa vija mdodo wako yakalile kadanganika sambi mgima, na yakalile kaga sambi kaoneka.’ "

Kulinga mbuli ya chinhu cha bei ng’hulu lulu chipatika muisomba

45 "Kaidi, ufaume wa kuulanga uilinga na munhu imwe yozambwila chinhu cha bei ng’hulu chipatika muisomba chikemigwa lulu, 46 na viyapatile iyo lulu imwe, kaita kugula vinhu vose yeli navyo, kabwela kuigula lulu ija.

Mfano wa Mfalisayo na mgoga kodi

9 Baho Yesu kawalongela mfano umwe waja wanhu watongile kua wao weli na unovu wa Mulungu, kuno wowazeleu wamwenga. 10 "Zua dimwe wanhu waidi waita kumfugamila Mulungu Muikae ya Mulungu, imwe kakala mgoga kodi na imwenga kakala Mfalisayo. 11 Ija Falisayo kema kuno yompula Mulungu yolonga mmoyo, ‘Go Mulungu niye nokutogola kwa vija niye sio kama wanhu wamwenga, wanhu weli na wamelo, wavwizi na wagoni, hebu kama ino mgoga kodi. 12 Niye mdijuma sija mazua maidi kuno nompula Mulungu na nomlavila fungu dimwe da nhosa mmafungu kumi ga uzenzi wangu.’

13 "Mbali ija mgoga kodi kema kutali, na henule meso gake kuulanga mbali kakala yoitoa muimhambaga kwa giogio na kolonga, ‘Go Mulungu nionele bazi nie nili na malozo.’ 14 Niye nowalongeleni, "Ija mgoga kodi kabwela ukae yake kuno kalekeseligwa malozo gake. Mbali ija miage halekeseligwe. Kwavija yoinula kohulumusigwa na yotumbala kokwinuligwa."

Mfano wa watumigwa wadatu

14 "Chipindi icho yokuwa kama munhu imwe yafungile mwanza wa kutali. Kawakema watumigwa wake, kaweng’ha vinhu vake. 15 Kamwing’ha chila munhu vija viyodaha, imwe sente vikadi vitano va zahabu, na imwenga sente vikadi vidi va zahabu na imwenga sente kadi imwe ya zahabu, amala kafunga mwanza. 16 Bahaja ija yeng’higwe sente vikadi vitano kazisang’hanila sang’hano na zongezeka vikadi vimwenga vitano. 17 Ivija ija yeng’higwe vikadi vidi va zahabu nayo zongezeka vikadi vidi va zahabu. 18 Mbali ija yeng’higwe sente ya kikadi chimwe, kaita kahimba kombo muisi kakisila, kaifisa sente imwe ya zahabu ya mkulu wake.

19 "Vichibitile chipindi chitali, mndewa ija kabwela, kasonga kupeta hisabu ya vinhu vake. 20 Mtumigwa yeng’higwe sente za zahabu tano keza, kasola zahabu tano fungu jongezeke, kamlongela, ‘Gomkulu kuning’ha sente zahabu tano, hano hana sente zahabu tano fungu jongezeke.’ 21 ‘Mkulu wake kamlongela, ‘Kusang’hana goya, mtumigwa unogile na utogoligwe. Kutogoligwa kwa mbuli ndodo ivo nokwing’ha gamwenga makulu. Izo udeng’helele hamwe na mkulu wako!’ 22 Mtumgwa yeng’higwe sente zahabu mbili keza, kalava zahabu mbili zongezeke, kalonga, ‘Gomkulu kuning’ha sente zahabu mbili, sola zahabu zimwenga mafungu maidi gongezeke gamhatile.’ 23 ‘Mkulu wake kamlongela, ‘Kusang’hana goya mtumigwa unogile na utogoligwe. Kutogoligwa kwa mbuli ndodo ivo nokwing’ha gamwenga makulu. Izo udeng’helele hamwe na mkulu wako!’ 24 Mbali ija yeng’higwe sente zahabu imwe keza, kalonga ‘Gomkulu, nivimanya gweye hubunzagwa. Kosola chinhu si chako na kokwaha chinhu huchihandile. 25 Nidumba na niihimbila sente yako ya zahabu mdikombo. Sola basi sente yako imwe ya zahabu.’ 26 ‘Mkulu wake kamlongela, ‘Gweye iyo mtumigwa mbananzi na mbwa! Kovimanya niye nokwaha chinhu sichihandile na nosola chinhu si changu. 27 Ivo kulondeka, kuika sente yangu ya zahabu mwa wanhu wakuzisang’hanila sang’hano amala nihabwela mhate fungu jangu na dija fungu jongezeke. 28 Ivo, mbokeni iyo sente ya zahabu inimwing’ile mwing’heni munhu ija yeli na vikadi kumi va zahabu. 29 Manake, munhu yokisang’hanila sang’hano chinhu chinimwing’ile nomwongezela na chimwenga, nayo kokua navo vingi. Mbali munhu yoyose ija hakisang’hanila sang’hano chidodo chinimwing’ile, hata icho chidodo chiyeli nacho, nacho nomboka. 30 Na kwa mbuli ya ino mtumigwa yeli bule fungu chongezeke, mwaseni kunze mdizizi! Uko kokua na ndilo na kuluma meno.’

Munhu mzenzi na Lazalo

19 Yesu kalonga, hakala na munhu imwe yali na uzenzi ng’hani, yavalile vivalo va langi zambalau zikalile za bei ng’hulu, na mazua gose kakala koja kwa luhadu. 20 Baho haulwivi hakala na chikumbi muyega imwe, zina jake Lazalo, yeli na vilonda vingi, 21 Lazalo kakala kotumanila ndia ilagale kulawa muimeza ya ija mzenzi, hata umbwa weza na kuvilambita vilonda vake.

22 "Ija chikumbi muyega viyadanganike, kasoligwa na mtumigwa wa kuulanga kwa Mulungu wamwika habehi na Ibulahimu. Na ija mzenzi ivija kadanganika na wamuwanda. 23 Basi ija mzenzi viyakalile kuja kwa wanhu wafile kuno yodununzika, kenula meso gake kamuona Ibulahimu na ija Lazalo kahabehi yake. 24 Baho ija mzenzi kalila, kalonga, ‘Tata Ibulahimu nionele bazi, mlagize Lazalo yazabike chidole chake mgamazi amala yahoze lulimi lwangu, kwa vija nodununzika muumoto uno hano hanili.’ 25 Mbali Ibulahimu kamlongela, ‘Mwanangu sekeuisemwe kua gweye kukala kopata vinhu vinogile muugima wako, nayo Lazalo kakala yopata gehile, ivo sambi nayo Lazalo kahano kohumula na gweye kodununzika. 26 Na kulu kubita gose, hagati yetu cheye na mweye hana kombo kulu, kwa mbuli ya waja wanhu wolonda kulawa kumwetu kwiza kumwenu wapotigwe, na waja wolonda kulawa kumwenu kwiza kumwetu ivija wapotigwe kwiza. 27 Mzenzi iyo kalonga, ‘Tata nokupula mlagize Lazalo yaite ukae kwa walukolo wangu, 28 kwa vija hana walukolo wangu watano yawakomhokele ili nao seke wavike hanhu hano ivija ha madununzo.’ 29 "Ibulahimu kamwidika, ‘Wao wahamwe na Musa na Walagusi wa Mulungu, ivo wolondeka kuwategeleza wao.’

30 "Mbali ija mzenzi kalonga, ‘Sio ivo Tata Ibulahimu, mbali kama munhu yahalawa kwa wafile yahaita kumwao, nao woleka malozo na kumfugamila Mulungu.’ 31 Ibulahimu kawalongela, kama hawalonda kuwatogola Musa na Walagusi wa Mulungu, hawadaha kutogola mbe hata munhu yahalawa kwa wafile hawamtegeleza.

Kulinga mayani ga hembahemba

24 Yesu kawalinga wanhu mbuli imwenga,"Ufaume wa kuulanga uilinga na munhu yahandile mbeyu inogile mumgunda. 25 Chilo chimwe wanhu viwakalile wawasa, mbananzi keza kahanda mahembahemba muuhemba na kasegela. 26 Amala mbeyu vizotile na kukula na kulava mbelewela, na mahembahemba nago gasonga kufumula. 27 Watumigwa wa mwene mgunda wamuwinza wamlongela, ‘Mndewa gweye sikuhanda mbeyu zinogile muugunda wako, ivo mahembahemba gano galawa kulihi?’ 28 Mwenemgunda kawedika, ‘Mhasanyi iyo yasang’hane ivo,’ baho watumigwa wake wamuuza. ‘Kolonda cheye chiite kugang’ola?’ 29 Nayo kawedika, ‘Habule,’ lekeni, ‘Kwavija mhang’ola mahembahemba moung’ola uhemba ivija. 30 Vilekeni vose vikule hamwe mbaka mumlao. Amala nowalongela wasengaji tanhu wakunzanye mahembahemba makinza makinza wagasome moto, labaho wasenge uhemba wawike mdigulu jangu.’"

Mfano wa mhambe kumi

1 "Chipindi icho, ufaume wa kuulanga woilinga na mhambe kumi wasolile vimuli vao, kuita kumbokela mfunga zengele. 2 Mmwao mwa waja mhambe kumi watano wakala wabozi na watano wakala na nzewele. 3 Waja wabozi wasola koloboi zao, mbali hawasolile mavuta ga usigavu. 4 Mbali waja weli na nzewele wasola mavuta ga usigavu na mzi koloboi zao. 5 Kwa vija mfunga zengele kakawa kuvika, waja mhambe wose wakukila wawasa. 6 Muichilo chikulu hakala na nyangi, ‘Cheleko, cheleko! Mfunga zengele kokwiza, gendeni mkambokele.’ 7 Baho waja mhambe wose walamka, wazitanda goya koloboi zao. 8 Waja wabozi wawalongela waja weli na nzewele, ‘Ching’heni mavuta genu chidogo manake koloboi zetu zofa.’ 9 Mbali waja weli na nzewele wawalongela, ‘Mavuta hagachenela cheye na mweye! Yofaya muite mmagenge mkaigulile mavuta genu!’ 10 Ivo waja mhambe wabozi viwaitile kugula mavuta, mfunga zengele kavika, na waja mhambe waitandile goya wengila hamwe nayo muing’anda ya zengele, amala lwivi uhindigwa. 11 Hamwande waja mhambe wabozi weza, wakema, ‘Gomkulu, gomkulu, chivugulile! 12 Mbali yeye kawedika, ‘Kweli nomlongeni, siwamanyile mweye.’" 13 Hachikomelezo Yesu kalonga, "Ivo itandeni, kwa vija hamdimanya zua hebu saa.