1 Ivo, Muyahudi kana choni chibitile wamwenga? Hebu kwingila kumbi kofaya choni? 2 Enaa, kua Muyahudi kofaya ng'hani. Mosi, Mulungu kaweng'ha Wayahudi usenga wake. 3 Mbali yokuwaze kama Wayahudi wamwenga hawamtumanila Mulungu? Ivo, kama hachimtumanila Mulungu mbuli iyo yomtenda Mulungu sekeyatumaniligwe? 4 Habule! Mulungu kogendelela kusang'hana chija chiyalongile mazua gose, hata ihawa chila munhu mvwizi. Kama Mayandiko ga Mulungu vigandikigwe,

"Chila uhalonga mbuli zako ni zakweli,

na muulamuzi, gweye kohuma."

5 Mbali yahawa ubananzi wetu wolagusa kua Mulungu kosang'hana bila kumuonela munhu, cholonga choni? Ivo, cholonga kua hatenda goya yahachilamula? Hano nolonga chiunhu. 6 Haidahika hata chidogo! Kama Mulungu yahawile wa komuonela munhu, yahadaheze kuwalamula wanhu wa isi yose? 7 Kaidi wanhu wodaha kulonga kua kama uvwizi wangu wotaza wanhu wamwenga waone bila kifiso kua Mulungu wakutumaniligwa, nao wogendelela kumtogola. Ivo habali ching'hali cholamuligwa kua watenda malozo? 8 Baho iilinga na kulonga, chitende ubananzi ili chipate ganogile! Ivo wamwenga viwachilongile kwa uvwizi kwa kuchilongeleza kua chofunda ivo. Wanhu wolonga ivo, wolamuligwa kuilinga na ubananzi wao.

9 Ivo, chilongeze, ivo, cheye Wayahudi chofaya ng'hani kubita wamwenga? Siivo mbee! Manake nivimanya kulawa mwanduso kua Wayahudi na wanhu wa isi zimwenga wose chigogigwa na malozo. 10 Kama Mayandiko ga Mulungu vigandikigwe,

"Habule hata imwe mtenda goya,

11 habule hata imwe yeli na nzewele, hebu habule yolonda kummanya Mulungu.

12 Wose wamleka Mulungu wose wabananga, habule yosang'hana gayalonda Mulungu, habule hata imwe.

13 Mbuli zao zihile ziwalonga ni kama chinusi chilawa mdipanga hadigubikigwe, milimi yao imema uvwizi, mmilomo yao molawa ulonzi uli na sumu ng'hali kama ya nyoka.

14 Milomo yao imema mbuli za nyinukila na mbuli zilumiza wamwenga.

15 Magulu gao gokimbilila kuita kukoma wanhu,

16 hohose hawagenda wogala ubananzi na kuwadununza wanhu.

17 Hawamanya kukala kwa utindiwala na wanhu wamwenga.

18 Hawalonda mbe kumtegeleza Mulungu."

19 Chivimanya kua ndagizi yowemila waja walongozigwa na ndagizi iyo, kaidi hawadaha kuigombela kwa mbuli yoyose, na isi zose zokwiza kulamuligwa na Mulungu. 20 Manake habule munhu yoyose yonda yatogoligwe na Mulungu kwa kugoga ndagizi, kwavija sang'hano ya ndagizi nikumlagusila munhu tu kua kana malozo.

21 Mbali sambi Mulungu kalagusa nzila ya wanhu kudaha kua watogoligwa nayo, bila kutumanila ndagizi. Hata ndagizi za Musa na Mayandiko ga walagusi wa Mulungu golonga bila kifiso mbuli iyo. 22 Mulungu kowatogola wanhu kua watenda goya kwa nzila ya kumtogola Yesu Kilisito, Mulungu kowatenda ivo kwa waja wose womtogola, kabule kumuonela munhu yoyose. 23 Wanhu wose wagiza kutegelezigwa na Mulungu. 24 Mulungu kachitendela vinogile ng'hani kubita vija vichilondeke kupata, kwa nzila ya Yesu Kilisito kachikombola na kuchisegezela malozo getu. 25 Mulungu kamlava Yesu ili kwa damu yake yawe nzila ya kuwasegezela wanhu malozo gao kwa kutogola kwao. Katenda ivo ili yadahe kulagusa kua iyo kosang'hana vija viilondeka. Baho umwaka Mulungu kakala yofunya moyo bila kugesa malozo ga wanhu. 26 Katenda ivo ili yatende vija viilondeka kwa chipindi chino kwa kuwapetela wanhu wose womtogola Yesu wawe watogoligwa nayo.

27 Ivo, chodaha kuigodela choni? Ivo, kwambuli ya kuigoga ndagizi? Habule! Mbali kwavija chotogola. 28 Kwavija Mulungu komtogola munhu kua mtenda goya kwa kumtumanila Yesu, sio kwa kuitegeleza ndagizi viilonda. 29 Hebu vilihi, Mulungu ni Mulungu wa Wayahudi waiyeka, hebu ivija wa wanhu wa isi zimwenga? Enaa, wa wanhu wa isi zimwenga ivija. 30 Mulungu imwe, nayo kowatogola Wayahudi kua watenda goya kwa kumtumanila Yesu na wanhu wa isi zimwenga ivija kwa kutogola kwao. 31 Ivo, chihatumila kutogola chohindula ndagizi? Hambe, chihawinza nzila ya kutogola chosang'hana vija viilonda ndagizi.