1 Mbokeleni miyenu ija yang'hali na nhogola ndodo, mbali sekemgombe nayo kwa gaja goyolonga. 2 Munhu imwe kotogola kuja chinhu chochose, mbali imwenga yeli na nhogola ndodo koja mboga za mayani ziiyeka. 3 Munhu yoja chila chinhu seke yamzeleu ija hodaha kuja chila chinhu, nayo yoja mboga za mayani ziiyeka seke yamulamule ija yoja chila chinu, kwavija Mulungu kamtogola. 4 Gweye kwa nani mbaka umulamule mtumigwa wa imwenga? Mkulu wake iyo yovimanya kama mtumigwa wake kabananga hebu hanabananga, enaa, kokwiza kusang'hana kama viilondeka, kwavija Mndewa kana udaho wa kumtaza yasang'hane viilondeka.

5 Munhu koona kua zua dimwe dofaya ng'hani kubita zua dimwenga, na munhu imwenga koona kua mazua gose goilinga. Chila imwe na yawinze vija viitonga nzewele yake. 6 Munhu yotonga kua zua dimwe kulu kumsang'hanila Mulungu kubita zua dimwenga, kotenda ivo kwa kumtogola Mndewa. Nayo yoja ndia yoyose kwambuli ya Mndewa koja kwa komwing'ha hewela Mulungu, nayo yoleka kuja ndia yoyose kwambuli ya Mndewa, nayo ivija komwing'ha hewela Mulungu. 7 Habule munhu yoyose mmwenu yokala na ugima kwambuli yake mwenyego, hebu munhu yodanganika kwambuli yake mwenyego. 8 Ivo chihawa wagima chawagima kwambuli ya kumnogeza Mndewa, chahadanganika, chodanganika kwambuli ya kumnogeza Mndewa, Baho, kama chihawa wagima hebu chihadanganika, cheye ni wanhu wake Mndewa. 9 Iyo mana Kilisito kadanganika, kazilibuka ili yapate kua Mndewa kwa wanhu weli na ugima na wadanganike. 10 Gweye koja mboga za mayani ziiyeka habali, komulamula miyago? Nagweye uja chila chinhu habali umzeleu miyago? Cheye chose chokwima haulongozi wa chigoda cha ulamuzi cha Mulungu. 11 Mayandiko golonga kua,

"Kweli niye Mulungu nolonga,

chila munhu konitumbalila mavindi,

na chila munhu kokwiza kulonga mwenyego kua nie iyo Mulungu."

12 Kwaivo, chila munhu mmwetu kozilonga mbuli zake ha Mulungu.

13 Ivo, chileke kuwalamulana, kaidi sekechiwe ng'walo kwa wayetu hebu kuwahonza wasang'hane malozo. 14 Kwakuilumba na Mndewa Yesu, kweli novimanya habule chinhu chochose hachitogoligwa kwambuli ya kumfugamila Mulungu kulawa umwaka. Mbali kwaija yochiona hachitogoligwa kumwake, chokua hachitogoligwa kweli kumwake. 15 Ihawa gweye komtenda miago yagwe giogio kwambuli ya ndia yuuja, baho kokua hulongozigwa na wende kwa miago. Seke utogole hata chidogo ndia yako imtende munhu imwenga yage kwavija Kilisito Yesu kadanganika kwambuli yake! 16 Baho sekemtogole chinhu mchiona kumwenu kua chinoga chilongigwe vihile. 17 Kwavija ufaume wa Mulungu sio kwambuli ya kuja na kung'wa, mbali ni kusang'hana gaja gotoligwa kua na utindiwala na ndeng'helelo igaligwa na Muhe wa Mulungu. 18 Mulungu komtogola munhu ija yomsang'hanila Kilisito kwa nzila iyo na ivija kotogoligwa na wanhu.

19 Kwaivo chiiyohe ng'hani kusang'hana mbuli zija zigala utindiwala, na gaja gochidahiza kuigela moyo. 20 Baho, sekeuibanange sang'hano ya Mulungu kwambuli ya ndia. Ndia zose zotogoligwa, mbali hailondeka kuja ndia ija yomtenda munhu yengile mmalozo. 21 Yonoga kuleka kuja nyama na kung'wa divai, hebu kusang'hana chochose chija chodaha kumuhonza miago yatende malozo. 22 Baho, gendelela kutogola vija vuutogola kati yako na Mulungu. Kamweda munhu ija yoiona kua kabule malozo kwambuli ya chija chiyaona kua chikala goya! 23 Mbali munhu yodumba mmoyo wake kwandia iyoja, kolamuligwa na Mulungu, kwavija kabule kwimila dija diyatogola. Chochose chisang'hanigwa bila kutogola ni malozo.