1 Cheye chikangale kutogola cholondeka kufunya moyo kwa mbuli ya wayetu weli na nhogola ndodo. Sekechisang'hane mbuli zichitenda chideng'helele wenyego. 2 Chila imwe mmwetu kolondeka kumwing'ha wende miage kwa unovu ili iyo miage yagangamale muinhogoli. 3 Manake Kilisito hasang'hane mbuli za kumtaza iyo mwenyego, mbali kasang'hana kama Mayandiko viyandikigwe, "Maligo gose gawakuligile gweye gamhata nie." 4 Kwavija, gose gandikigwe mgaMayandiko ga Mulungu gandikigwa kwambuli ya kuchifunda cheye. Mayandiko gago gochitaza kufunya moyo mgamadununzo na gochigela moyo ili chipate tumanilo. 5 Mulungu iyo yochihoza moyo na kuchitenda chifunyemoyo. Sambi nompula yawadahize mkale kwa kugesa dimwe kwavija moilinga na Kilisito Yesu, 6 ili mweye mose hamwe kwa moyo umwe na dizi dimwe mdahe kumtogola Mulungu, Tata wa Mndewa wetu Yesu Kilisito.

7 Muibokele mweye kwa mweye kama Kilisito viyawabokele ili wanhu wamwing'he nhogola Mulungu. 8 Manake, nowalongeleni Kilisito kawasang'hanila Wayahudi yadahe kulagusa kua Mulungu wa kutogoligwa, na gaja malagano gaweng'ile wasaho zetu gavikile, 9 ili nawo wanhu haweli Wayahudi wadahe kumtogola Mulungu kwambuli ya bazi jake, kama viyandikigwe Mmayandiko ga Mulungu,

"Kwaivo nokwiza kukutogola hagati mwa wanhu haweli Wayahudi.

Nokwiza kukwimbila nyila za kukutogola kwa wanhu haweli Wayahudi."

10 Ivija zandikigwa,

"Mweye wanhu haweli Wayahudi deng'heleleni, deng'heleleni hamwe na wanhu wake Mulungu!"

11 Na ivija,

"Mtogoleni Mndewa, mweye wanhu haweli Wayahudi, mweye wanhu wose mtogoleni Mulungu."

12 Nayo, Isaya mlagusi wa Mulungu kalonga,

"Kolawila munhu imwe muulelo wa Yese, nayo kowalongoza wanhu wa isi zose, na wanhu haweli Wayahudi, nawo wokwiza kumtumanila."

13 Baho, Mulungu yeli chanduso cha tumanilo, yawatende mdeng'helele ng'hani na muwe na utindiwala kulawa muinhogola yenu, tumanilo jenu didahe kongezeka kwa udaho wa Muhe wa Mulungu.

14 Walukolo zangu, nie mwenyego nivimanya kweli kua mweye mwa wanovu ng'hani, mna umanyi, na modaha kuigela moyo wenyego kwa wenyego. 15 Mbali niwandikila mbuli hakwehakwe muibalua ino, ili kuwakumbusa kwambuli izo. Nhenda ivo kwambuli ya unovu wa Mulungu uyaning'ile 16 unovu wa Mulungu wa kunhenda ie niwe msang'hanaji wa Yesu Kilisito kwa wanhu haweli Wayahudi. Nosang'hana kama mlava nhambiko ija yosang'hana kuligula Usenga Unogile wa Mulungu ili wanhu haweli Wayahudi wadahe kua kama nhosa itogoligwa na Mulungu, nhosa ija inang'hanigwe na Muhe wa Mulungu. 17 Kwaivo, nihawa niilumba na Kilisito Yesu, nodaha kuigodela sang'hano yangu kwambuli ya Mulungu. 18 Manake sidaha kulonga chinhu chimwenga chochose ila chija tu Kilisito Yesu chiyasang'hane kwakunhumila nie ili wanhu wa isi zimwenga wadahe kumtegeleza Mulungu. Kasang'hana ivo kwa gaja ganilongile na kusang'hana, 19 kwa udaho wa kutenda miujza na uzonza, na kwa kusongela Yelusalemu na kae zose zili muimhaka mbaka Iluliko, nimala kuligula Usenga Unogile wa Kilisito vija viilondeka. 20 Kwambuli iyo, niyoha kuligula Usenga Unogile hohose haja zina da Yesu haditambuligwa, nosang'hana ivo ili seke nibwelele kusang'hana kaidi sang'hano hanhu haja hayasang'hane munhu imwenga. 21 Kama Mayandiko ga Mulungu vigandikigwe,

"Wanhu wose waja hawalongeligwe mbuli zake wokwiza kuona,

nao waja hawapatile kuzihulika, wokwiza kuzimanya."

22 Mbuli iyo ya kuligula Usenga wa Mulungu inikimila mala nyingi kwiza kumwenu. 23 Mbali kwavija sambi ng'omeleza sang'hano yangu mziisi zino, na kwakua milao mingi ng'hala na tamanilo kulu da kwiza kumwenu, 24 notumanila kwiza kumwenu vinili muumwanza kuita Hisipania. Nokwiza kukala baho Loma kwa chipindi chiguhi. Amala mnhaze kugendelela na mwanza wangu. 25 Mbali, kwa sambi noita kusang'hana sang'hano ya Mulungu kwa wanhu wake kuja Yelusalemu, 26 kwavija mabumbila ga wanhu wamtogole Kilisito uko Makedonia na Akaya walamula kulava misango yao kuwataza wanhu wa Mulungu weli vikumbi muyega uko Yeluslemu. 27 Wao wenyego walamula kusang'hana ivo, mbali kwa kweli iyo ni sang'hano zao kwa mbuli ya wanhu hao wa Yelusalemu. Manake ihawa wanhu wa isi zimwenga wabokela ganogile ga Mulungu, wolondeka nao ivija wawasang'hanile Wayahudi mgaja gawalondeka kubokela mazua gose. 28 Nihakomeleza sang'hano iyo na kuweng'ha msango uo ukunzanyigwe kwambuli yao, nokwiza kuwatembeleleni mweye nihawa muumwanza kuita Hisipania. 29 Novimanya kua niheza kumwenu Kilisito kowabalikila ng'hani.

30 Baho, walukolo zangu, nowapuleni ng'hani kwambuli ya Mndewa wetu Yesu Kilisito na kwa wende ugaligwa na Muhe wa Mulungu, muilumbe na nie kwa kunipulila kwa Mulungu. 31 Puleni mhate kulawa bila kulumila kwa waja welibule nhogola weli uko Uyahudi, nayo sang'hano yangu uko Yelusalemu ipate kutogoligwa na wanhu wa Mulungu weli uko. 32 Ivo, Mulungu yahalonda, nodaha kwiza kumwenu na moyo wa deng'helelo, na kuilegeha hamwe na mweye. 33 Nompula Mulungu yogala utindiwala yakale na mweye mose! Pepaa!