1 Baho, kwavija chitogoligwa na Mulungu kwanzila ya kutogola, ivo china utindiwala nayo Mulungu kwanzila ya Yesu Kilisito Mndewa wetu. 2 Kwa kubitila kutogola Yesu, Mulungu kaching'ha ganogile gake. Mbaka sambi chogendelela kukala muunovu uo. Baho chodeng'helela ng'hani kwavija chotumanila kwingila muukulu wa Mulungu! 3 Enaa, si gago tu mbali chodeng'helela ivija mmadununzo kuno chivimanya kua madununzo gogala kufunyamoyo, 4 nako kufunyamoyo kogala kugangamala, nao kugangamala kogala tamanilo. 5 Najo tamanilo hadichitenda chihombe, manake Mulungu kamala kuching'ha wende wake umemile mmoyo kwanzila ya Muhe wa Mulungu yaching'ile.

6 Vichikalile chabule wakuchitaza kuchilohola, Kilisito, saa viivikile, kadanganika kwambuli yetu cheye chili na ubananzi. 7 Havidahika munhu kudanganika kwambuli ya munhu mtendagoya, mbali yodahika munhu kudanganika kwambuli ya munhu mnovu. 8 Mbali Mulungu kachilagusila kua kana wende na cheye, haja vichikalile ching'hali na malozo, Kilisito kadanganika kwambuli yetu. 9 Sambi chitogoligwa na Mulungu kwa damu ya Kilisito, ukweli uiyeka kua kochilohola muuludoko lwa Mulungu! 10 Manake vichikalile ching'hali wahasanyi wa Mulungu, Mulungu kachilumba nayo kwa ifa ya Mwanage. Kwavija sambi chilumbigwa nayo, nikweli kua chokwiza kuloholigwa kwa ugima wa Kilisito. 11 Sio gago tu, mbali chodeng'helela ivija na Mulungu kwanzila ya Mndewa wetu Yesu Kilisito ija yachilumbile na Mulungu.

12 Kwanzila ya munhu imwe malozo gengila mziisi zose, nayo igala ifa. Ivo ifa yenela kwa wanhu wose, kwamana wose watenda malozo. 13 Ndagizi ikala ing'hali kuvika, malozo gakala gavika mziisi, mbali malozo hagakumbukigwa kama habule ndagizi. 14 Mbali kulawa kwa Adamu mbaka chipindi cha Musa, ifa iwavikila hata waja hawasang'hane malozo kama gaja ga Adamu, ga kuleka kumtegeleza Mulungu.

Adamu kakala chilaguso cha ija yokwiza.

15 Mbali malozo ga Adamu hagadaha kuilinga na unovu wa Mulungu. Manake, hata kama malozo ga munhu imwe gagala ifa ya wanhu wose, mbali kwa wende wa munhu imwe, iyo Yesu Kilisito, Mulumgu kawongezela wose unovu wake na gweko jake. 16 Hana tafauti ya gweko da Mulungu na malozo ga munhu ija imwe. Manake viyalozile munhu imwe, Mulungu kalava ulamuzi, mbali viwalozile wanhu wengi, Mulungu kaweng'ha gweko jake kwa kuwalekesela malozo gao. 17 Kweli malozo ga munhu imwe, ifa isonga kwenela na wanhu wasonga kudanganika kwambuli ya munhu iyo imwe, mbali niukweli uiyeka kua chiyatendile ija munhu imwe, yani Yesu Kilisito, chinoga ng'hani. Wose wobokela unovu wa Mulungu na gweko ijo da kutendigwa kuwabule malozo, wokwimila hamwe muugima kwanzila ya ija imwe, manake Yesu Kilisito.

18 Ivo, kama kuloza kwa munhu imwe kugala ulamuzi kwa wanhu wose, ivija sang'hano ilibule malozo ga munhu imwe yoweng'ha wanhu wose kukala bule malozo na ugima. 19 Kuleka kutegeleza kwa munhu imwe wanhu wengi waoneka na malozo, ivija kutegeleza kwa munhu imwe kuwatenda wanhu wengi watogoligwe na Mulungu.

20 Ndagizi ilawila, iswangiza kwongezeka kwa ubananzi, mbali haja malozo vigongezeke, unovu wa Mulungu wongezeka ng'hani. 21 Kama vija malozo vigali na udahi na kugala ifa kwa wanhu, ivija unovu wa Mulungu vuuli na udahi wa kuwatenda wanhu watogoligwe na Mulungu na kugala ugima ulibule uhelelo kwa nzila ya Yesu Kilisito Mndewa wetu.