1 Kilisito kovimanya kua chino chinilonga ni ukweli uiyeka. Hata mmoyo wangu ulongozigwa na Muhe wa Mulungu nao wolagusa kua silonga uvwizi. 2 Nonda kulonga vino, nina giogio kulu na usungu uja haumala mmoyo wangu, 3 kwambuli ya walukolo wangu waja wamuiisi yangu! Kama ihawile yowataza wao, nihatogole kwinukiligwa na kubaguligwa na Kilisito. 4 Wao iyo wanhu wa isi ya Izilaeli waja Mulungu yawabagule wawe wanage, kawalongela ukulu wake, waitogolela kuikila malagano kaweng'ha ndagizi zake, vija viilondeka kumfugamila na ndagizi zake. 5 Hao Waizilaeli ni wazukulu wa wasaho, nayo Kilisito, kwa uja unhu wake, kalawa mulukolo lwao. Mulungu yolongoza vinhu vose, na yatogoligwe mazua gose bila uhelelo! Pepaa.

6 Silonga kua laliko da Mulungu dipotigwa, kwavija sio wanhu wose wa Izilaeli wanhu wa kweli wa Mulungu. 7 Hebu sio ulelo wose wa Ibulahimu ni wanage wa kweli. Ila kama vigandikigwe Mayandiko ga Mulungu, "Waleligwa wake wolawa kwa Isaka." 8 Iyo kulonga, sio wana wose wa Ibulahimu waleligwe kama wanhu wamwenga viwaleligwe iyo wana wa Mulungu, mbali waja waleligwe kulawa mdilagano da Mulungu iyo wonda wakemigwe wanage Ibulahimu. 9 Mbali lagano denyego iyo dino, "Mumsimo kama uno nobwela, nayo Sala kokua kaibasula mwana wa chilume."

10 Sio gago tu, ila nayo Lebeka kalela mapacha kwa tata imwe, iyo Isaka, msao yetu. 11 Mbali ili Mulungu yaoneke kua kana hiyali ya kusagula, hata ing'hali wana waja wa tata imwe hawanaleligwa na kudaha kufambula dihile na dinogile. 12 Lebeka kalongeligwa kua, "Mwana mkulu komsamsang'hanila magati." Ivo usaguzi wa Mulungu wogesa vija viyamkema munhu mwenyego, na sio kwa sang'hano ya chiunhu. 13 Kama Mayandiko ga Mulungu vigandikigwe, "Yakobo ninawende nayo mbali Esau nimlema."

14 Chilonge choni baho? Mulungu hadaha kutenda viilondeka? Hambee! 15 Mulungu kamlongela Musa, "Nokwiza kumonela bazi munhu yoyose inilonda kumonela bazi, nokwiza kumonela bazi munhu yoyose inimulonda." 16 Kwaivo, gose gotumanila bazi da Mulungu, sio kwa kuiyoha hebu viyalonda munhu. 17 Mayandiko ga Mulungu golonga vino kwambuli ya Falao, "Nikutenda mfaume ili nilaguse wanhu udaho wangu kubitila gweye, na zina jangu wadilongelele mziisi zose." 18 Imanyike hazelu, kua Mulungu komuonela bazi munhu yoyose yomlonda kumuonela bazi, na yahalonda kumtenda munhu yawe mdulu, kotenda ivo.

19 Hebu kodaha kuniuza, "Kama mbuli zihawa ivo, munhu kodahaze kulaumigwa na Mulungu? Yelihi yodaha kugalema goyolonda Mulungu?" 20 Mbali gweye munhu kwa nani mbaka udahe kuihuma na Mulungu? Ivo, chinongo chodaha kumuuza ija yachilumbile, "Habali kunilumba kama vino?" 21 Mvunyanga ulongo kodaha kutumila ulongo uuja kuvunyanga na kulumba vinongo vidi, chinongo chimwe chakutumila wandewa, na chimwenga cha kutumila munhu yoyose.

22 Ivoili kwa Mulungu. Kalonda kulagusa ludoko lwake na kulagusa udaho wake, mbali kakala yowabeta na kawafunyila moyo ng'hani, kwa waja wakalile walondeke kubanangigwa na ludoko lwake. 23 Ili kulagusa wingi wa ukulu wake kwa mbuli ya wanhu waja yawatandile kubokela bazi jake, Mulungu katanda kulawa umwaka kuweng'ha ukulu wake. 24 Kwavija cheye iyo waja yawakemile, sio kulawa mwa Wayahudi tu mbali kulawa kwa wanhu wa isi zimwenga ivija. 25 Vino ivo viyalongile mchitabu cha Hosea,

"Wanhu waja hawawile wangu nowakema, ‘Wanhu wangu.’

Isi ija sikalile na wende nayo noikema, ‘Isi nili na wende nayo.’

26 Haja hawalongeligwe, ‘Mweye si wanhu wangu,’ baho wokemigwa, ‘Wana wa Mulungu yeli na ugima.’ "

27 Nayo Isaya mlagusi wa Mulungu, kalonga kwambuli ya Waizilaeli, "Hata kama ulelo wa Waizilaeli wengi kama msanga wa mhwani, ni wadodo waiyeka wonda waloholigwe, 28 kwavija Mndewa kowenukila wamhu wa isi zose kwa kulopola kama viyalongile." 29 Kama vija Isaya viyalongile baho umwaka, "Mndewa yeli na udaho wose sekeyachilekele wana wamwenga wa Izilaeli, chihamalile kama Sodoma, chihabanangigwe kama Gomola,"

30 Ivo chilonge choni baho? Wanhu waja haweli Waizilaeli hawatendile gatogoligwa na Mulungu, kadaha kutogoligwa na Mulungu kubitila kutogola kwao, 31 mbali Waizilaeli waja walondile kutogoligwa na Mulungu kwa kuwinza ndagizi, hawatogoligwe. 32 Habali? Kwavija watumanila sang'hano zao badili ya kumtogola Mulungu. Waikwala "Mdibwe kulu da kuikwangwala." 33 kama vigandikigwe Mmayandiko,

"Loleni nodika dibwe da kuikwala uko Sayuni

ditenda wanhu kuikwala,

dibwe dija diwatenda wanhu wagwe.

Mbali waja womtogola iyo hopata chinyala mbee."