1 Baho viivikile behi na lusona lwa Pasaka. Yesu kakala yomanya chipindi chake chivika wa kusegela muiisi ino na kuita kwa Tati yake. Nayo kakala na wende mazua gose na wanhu wake weli muiisi, enaa kaweng'ha wende mazua gose mbaka kulava ugima ugima wake. 2 Baho Yesu na waluko wake viwakalile woja ndiya ya chigulogulo, nayo chinyamkela kakala kakomeleza kumgela Yuda Isikaliote mwanage Simoni moyo wihile, ili yadahe kumhinduka Yesu. 3 Kuno Yesu kovimanya kua Tati yake kamwing'ha vose mmakono gage, na ivija kakala yalawile kwa Mulungu na kobwela kwa Mulungu. 4 Baho kasegela kulawa muindia, kavula chivalo chake cha kunze, kasola chivalo chimwenga kaizinga mchigudi. 5 Amala kagida mazi mdibakuli, kasonga kuwasunha migulu Waluko wake na kuihangusa ija migulu kwa chija chitambala chiyavalile. 6 Viyamvikile kwa Simoni Petulo, nayo Petulo kalonga, "Mndewa, ivo! gweye konisunha niye migulu?" 7 Yesu kamwidika, "Gweye huchimanya sambi chinisang'hana, mbali kokimanya hamwande." 8 Petulo kamlongela, "Gweye hunisunha niye magulu mbe!" Yesu kamwidika, "Kama sikusunhile hudaha kuilumba na niye kaidi."

9 Simoni Petulo kalonga, "Mndewa nisunhe, sio magulu tu, mbali na makono na ditwi jangu ivija!"

10 Yesu kamlongela, "Munhu yamalile koga, halondeka kaidi mbali kuisunha magulu iiyeka, manake kamala kunang'hana lukuli lose. Mweye mnang'hana, mbali siwose."

11 Yesu kakala kammanya munhu ija yonda yamuhinduke, iyo mana kalonga, "Mweye mnang'hana mbali siwose."

12 Yesu viyakomeleze kuwasunha magulu na kuvala kaidi valo jake, kabwela haja hayakalile muindiya kawalongela, "Ivo, mgamanya ganiwasang'hanile? 13 Mweye monikema niye Mfundaji na Mndewa, molonga goya kwa vija niye iyo. 14 Ihawa niye iyo Mfundaji na Mndewa wenu niwasunha magulu, na mweye wenyego kwa mwenyego molondeka kuisunha magulu. 15 Kwa vija niye niweng'heni mfano uno, na mweye ivija muisang'hanile kama viniwasang'hanile. 16 Nowalongela, mtumigwa si mkulu kubita Mkulu wake, hebu mtumigwa si mkulu kubita ija yamtumile. 17 Basi yahawa mogamanya gago, mmweda mhagasang'hanila. 18 "Gano ganilonga si kwa mbuli ya mweye wose. Niye niwamanya waja iniwasagule. Mbali mayandiko ga Mulungu golondeka gavikile kama vigalonga, ‘Ija yadile ndiya yangu, kahinduka na kunitoa.’

19 Niwalongela mbuli zino sambi zing'hali kulawilila, zaheza kulawilila mpate kutogola, ‘Niye iyo.’ 20 Nowalongeleni kweli. Yoombokela munhu ija nimtumile konibokela niye, na iyo yonibokela niye kombokela iyo yanhumile.

21 Viyakomeleze kugalonga gago, Yesu kengiligwa fufunhende ng'hani muumoyo wake kalonga, "Nowalongeleni kweli, imwe mmwenu kokwiza kunihinduka!"

22 Baho waluko wake wailola wenyego kuno wapotigwa kuvimanya yalihi yolongeligwa mbuli zino.

23 Mwaluko imwe ija Yesu yeli na wende nayo ng'hani, kakala habehi na Yesu. 24 Basi Simoni Petulo kamwing'ha chilaguso Mndewa yamuuze, "Kolonga kwa mbuli ya nani."

25 Mwaluko ija kuno kamsigamila Yesu na kamuuza, "Mndewa chilongele yelihi yonda yakuhinduke?"

26 Yesu kalonga, "Munhu ija yonda nimwing'he chihande cha mgate chinizanhika mumsuzi, iyo mwenyego." Baho, kakisola chija chihande cha mgate kakizanhika mumsuzi, kamwing'ha Yuda, mwana wa Simoni Isikaliote. 27 Yuda viyakomeleze kubokela chihande icho cha mgate, amala Mwenembago kamwingila. Yesu kamlongela Yuda, "Chuulonda kuchisang'hana, lopola kusang'hana!" 28 Mbali habule munhu hata imwe mmwao mwa waja wakalile mmeza yamanyile habali Yuda kalongeligwa ivo. 29 Kwa vija Yuda kakala mgoga kadi ya sente, wanhu wamwenga watonga kua Yesu kakala yamlongele yakagule vinhu va lusona, hebu kakala yamlongele kalave chochose kwa vikumbi muyega.

30 Baho Yuda viyamalile kubokela chija chihande cha mgate, bahaja kalawa kunze. Na ikala ichilo.

31 Yuda viyasegele, Yesu kalonga, "Sambi Mwana wa Munhu katogoligwa, na Mulungu katogoligwa mgati yake. 32 Yahawa ukulu wa Mulungu ugubuligwa mgati ya Mwana, basi na Mulungu nayo koulagusa ukulu wa Mwana mgati yake mwenyego, na bahaja kotenda ivo.

33 "Wanangu, niye ning'hali na mweye chipindi chiguhi tu. Monizambwila, mbali sambi nowalongeleni gaja niwalongele vilongozi wa Wayahudi, ‘Kuniita niye mweye hamdaha kuita!’

34 Noweng'ha ndagizi ya sambi, muing'he wende, ing'haneni wende wenyego kwa wenyego, kama vinili na wende na mweye. 35 Kama mweye muhaing'ha wende, wanhu wose wovimanya kua mweye mwawaluko wangu.

36 Simoni Petulo kamuuza Yesu, Mndewa koita kulihi? Yesu kamwidika, "Kuniita sambi hudaha kuniwinza, mbali kodaha kuniwinza chipindi icho wokwiza." 37 Petulo kamuuza Mndewa, "Habali sidaha kukuwinza sambi? Nhogola kudanganika kwa mbuli yako!" 38 Yesu kamwidika, "Ivo, Kutogola kweli kudanganika kwa mbuli yangu? Nokulongela kweli, yang'hali nzogolo hanakwika, gweye konibela mala nhatu!"