1 Ivo Pilato kaweng'ha Yesu, na kalagiza yatoigwe mbalati. 2 Nao asikali wazinga kigalama cha miwa wamwika mditwi, na wamvaza valo da kifaume da langi ya zambalau. 3 Wakala wokwela kaidi na kaidi haja hayeli muing'anda ya kifaume wamlamsa, "Mwinyi mfaume wa Wayahudi!" Kuno womtoa kwa mang'hua.

4 Pilato kalawa kunze kaidi, na kawalongela, "Loleni nomlava kunze kumwenu, mdahe kuvimanya kua niye sionile chochose chihile chiyabanange." 5 Baho Yesu kalawa kunze kuno kavala kigalama cha miwa na kanzu da langi ya zambalau. Pilato kawalongela, "Loleni! Munhu wenu ino hano!"

6 Basi waja wakulu wa Walava nhambiko na wamilizi wao viwamonile Yesu, watoa nyangi walonga, "Yawambigwe! Yawambigwe!" Baho Pilato kawalongela, "Msoleni mweye wenyego mkamuwambe mumsalaba, kwa vija niye sionile chochose chihile chiyasang'hane."

7 Wayahudi wamwidika, "Cheye chinayo ndagizi za Musa na kuilinga na ndagizi iyo, ino kolondeka yafe, kwa vija kaitenda kua Mwana wa Mulungu."

8 Pilato viyahulike mbuli iyo kadumba ng'hani. 9 Basi, Pilato kamsola Yesu na kengila nayo mng'anda, na kamuuza Yesu, gweye kulawa kulihi?" Mbali Yesu hedike mbuli yoyose. 10 Baho Pilato kamlongela, "Hulonga na niye? Ivo, huvimanyile kua ninao udaho wa kukulekesa na udaho wa kukuwamba muumsalaba?"

11 Yesu kedika kamlongela,"Uhawilebule udaho kumwangu kama hwing'higwe na Mulungu. Kwa mbuli iyo, ija yanigalile kumwako kana malozo ng'hani.

12 Kulawa baho, Pilato kazambwila nzila ya kumlekesa, mbali Wayahudi watoa nyangi, "Wahamlekesa munhu ino gweye sio mbwigaake Kaisali, chila munhu yoitenda kua mfaume komlema Kaisali!"

13 Baho, Pilato viyehulike mbuli iyo, kamlava Yesu kunze, na kakala mchigoda cha ulamuzi, hanhu hokemigwa, "Lubuga wa dibwe." kwa chiebulania hokemigwa "Gabbata." 14 Nayo dikala zua da kutanda lusona lwa Pasaka, yopata saa sita imisi. Pilato kawalongela Wayahudi, "Mfaume wenu ino hano!"

15 Wao wenula dizi, "Msegeze! Msegeze! Umuwambe! Pilato kawauza, ivo! mwonda nimuwambe mfaume wenu!" wakulu wa Walava nhambiko walonga, "Cheye chabule mfaume ila Kaisali.

16 Baho Pilato kaweng'ha Yesu ili wamuwambe mumsalaba.

Baho, wamsola Yesu. 17 Yesu kaita kuno kaupapa msalaba wake kaita hanu, hokemigwa "Vuha da ditwi" kwa chiebulania hokemigwa Goligota. 18 Wamuwamba uko mumsalaba, hamwe na waja wamwenga waidi, imwe mumsalaba wa ubanzi wa kumoso na imwenga mumsalaba wa ubanzi wa kulume na Yesu kakala hagati yao. 19 Baho Pilato kandika yandiko mchibao keka muumsalaba. Najo dikala jandikigwa vino, "Yesu Mnazaleti, Mfaume wa Wayahudi." 20 Wanhu wengi wadisoma yandiko dija, kwa vija haja yawambigwe Yesu hakala habehi na kae. Kaidi yandiko ijo, jandikigwa kwa Chiebulania na Chilatini na Chigiliki. 21 Ivo, wakulu wa Walava nhambiko wamlongela wamlongela Pilato, "Sekewandike, ‘Mfaume wa Wayahudi, ila ‘Iyo kalonga, Niye ni Mfaume wa Wayahudi.’ "

22 Pilato kamwidika, "Ganyandike nyandika.

23 Nao asikali viwakomelez e kumuwamba Yesu mumsalaba, wasola vivalo vake, wavigola mafungu mane, chila asikali vungu dimwe, ivija wasola na kanzu yake, kanzu iyo ikala ifumigwe na chihande chimwe bila kusonigwa. 24 Baho, asikali waja waitogolela wenyego, "Sekechiidege, ila chiitowele simbi yokuwa ya nani." Mbuli ino isang'hanigwa ili gavikile Mayandiko ga Mulungu golonga,

"Waigolela vivalo vangu,

na kanzu yangu waitowela simbi."

Baho ivo viwasang'hane wao asikali.

25 Habehi na msalaba wake Yesu, wakala wemile mami yake na mkulu wa mami yake yani Malia muke wa Kiliopa, na Malia wa Magidala. 26 Basi Yesu viyamonile mami yake na behi nayo kema ija mwaluko yeli na wende nayo, "Kamlongela mami yake, "Mama! Mlole mwanago ino hano."

27 Amala Yesu kamlongela ija mwaluko, "Mlole mami yako ino hano." Kulawila baho iyo mwaluko kamsola mami yake na kukala nayo ukae yake.

28 Amala Yesu viyamanyile kua gose gakala gavikila, na ili Mayandiko gavikile, kalonga, "Noona ng'hilu."

29 Baho hakala na bakuli dimema siki, baho wachova sifongo muisiki, na kuigela mulumango lwa hi sopo, wamwikila Yesu mumlomo. 30 Basi Yesu viyaibokele ija siki, kalonga, "Gamala!" Amala kainamila kadanganika.

31 Ivo kwavija ikala zua da kuitanda na Zua da kuhumula na kufugama ya Wayahudi, kwavija mitufi sekeikale mumsalaba Zua da kuhumula, manake Zua ijo da kuhumula digwila mchipindi cha zua da Pasaka, Wayahudi wampula Pilato migulu ya wao wawambigwe ibenigwe na mitufi yao isegezigwe mmisalaba. 32 Baho, asikali waita, waibena migulu ya munhu wa mosi na ija wakaidi waja wawambigwe hamwe na Yesu. 33 Mbali viwamvikile ha Yesu wamwona kamala kudanganika, kwaivo hawambenile magulu. 34 Mbali asikali imwe kamhoma na mgoha Yesu mulubavu, na baho damu na mazi vilawa. 35 Ija yaionile mbuli iyo kailonga mbuli iyo ili na mweye mdahe kutogola. Gago gayalongile ni kweli, kaidi iyo kovimanya kua kolonga ukweli. 36 Mbuli iyo ilawila ili Mayandiko gavikile, "Habule hata mvuha wake umwe wonda ubenigwe." 37 Kaidi Mayandiko gamwenga golonga, "Womlola ija iwamuhomile."

38 Baho, Yusufu mwenekae wa Alimataya kampula Pilato ausole lukuli lwa Yesu. Yusufu kakala mwaluko wa Yesu mbali kwa chifiso, manake kakala yowadumba vilongozi wa Wayahudi. Baho, Pilato kamtogolela. Ivo Yusufu kaita kausola lukuli lwa Yesu. 39 Nayo Nikodemo yaitile kwa Yesu ichilo, keza kuno kasola vinhu kama vija manemane na ubani kama kilo salasini. 40 Basi, wausola lukuli lwa Yesu na kuuzinga sitili ya kitani inogile hamwe na vija vinhung'hila kama vigawile mazoela ga Wayahudi viwowanda. 41 Haja hanhu hawamuwambile hakala na konde, na mdikonde ijo hakala na panga da sambi dikala ding'hali hadina wandiligwa munhu.

42 Baho, kwa vija wakala woitanda na zua da kuhumula da Wayahudi,na kwa vija panga ijo dikala habehi, baho wamwika Yesu umo.