1 Viyakomeleze gago, Yesu kakala yogenda yosang'hana sang'hano hanu hano na haja uko Galilaya, manake halondile kuita muisi ya Yudea, kwa vija vilongozi wa Wayahudi wakala wolonda kumkoma. 2 Na lusona wa Wayahudi wa Viheha yani ng'humbukizi ya mahame uko kuluwala ikala yammabehi, 3 ivo ndugu zake Yesu wamlongela, "Segela hano uite Isi ya Yudea ili waluko wako wazione sang'hano yuuzisang'hana. 4 Munhu hasang'hana mbuli mchifiso kama kolonda yamanyike na wanhu. Kwa vija kosang'hana mbuli izo, ivo ilaguse kwa wanhu muiisi. 5 Manake hata ndugu zake hawamtogole.

6 Yesu kawalongela, "Chipindi changu chifaya ching'hali hachinavika, mbali kumwenu mweye chila chipindi chofaya. 7 Wanhu wa muuisi hawadaha kuwehila mweye, mbali konihila niye kwa vija nolonga kweli kua sang'hano zao ziha. 8 Mweye muite muulusona uwo. Mbali niye siita kuulusona uwo kwa vija chipindi changu chifaya hachinavika. 9 Viyakomeleze kulonga gago, kasigala Galilaya ukuja.

10 Ndugu zake viwaitile kulusona wa viheha, Yesu nayo kaita, mbali haitile chila munhu yomuona ila kaita kwa kuibanga. 11 Vilongozi wa Wayahudi wakala womzambwila mulusona Wauza, "Munhu ija kakulihi?"

12 Hakala na minyong'onyo mingi mmabumbila ga wanhu. Wamwenga wolonga, ino "Munhu mtenda goya." Wamwenga wolonga, "Habule, iyo kowagiza wanhu." 13 Hata ivo habule munhu yagezile kulonga mbuli zake hazelu kwa vija kakala kowadumba vilongozi wa Wayahudi.

14 Lusona uwo vuugendelele kusamhuka, Yesu nayo kengila muing'anda ya Mulungu kasonga kufunda. 15 Baho Wayahudi wakanganya na kulonga, "Munhu ino kapataze mafundo nayo hafundigwe?"

16 Ivo Yesu kawedika, "Mafundo ganifunda sio gangu mbali gake iyo yanhumile. 17 Munhu yolonda kusang'hana goyolonda Mulungu, kovimanya kama mafundo gangu golawa kwa Mulungu hebu niye noilongela gangu mwenyego.

18 Munhu yoilongela tu mwenyego koilondela nhogolwa yake mwenyego, mbali munhu yolonda nhogolwa kwa ija yamtumile, iyo ni wakutogoligwa, na mgati yake kabule ubananzi wowose. 19 Ivo, Musa haweng'hile mweye ndagizi? Hata ivo habule imwe mmwenu yaigogile ndagizi ya Musa. Ivo habali molonda kung'homa?"

20 Baho wanhu wamlongela, "Gweye kuna chinyamkela! Yalihi yolonda kukukoma?"

21 Yesu kedika, "Hana uzonza umwe niusang'hane na mweye mose mkanganya.

22 Musa kaweng'heni mazoela ga kwingiza kumbi. Sio kua mazoela gago galawa kwa Musa mbali kwa wasao zenu. Sambi mweye mokwingiza kumbi munhu Mdizua da kuhumula. 23 Ihawa mweye momwingiza kumbi munhu Mdizua da kuhumula ili ndagizi ya Musa sekeibenigwe, habali muhiligwa hebu kwa vija nimhonya munhu lukuli lwake wose Mdizua da kuhumula? 24 Mbali seke mlamule mbuli kwa kunze tu mbali laveni ulamuzi bila kumonela munhu."

25 Wanhu wamwenga wa Yelusalemu wakala woiuza, "Ivo ija munhu womzambwila ili wamkome sio ino? 26 Sambi loleni! Kowalonga wanhu hazelu na habule munhu wa kumlongela hata mbuli. Ivo vodahika kua vilongozi wammanya kweli ino iyo Kilisito? 27 Kilisito vonda yeze habule munhu yovimanya hanu hoyolawa mbali cheye chovimanya kuyalawile munhu ino." 28 Baho Yesu viyakalile kofunda haja muing'anda ya Mulungu, kalonga kwa dizi kulu, "Ivo mweye mnimanya hata kunilawile mkumanya? Hata ivo sizile kwa kulonda mwenyego ila kwa ija yanhumile niye iyo waukweli. Mbali hamummanya, 29 mbali niye nimmanya kwa vija nilawa kumwake, na iyo yanhumile." 30 Baho wanhu walonda kumgela mmakono gao, mbali habule munhu yoyose yagezile kumwamha kwa vija saa yake ikala ing'hali hainavika. 31 Wanhu wengi mdibumbila dija wakalile haja wamtogola wakala walonga, "Ivo Kilisito yaheza kodaha kusang'hana vilaguso vikulu kubita viyasang'hane munhu ino?"

32 Mafalisayo wawahulika wanhu wonyong'onya kulongelela mbuli za Yesu. Baho wao hamwe na wakulu wa Walava nhambiko, wawatuma wanhu waite kumgela mmakono. 33 Baho Yesu kalonga, "Ning'hali na mweye chipindi chiguhi, amala nobwela kwa ija yanhumile. 34 Monizambwila mbali hamniona, manake haja hondanikale mweye hamdaha kuvika.

35 Vilongozi wa Wayahudi wolongelela wenyego kwa wenyego, "Munhu ino koitahi, mbaka cheye chipotigwe kumpata? Koita kwa Wayahudi wahanganyike na wagiliki na kuwafunda waja Wagiliki? 36 Manake choni kulonga, "Monizambwila mbali hamniona bahaja hondanili hamdaha kuvika.

37 Mdizua da chikomelezo da lusona, ijo dikala zua diliyeka. Yesu kema kenula dizi kalonga, "Yeli na ng'hilu yeze kumwangu yang'we. 38 Kama vigalonga Mayandiko ga Mulungu, ‘Yoyose ija yonhogola niye, nzasa za mazi gaugima gokilima muumoyo wake.’ " 39 Yesu kalonga ivo mbuli ya Muhe wa Mulungu kua wanhu womtogola yeye wombokela. Chipindi icho Muhe wa Mulungu ukala haunavika, kwa vija iyo Yesu kakala hanatogoligwa.

40 Wanhu wamwenga mwa dija bumbila viwahulike mbuli izo walonga, "Kweli munhu ino iyo ija mlagusi wa Mulungu." 41 Wanhu wamwenga walonga, "Ino ni Kilisito!" Mbali wamwenga wauza, "Ivo, yodahikaze Kilisito kulawa Galilaya? 42 Ivo Mayandiko ga Mulungu hagalonga kua Kilisito koleligwa mulukolo lwa Daudi, na kolawa Betelehemu kae ya Daudi?’ " 43 Baho wanhu weli mdibumbila dija waigola kwa mbuli ya Yesu. 44 Wanhu wamwenga walonda kumgoga, mbali hakalile hata munhu imwe yagezile kumwanha.

45 Amala waja wamilizi wabwela kwa waja wakulu wa Walava nhambiko na Mafalisayo nawo wawauza, "Habali hamumgogile Yesu?"

46 Waja wamilizi wedika na kulonga, "Hambe munhu galu kulonga kama viyolonga munhu ino.

47 Mafalisayo wamuuza, ivo, na mweye mwingizigwa muubozi uwo? 48 Mweye mmona hata imwe mwa vilongozi wa wanhu hebu imwe wa Mafalisayo yamtogole? 49 Mbali bumbila dino da wanhu domtogola munhu iyo, mbali hawazimanyile ndagizi za Musa, ivo wenukiligwa na Mulungu.

50 Imwe mwa Mafalisayo yokemigwa Nikodemu, ija yaitile kwa Yesu ichilo, kawalongela wayage, 51 ivo ndagizi yetu yodaha kumlamula munhu tanhu hawanamtegeleza na kuvimanya kuwa katenda choni?

52 Nao wamuuza, "Na gweye kulawa Galilaya? Baho kalolese Mayandiko ga Mulungu na gweye koona kuwa Galilaya hakaulawa mlagusi wa Mulungu mbe.

53 Baho wose wasegela kila munhu kaita ukae kumwake