1 Amala baho, hakala na lusona wa dini ya Kiyahudi, nayo Yesu kaita Yelusalemu. 2 Uko Yelusalemu behi na lwivi ukemigwa lwivi lwa ng'hondolo, hakala na lamba da mazi dikemigwa kwa Chiebulania Betizata, najo dikala na sanha tano vili na vizanda. 3 Umo muluhelengo wakala watamu wengi watambalale,wanhu hao wakala vipofu na mbetembete na waholole ng'huli wakala wobeta mazi gatibuligwe. 4 Manake hana chipindi na chipindi mtumigwa wa kuulanga kwa Mulungu kakala kohulumuka na kwingila mdilamba na kugatibula mazi. Baho yalongole kwingila mgamazi gatibuligwe kohona utamu wake wose yelinao. 5 Baho hakala na munhu imwe yakalile mtamu kwa milao selasini na minane. 6 Yesu viyamonile iyo munhu kawasa, kuno yovimanya mtamu iyo kakala baho kwa mazua mengi, kamuuza, "Vilihi, konda kuhona?"

7 Ija mtamu kalonga, "Muhenga niye nabule munhu wa kunigela mgamazi gatibuligwe. Kwa vija chila nihageza kwingila, munhu imwenga konilongolela."

8 Yesu kamlongela, "Ima, sola chilago chako ugende." 9 Bahaja mtamu ija kahona, kasola chilago chake kagenda.

Nayo ikala zua da kuhumula da Wayahudi , 10 kwa mbuli iyo, Wayahudi wamlongela ija munhu yahonyigwe, "Lelo ijo zua da kuhumula, ndagizi yolema sekeupape chilago chako."

11 Mbali nayo kawalongela, "Ija munhu yanihonyile, iyo yanongele, ‘Sola chilago ugende.’"

12 Nao wamuuza, "Iyo munhu yakulongele, ‘Sola chilago chako ugende,’ yelihi?"

13 Mbali munhu ija yahonyigwe, hammanyile munhu yamuhonyile, manake Yesu kakala yasegele hanhu haja, kwa vija kakala kaihanganya na wanhu wengi.

14 Hamwande chidogo, Yesu kaiting'hana na munhu ija yahonyigwe Muing'anda ya Mulungu, kamlongela, "Sambi kuhona, seke usang'hane malozo kaidi, kwa vija kodaha kupata dihile ng'hani kubita ijo."

15 Munhu ija kaita na kuwalongela waja vilongozi wa Wayahudi kua Yesu iyo yamhonyile. 16 Kwa vija Yesu kasang'hana mbuli iyo mdizua da kuhumula, Ivo baho Wayahudi wasonga kumgaza. 17 Baho Yesu kawalongela, Tati yangu kosang'hana sang'hano mbaka sambi, na niye nosang'hana ivija.

18 Mbuli zino ziwehila ng'hani vilongozi wa Wayahudi. Baho watonga chila nzila ya kumkoma Yesu, si kwa vija, kakala yabanange ijo zua da kuhumula, mbali ivija kamkema Mulungu kua Tati yake, kwambuli iyo koilinga na Mulungu.

19 Yesu kawalongela, "Nowalongeleni kweli, Mwana hadaha kusang'hana mbuli yoyose yaiyeka, mbaka yamwone Tati yake choosang'hana, kwa vija jojose Tata yodisang'hana, Mwana nayo kosang'hana ivo." 20 Tata kamtogola Mwana, na kumlagusila chila chinhu choyosang'hana yeye mwenyego, kaidi komlagusila mbuli ng'hulu kubita zino, na mweye mokanganya. 21 Manake kama vija Tata viwowazilibule wafile na kuweng'ha ugima, ivija nayo Mwana koweng'ha ugima waja yowalonda. 22 Tata hamlamula munhu yoyose, mbali mbuli yose ya kulamula kamwing'ha Mwana, 23 ili wanhu wose wamtegeleze Mwana kama viwomtegeleza Tata. Munhu yoyose hamtegeleze Mwana hamtegeleza Tata yamtumile.

24 "Nowalongela kweli, munhu yoyose yohulika usenga wangu, na kumtogola ija yanhumile, kana ugima ulibule uhelelo. Holamuligwa mbe mbali kabita kulawa muifa kengila muugima." 25 Nowalongela kweli, chipindi chokwiza kaidi chivika haja wafile wodihulika dizi da Mwana wa Mulungu, nawo wohulika wokua wagima. 26 Kama vija Tata viyeli chanduso cha ugima, ivija kamwing'ha Mwanage kua chanduso cha ugima. 27 Kaidi kamwing'ha udahi wa kulamula manake iyo Munhu Mulungu yamtumile. 28 "Neke mkanganye mbuli ino manake chipindi chokwiza wose weli mmapanga wodihulika dizi jake. 29 Nawo wozilibuka na waja wasang'hane ganogile wozilibuka na kuwa na ugima ulibule uhelelo na waja wasang'hane ubananzi, wozilibuka na kulamuligwa.

30 "Niye sidaha kusang'hana chinhu chochose kwa udahi wangu mwenyego. Niye nolamula kama vinihulika kulawa kwa Tata, na ulamuzi wangu hauonela munhu. Silonda kusang'hana vinilonda mwenyego, mbali viyolonda ija yanhumile.

31 "Mbali nihailongelela niye mwenyego gaja ganisang'hana, na gaja ganilonga hagatogoligwa kuwa kweli." 32 Mbali kabaho imwenga yozilongelela mbuli zangu na nivimanya kua gose gayalonga kwa mbuli yangu ga kweli. 33 Mweye mtuma wasenga kwa Yohana, nayo kailongelela ija kweli. 34 Niye situmanila wanhu wanilongelele, nolonga mbuli zino ili wanhu wapate kuloholigwa. 35 Yohana kakala kama lumuli lukwaka na kubung'hula, na mweye mukala modeng'helela bung'hulo jake kwa chipindi chidodo. 36 Mbali niye nina dakuilongelela kulu ng'hani kubita da Yohana. Zija sang'hano zinisang'hana, sang'hano ziyaning'hile Tata nizisang'hane, izo zolongelela kua Tata iyo yanhumile. 37 Nayo Tata yanhumile hunilongelela. Mweye hamnadihulika mbe. Hamdihulike mbe dizi jake hebu kulola lumbo jake, hebu kuona chihanga chake, 38 na mweye hamgatogola gaja goyolonga, kwa vija hamumtogole ija yamtumile. 39 Mweye mololesa Mayandiko ga Mulungu kwa kutonga kuwa gowalongoza muugima ulibule uhelelo, mbali Mayandiko gago gonilongelela niye. 40 Hata ivo mweye hamlonda kwiza kumwangu kupata ugima.

41 "Niye silonda kutogoligwa na wanhu mbe. 42 Mbali nowamanya kua mweye mwabule wende wa Mulungu mmiyoyo yenu. 43 Niye niza kwa udaho wa Tataangu, mweye hamnibokele, mbali yaheza munhu imwenga kwa udahi wake mwenyego mombokela. 44 Modahaze kutogola haja mweye wenyego molonda kubokela nhogolwa kulawa kumwenu mweye wenyego, wala hamlonda nhogolwa kulawa kumwake iyo yeli Mulungu yaiyeka? 45 Sekemtonge kua niye nowalongeleza kwa Tata. Musa imumtumainila iyo yonda yawalongeleze. 46 Maza mwahamtogole Musa mwahanitogole na niye ivija, manake Musa kazandika mbuli yangu. 47 Mbali hamgatogole gaja gayandike, basi modahaze kuzitogola usenga wangu.