1 Mdizua da kadatu hakala na zengele uko kae ya Kana, isi ya Galilaya. Mami yake Yesu kakala uko, 2 nayo Yesu kakala yagonekigwe mdizengele hamwe na waluko wake. 3 Divai viimalile, mami yake Yesu kawalongela, "Divai imala." 4 Yesu kamwidika mami yake, "Mami nokupula sekeunongele cha kutenda saa ya kulagusa ukulu wangu ing'hali." 5 Mami yake Yesu kawalongela watumigwa, "Sang'haneni jojose dondayawalongele." 6 Baho hakala na nongo sita za mabwe, zikala zikigwa uko kama viikalile mazoela ga Wayahudi ga kuisunha, chila nongo imwe yodaha kwingila umo mazi ga madebe maidi hebu madatu. 7 Yesu kawalongela, "Zimemezeni mazi nongo izo." Nawo wazimemeza mazi mbaka ndu, 8 labaho kawalongela, "Baho deheni mumgalile mwenezengele." Bahaja wasola, wamgalila. 9 Nayo mwenezengele viyalanzile mazi gaja, katambula kua gageluka divai. Nayo haimanyile divai ija kuilawile, mbali waja watumigwa wake wagalile mazi gaja wavimanya, baho kamkema hamgwazo ija mfunga zengele, 10 kamlongela, "Wanhu wose tanhu wosonga kulava divai inogile, amala wogala ija divai izabuke. Mbali gweye kwika divai ija inogile ng'hani mbaka vino sambi!"

11 Uwo ukala ulaguso wa mosi uyatendile Yesu uko kae ya Kana isi ya Galilaya, baho Yesu kaulagusa ukulu wake na Waluko wake wamtogola. 12 Viyakomeleze gago, Yesu kahulumuka hamwe na mami yake na ndugu zake na waluko wake waita Kapelenaumu na kukala uko mazua madodo.

13 Behi na zua da lusona lwa Pasaka, ivo Yesu kakwela kuita Yelusalemu. 14 Haja muing'anda ya Mulungu kawavika wanhu wogula ng'ombe na ng'hondolo na njiwa, na wanhu wamwenga wagula sente wakala mzimeza zao. 15 Yesu katenda mbalati ya nzabi, na kawawinga wose kunze kulawa muing'anda ya Mulungu, hamwe na ng'hondolo na ng'ombe zao, kazipwililisa sente za wagula sente na kuzihindula meza zao, 16 kawakomokela waja wakalile wogula njiwa, "Visegezeni vinhu vino hano! Seke muitende ng'anda ya tataangu kama gulilo!" 17 Waja waluko wake wakumbuka mayandiko galongile, "Wende wangu kwa ng'anda yako wong'homa."

18 Wayahudi wamwenga wamwidika wamuuza, "Kodaha kuchilavila ulaguso gani ulaguse kua kunao udahi wa kusang'hana gano?" 19 Yesu kawalongela, "Ibomoleni ng'anda ino ya Mulungu, na niye noizenga kaidi mmazua madatu." 20 Waja wayahudi walonga, "Ng'anda ino ya Mulungu izengigwa kwa milao alubaini na sita. Ivo, gweye koizenga kwa mazua madatu?" 21 Mbali Yesu halongelele ng'anda ya Mulungu mbali kalongelela mbuli ya lukuli lwake. 22 Viyazilibuligwe, waja waluko wake wakumbuka kua Yesu kagalonga gaja, na watogola mayandiko na gaja Yesu gayalongile.

23 Chipindi Yesu viyakalile Yelusalemu muulusona wa Pasaka, wanhu wengi wamtogole waona vilaguso viyatendile. 24 Mbali Yesu hakalile na nhogolwa nao kwa vija kakala kawamanya wose viweli mmioyo yao. 25 Ivija halondile muhnu yoyose yamlongele mbuli za wanhu, kwa vija kagamanya gose gali muumoyo wao.