1 Ikala imitondo zua da mosi da juma, kung'hali ziza, Malia kulawa Magidala kaita kudipanga na kadivika dija dibwe disegezigwa hakwingilila mdipanga. 2 Baho kalopola kukimbila kuita kwa Simoni Petulo na ija mwaluko imwenga yeli na wende nayo, kawalongela, "Wamlava Mndewa mdipanga na hachivimanyile hanhu hawawikile mtufi wake."

3 Baho Petulo na ija mwaluko imwenga waita mbaka kuja kudipanga. 4 Wose waidi wakala wokimbila, mbali ija mwaluko imwenga kakala kokimbila ng'hani kubita Petulo, na kalongola kuvika kudipanga.

5 Viyainamile na kasungulila mgati, kaona sitili tu ziiyanzanza, mbali hengile mgati. 6 Simoni Petulo nayo keza yomuwinza kengila mdipanga umo kaona sitili tu ziiyanzanza, 7 na chija chitambala chiyafungigwe Yesu mditwi. Icho chitambala hachikigwe hamwe na iyo sitili, mbali chikala chiivunyanga na kukala chiiyeka hamgwazo.

8 Amala ija mwaluko yalongole kuvika kudipanga nayo kengila mgati, kalola na katogola. 9 Wakala wang'hali hawanavimanya mayandiko ga Mulungu vigalongile kua ikala yolondeka Yesu yazilibuke kulawa kwa wafile. 10 Ivo, wao waluko wabwela ukae.

11 Malia wa Magidalakakala kema hanze ya panga, yolila. Kuno yang'hali yolila kainama na kusungulila mdipanga 12 kawaona watumigwa wa kwa Mulungu waidi, wavalile vivalo vizelu, wakala haja hautambalazigwe lukuli lwa Yesu, imwe mditwi na wa kaidi hamagulu.

13 Nao watumigwa wa kwa Mulungu wamuuza Malia, "Mama choni chuulilila?" Nayo kawalongela, "Wausegeza mtufi wa Mndewa wangu, na simanyile kuwamwikile!"

14 Viyakomeleze kulonga gago, kahinduka hachisogo kamuona Yesu kema, mbali hammanyile kua iyo Yesu. 15 Yesu kamuuza, "Mama, kolilila choni? Komzambwila nani?" Malia katonga kua iyo ni mwamizi wa konde, kamlongela, "Go mkulu, kama gweye umsegeze, basi nilongele kuuwikile na niye nikausole."

16 Yesu kamlongela, "Maliam!" Nayo Malia kamhindukila Yesu na kamlongela kwa chiebulania, "Labboni!" Manake "Mfundaji."

17 Yesu kamlongela, "Seke unyamhe, ning'hali sinaita kwa Tata. Mbali genda kwa walukolo wangu ukawalongele, noita uchanha kwa Tati yangu na Tati yenu, na Mulungu wangu na Mulungu wenu."

18 Baho Maliam kulawa Magidala kaita kwa waluko wa Yesu na kawalongela, "Nimuona Mndewa," na kua Yesu kakala yamlongele ivo.

19 Ikala ichigulogulo ya zua da mosi da juma. Waluko wakala waiting'hanila hamwe mng'anda, na milwivi ikala zihindigwe kwa vija wawadumba vilongozi wa Wayahudi. Baho Yesu keza kema hagati yao kawalongela,"Utindiwala ukale na mweye." 20 Viyakomeleze kulonga gago, kawalagusila makono gage na lubavu lwake. Waja waluko wake wadeng'helela ng'hani viwamonile Mndewa. 21 Yesu kawalongela kaidi,"Utindiwala ikale na mweye! Kama vija Tata viyanhumile niye, na niye nowatumani mweye." 22 Nayo viyakomeleze kugalonga gago, kawahuvilila mhuzi na kuwalongela, "Bokeleni Muhe wa Mulungu. 23 Mwahawalekesela wanhu malozo gao, walekesiligwa, kama hamuwalekesele wanhu ubananzi wao, wosigala na malozo gao."

24 Tomasi, imwe mwa waja kumi na waidi yokemigwa pacha, hakalile hamwe nao haja Yesu viyawalawile. 25 Baho waja waluko wamwenga wamlongela, "Chimuona Mndewa." Mbali nayo kawalongela, "Kama sina ziona zija ng'hovu za misumali mmakono gake na kugela chidole changu mzing'hovu izo za misumali na makono gangu muulubavu wake sitogola ng'o."

26 Vigabitile mazua manane, waluko wakala hamwe kaidi mja mng'anda, nayo Tomasi kakala hamwe nao. Lwivi ukala uhindigwa, mbali Yesu kengila, kema hagati yao kalonga,"Utindiwala ukale na mweye!" 27 Amala kamlongela Tomasi, "Chigale chidole chako hano na ulole makono gangu, golosa makono gako ugele mulubavu lwangu. Mbali seke uwe munhu yoleka kutogola, mbali uwe wa utogole!"

28 Tomasi kalonga, "Mndewa wangu na Mulungu wangu!"

29 Yesu kamlongela, "Ivo, kutogola kwa vija kuniona? Wokwing'higwa ganogile ga Mulungu waja wose hawanionile mbali watogola."

30 Yesu kasang'hana uzonza mwingi hawaluko wake, mbali hazandikgwe mchitabu chino. 31 Mbali mbuli zino zandikigwa ili mdahe kutogola kua Yesu iyo Kilisito Mwana wa Mulungu, na kwa kumtogola mdahe kua na ugima ulibule uhelelo kwakukala mgati yake.