1 Mafalisayo wahulika kua Yesu kakala kowasang'hana na kowabatiza waluko wengi ng'hani kubita Yohana. 2 Mbali Yesu mwenyego hakalile yobatiza ila waluko wake. 3 Baho Yesu viyahulike gago kalawa Yudea kabwela isi ya Galilaya, 4 na muumwanza uwo kalondeka yabitile Samalia. 5 Kavika muikae imwe ya Samalia yokemigwa Sikali, habehi na uja mgunda Yakobo yamwing'hile Mwanage Yusufu. 6 Hanhu haja hakala na chisima cha Yakobo, Nayo Yesu kakala yalegele kwa mbuli ya mwanza uwo, kakala mumgwazo ya chisima. Ikala yovika saa sita imisi.

7 Mwanachike imwe Msamalia keza kudeha mazi, Yesu kamlongela, "Ning'he mazi ning'we." 8 Chipindi icho waluko wake wakala waitile ku ikae kugula ndiya.

9 Mbali ija mwanachike kamlongela, "Gweye Myahudi na niye Msamalia, yodahikaze unipule mazi ga kung'wa?" Wayahudi hawailumbayokwing'ha hamwe mazi mchikombe hebu bakuli.

10 Yesu kedika kawalongela, "Kama wahamanyile gweko daMulungu, nayo iyo nani yokulongele, ‘Ning'he mazi ning'we,’ gweye wahampulile iyo, nayo yahakwing'hile mazi yokusang'hana ukale na ugima ulibule uhelelo." 11 Ija mwana chike kedika, "Mndewa, gweye kwabule da kudehela mazi mchisima chino chitali. Gago mazi ga ugima ulibule uhelelo kogapataze?" 12 Hebu gweye koitenda kwa mkulu kubita tata yetu Yakobo? Yaching'hile chisima chino, nayo mwenyego na wanage na wanyama wake wofugigwa wang'wa mazi ga chisima chino.

13 Yesu kamwidika, "Yoyose yong'wa mazi gano koona ng'hilu kaidi, 14 "Mbali yoyose yong'wa mazi ganimwing'ha niye, haona ng'hilu mbe. Mazi yonda nimwing'he mgati yake kolava nzasa ya mazi gaugima na kumwing'ha ugima ulibule uhelelo."

15 Ija mwanachike kamlongela, "Mndewa, chonde chonde ning'he gago mazi ili sekemhate ng'hilu kaidi na ivija sekenize kaidi hano kudeha mazi."

16 Yesu kamlongela, "Genda kamkeme mulume wako, wize nayo hano."

17 Ija mwanachike kalonga, "Nabule mulume." Yesu kamlongela, "Kulonga goya vuulongile kwabule mulume. 18 Manake kukala na walume watano na iyo mulume ulinayo sambi sio mulume wako baho kulonga kweli!"

19 Ija mwanachike kamlongela, "Mndewa, noona gweye iyo mlagusi wa Mulungu. 20 "Wasao wetu kulawa Samalia wamfugamila muulugongo uno, mbali mweye Wayahudi mwolonga kwa kumfugamila Mulungu ni kuja Yelusalemu."

21 Yesu kamlongela, "Gweye mwanachike, nhogolele, wokwiza msimo honda mdahe kumfugamila Tata mulugongo uno, hebu uko Yelusalemu. 22 Mweye Wasamalia mofugamila chinhu hamchimanyile. Mbali cheye Wayahudi chomfugamila Mulungu chimanyile kwa vija ulohozi wolawa kwa Wayahudi. 23 Mbali chipindi chokwiza, kaidi chimala kuvika, wanhu womfugamila Tata kweli kwa kulongozigwa na muhe na kweli. Wanhu wofugama kama vino, iyo yowazambwila Tata. 24 Mulungu ni Muhe na wose womfugamila wolondeka kumfugamila Muumuhe wa Mulungu na kweli."

25 Ija mwanachike kamlongela, "Novimanya kua Mesia yokemigwa Kilisito kokwiza. Iyo yaheza, kochilongela mbuli zose."

26 Yesu kamlongela, "Iyo yoolonga nayo, iyo niye."

27 Baho waja waluko wake wabwela na wakanganya ng'hani kumwona kolonga na ija mwanachike. Mbali habule yamuuzile, "Kolonda choni kumwake?" Hebu "Habali kolonga na mwanachike?"

28 Amala mwanachike ija kaileka nongo yake, kabwela kuikae na kuwalongela wanhu,

29 "Izoni mlole munhu yanongele chila chinhu chinisang'hane." Ivo, yodahika kua ino iyo Kilisito?" 30 Baho wanhu walawa muikae wamuitila Yesu.

31 Chipindi ichija waluko wake wakala wompula Yesu wamlongela, "Mfundaji, diya walau chidogo." 32 Mbali Yesu kawalongela, "Niye nna ndiya ija mweye hamuimanyile." 33 Baho waluko wake wailola wasonga kuiuza wenyego, "Ivo hana munhu yoyose yamgalile ndiya?"

34 Yesu kawalongela, "Ndiya yangu iyo ino ni kusang'hana mbuli zinogile za yanhumile kukomeleza sang'hano jake." 35 Mweye molonga, ‘Isigala miezi mine tu, na chipindi cha mlao chovika?’ Mbali niye nowalongeleni inuleni meso genu mlole ija migunda viili tiyali kugoboligwa! 36 Mgobolaji kopata chitumetume chake, na yokunzanya ndiya igoboligwe kwa mbuli ya ugima ulibule uhelelo, ivo mhandaji na mgobolaji wodeng'helela hamwe. 37 Kwa mbuli iyo ulonzi uno ni woolonga, ‘Imwenga kohanda na imwenga kogobola ni kweli. 38 Niye nimtumeni mkagobole ndiya ija hamuihandiye, wamwenga wasang'hana sang'hano, mbali mweye moja ndiya waigaiye wayenu.

39 Wasamalia wengi wa chijiji chija wamtogola kwa mbuli ya ulonzi uyalongile ija mwanachike, "Kanilongela mbuli zose zinisang'hane." 40 Wasamalia wamuitila Yesu, wampula yakale nao, nayo kakala nawo baho mazua maidi.

41 Wanhu wengi ng'hani wamtogola kwa mbuli ya usenga wake, 42 na wamlongela ija mwanachike, "Cheye hachitogola tu kwa mbuli ya usenga wako, cheye wenyego chihulika na chivimanya kua ino iyo kweli mlohozi wa isi zose."

43 Vigabitile mazua maidi, Yesu kalawa baho kaita uko Galilaya. 44 Manake Yesu mwenyego kalonga kua, "Mlagusi wa Mulungu hatogoligwa muiisi yake. 45 Baho viyavikile uko Galilaya, Wagalilaya wambokela, manake nao wakala mulusona wa Pasaka, kwa vija wakala waziona mbuli zose ziyasang'hane Yesu uko Yelusalemu mchipindi cha lusona wa Pasaka.

46 Amala Yesu kabwela kaidi muikae ya Kana isi ya Galilaya hanhu haja hayatendile mazi yageluke kua divai. Hakala na chilongozi imwe wa Silikali yeli na mwana mtamu uko Kapelenaumu. 47 Baho chilongozi iyo viyehulike Yesu kakala kalawa Yudea na kuvika Galilaya, kamuitila na kumpula yaite kumhonya mwanage yakalile mtamu lagalaga. 48 Yesu kamlongela, "Gweye kama huwonile vilaguso na uzonza honda mtogole mbe."

49 Chilongozi ija kamlongela, "Mhenga, nokupula chite kabula mwanangu hanadanganika."

50 Yesu kamlongela, "Genda tu mwanago kahona!"

Mkulu ija katogola ulozi wa Yesu, kasegela. 51 Viyakalile yobwela yang'hali mnzila waiting'hanila wamlongela kua mwanago kahona!"

52 Nayo kawauza saa nyingahi mwana iyo viyahonile, nao wamlongela ikala jana chipindi cha saa saba utamu wa homa uhona. 53 Ivo Tati yake kavimanya kua saa iija yalongiligwe na Yesu kua, "Mwanago kohona." Nayo katogola hamwe nawayage wose.

54 Chino chilaguso cha kaidi chiyasang'hane Yesu viyakalile yolawa Yudea kuita Galilaya.