1 Yesu kalonga, "Nowalongeleni kweli, yoyose kama hengile mdizizi da ng'hondolo kwa kubitila muulwivi, mbali kokwingila kubitila nzila imwenga iyo ni mbavi na mbokaji. 2 Mbali yokwingila muulwivi iyo Msusilaji wa ng'hondolo. 3 Mkaliza lwivi komvugulila, na ng'hondolo wohulika dizi jake, nayo kowakema ng'hondolo chila imwe kwa zina jake, na kuwalava kunze. 4 Yahamala kuwalava wose kunze, yeye huwalongolela nao nghondolo womuwinza kwa vija wodimanya dizi jake. 5 Mbali ng'hondolo hao hawadaha kumuwiza nyambenyambe, mbali womkimbila kwa vija hawaimanya dizi yake.

6 Yesu kawalongela kulinga mbuli kuno, mbali wao hawachimanyile chayalondile kuwalongela.

7 Baho Yesu kalonga nao kaidi, "Nowalongelani kweli, niye ni lwivi lwa ng'hondolo. 8 Waja wose wezile kabula ya niye wabavi na wabokaji, nao ng'hondolo hawawamanya. 9 Niye na lwivi, yokwingila kubitila niye koloholigwa, kokwingila na kulawa na kopata hanhu ha kudila. 10 Mbavi kokwiza kwa mbuli ya kwiba na kukoma na kubananga, mbali niye niza ili mpate ugima ulibule uhelelo, kaidi mukale na ugima ugangamale.

11 "Niye na msusilaji yanogile. Msusilaji yanogile koulava ugima yalinao kwa mbuli ya ng'hondolo wake. 12 Munhu wa chitumetume ija sio msusilaji, na ng'hondolo sio wake, munhu iyo yahamona mbweha kokwiza, kowaleka ng'hondolo na kukimbila, amala mbweha kowagoga ng'hondolo na kuwapwililisa.

13 Munhu hagesa chinhu kwa mbuli ya ng'hondolo kwa vija iyo munhu wa chitumetume tu.

14,15 Niye na msusilaji yanogile. Nowamanya ng'hondolo wangu na ng'holo wangu ivija wonimanya niye, kama vija Tata viyanimanyile niye, na niye vinimmanya Tata. Niye noulava ugima wangu kwa mbuli ya ng'hondolo. 16 Kaidi nina ng'hondolo wamwenga mbali sio wa zizi dino, nao ivija nolondeka kuwagala hanili. Nao wodimanya dizi jangu, baho hokua na bumbila dimwe na msusilaji imwe.

17 Kwambuli ino, "Tati yangu kana wende na niye kwa vija noulava ugima wangu, ili nize kuubokela kaidi. 18 Habule munhu yondaniboke ugima nilinao, mbali noulava kwa vinilonda mwenyego. Nodaha kuulava ugima nilinao ivija nodaha kuubweleza ugima uwo kaidi. Vino ivo Tata viyanilagize kusang'hana.

19 Kwa mbuli zino za Yesu kulawila kaidi Wayahudi kuleka kuitogolela. 20 Wanhu wengi walonga, "Ino kana chinyamkela kaidi kana chichala! Yachoni kumtegeleza?"

21 Wamwenga walonga, "Mbuli zino si za yambule chinyamkela. Ivo, chinyamkela kodaha kuhonya meso vipofu?"

22 Uko Yelusalemu kukala na lusona lwa kuinang'hana kaidi Ng'anda ya Mulungu kwambuli ya Mndewa. Chipindi icho chikala cha mbeho. 23 Nayo Yesu kakala yogenda Muing'anda ya Mulungu haluhelengo lwa Solomoni,

24 baho bumbila da wanhu waikunzanya hamwe na wamuuza, "Kochileka chitonga vino mbaka zua gani? Kama gweye iyo Kilisito chilongele bila kuchifisa.

25 Yesu kawedika, "Niwalongeleni mbali hamtogole. Sang'hano zinisang'hana niye kwa udaho wa Tata yangu zonilongelela niye nani. 26 Mbali mweye hamtogola kwa vija mweye sio ng'hondolo wangu. 27 Ng'hondolo wangu ohulika dizi yangu na niye nowamanya nao woniwinza. 28 Niye noweng'ha ugima ulibule uhelelo, nao hokwaga mbe, na ivija habule munhu yondayawa lava kulawa mmakono yake. 29 Tati yangu yaning'hile wano ni mkulu kubita wose, hebu habule yodaha kuwalawa mmakono gake Tata. 30 Niye na Tati yangu chiilumba.

31 Baho Wayahudi wasola mabwe ili wamtoe. 32 Mbali Yesu kawalongela, "Niye niwasang'hanileni sang'hano nyingi kulawa kwa Tata. Ilihi mwaizo imtendani mnhoe mabwe?

33 Wayahudi wamlongela cheye hachikutoa mabwe kwa sang'hano zinogile uzisang'hane, mbali chokutoa mabwe kwa mbuli ya kumliga Mulungu! Manake kuitenda gweye kwa Mulungu mbali kumbe gweye kwa munhu kama cheye."

34 Yesu kawauza, ivo, "Hayandikigwe mzindagizi zenu kua niye nilonga, ‘Mweye muilinga na Mulungu?’

35 Ihawa Mulungu kawakema waja yaweng'hile usenga wake kua waigala na Mulungu, na cheye chivimanya kua Mayandiko ga Mulungu golonga kweli mazua gose. 36 Ivo, ija Tata yamsimike na kumgala muisi, momlongela, ‘Koliga,’ eti kwa vija nilonga, ‘Niye Mwana wa Mulungu? 37 Kama sizisang'hana sang'hano za Tati yangu, mweye sekemnitogole. 38 Mbali nahazisang'hana, hata kama hamnitogola, basi zitogoleni izo sang'hano ili mvimanye kua Tata kamgati yangu na niye namgati yake."

39 Baho wageza kaidi kumgoga, mbali kawapulusuka mmakono gao.

40 Yesu kaita kaidi kaloka umwambu mwa lwanda lwa Yoludani, hanhu haja Yohana hayakalile kobatiza, nayo kakala uko. 41 Wanhu wengi wamuwinza Yesu walonga, "Yohana hatendile chilaguso chochose, "Mbali gaja gose gayalongile Yohana kwa mbuli ya munhu ino ni ukweli. 42 Wanhu wengi baho wamtogola Yesu.