1 Mazua sita kabula ya lusona lwa Pasaka, Yesu kavika Betania, kwaakalile Lazalo ija yazilibuligwe na Yesu kulawa kwa wafile. 2 Uko wamtandila Yesu ndiya ya chigulogulo, Mata kakala yowasang'hanila. Nayo Lazalo kakala imwe mwa waja wakalile woja hamwe na Yesu.

3 Amala Malia kasola nusu ya lita ya mavuta ya kinhung'hila cha bei ng'hulu ng'hani, kambaka Yesu magulu na kumuhangusa kwa mvili zake. Ng'anda yose imema chinung'hila mavuta gago. 4 Baho Yuda Isikaliote, imwe mwawaluko kumi na waidi ija yonda yamhinduke Yesu kalonga, 5 "Habali hamgagulile gago mavuta kwa chitumetume cha mazua mia cha chibalua wa mzengaji, na sente izo muweng'he vikumbi muyega?"

6 Yuda kalonga ivo, si kwa vija kuwagesa ng'hani vikumbi muyega, mbali kwa vija kakala mgoga kadi, mbali kwa vija kakala mbavi. Mala kwa mala kakala yokwiba kulawa mwaiyo kadi.

7 Mbali Yesu kalonga, "Sekemumgaze mwanachike ino, mlekeleni anitande kwa mbuli ya ifa yangu.

8 Vikumbi muyega mnao mazua gose, mbali hamkala na niye mazua gose."

9 Wayahudi wengi wahulika kua Yesu kakala uko Betania. Ivo, wavika uko sio tu kwa mbuli ya kumuona Yesu, mbali ivija wapate kumwona Lazalo ija yazilibuligwe na Yesu.

10 Ivo wakulu wa Walava nhambiko weka chigwena ivija cha kumkoma Lazalo, 11 kwa mbuli ya Lazalo, Wayahudi wengi wawaleka vilongozi wao na wamtogola Yesu.

12 Na zua da kaidi yake vidivikile, wanhu wengi wezile muulusona uja, wahulika kua Yesu kamnzila kwiza Yelusalem. 13 Baho wasola makwamvi ga mibiki ya mitende, waita kumbokela kuno wenula dizi jao wolonga,"Atogoligwe Mulungu! Kamweda iyo yokwiza kwa zina da Mndewa. Yamwede Mfaume wa Izilaeli!"

14 Nayo Yesu kapata mwana wa mhunda imwe na kakwela kumgongo kama Mayandiko vigalonga.

15 "Nekemdumbe wenekae wa Yelusalem, lola mfaume wenu kokwiza kakwela mwana mhunda! 16 Chipindi icho Waluko wake Yesu hawazimanyile mbuli izo, mbali Yesu viyamalile kwing'higwa nhogolwa, ivo wavimanyile kua gago gakala gandikgwe kwa mbuli yake na wanhu wakala wamtendela iyo. 17 Na waja wakalile hamwe na Yesu viyamkemile Lazalo na kumzilibula, wagendelela kulonga gagaja galawilile. 18 Kwaivo wanhu wengi wambokela, manake wose wahulika kua Yesu kasang'hana chilaguso icho.

19 Ivo Mafalisayo viwaonile gago wailongelela, moona hano hachidaha kusang'hana chochose, kwa vija loleni wanhu wa isi yose womuwinza!"

20 Baho hakala na Wayunani wamwenga mdibumbila da wanhu waitile kuja Yelusalemu kufugama mulusona wa msimo uwo. 21 Baho wagiliki wao waita kwa Filipo, munhu wa Betisaida uko Galilaya, na kulonga, "Go mkulu cholonda kumwona Yesu."

22 Nayo Filipo kaita kumlongela Andelea, nayo Andelea na Filipo wose waidi wamlongela Yesu. 23 Yesu kawedika kawalongela, "Saa ya kutogoligwa Mwana wa Munhu ivika.

24 Nowalongeleni kweli, mhule ya ngano yosigala ivo tu, kama haigwile muulongo na kufa na kota. Ihafa baho yolela mhule nyingi.

25 Wanhu woulonda ugima wao kowagiza na woulema ugima wao muisi ino wowika kwa mbuli ya ugima ulibule uhelelo.

26 Munhu yolonda kunhumikila niye, kolondeka yaniwinze, manake hohose hanili niye, baho na mtumigwa wangu hondayawe. Munhu yoyose yonisang'hanila niye, Tati yangu komtegeleza.

27 Yesu kagendelela kulonga, "Sambi moyo wangu ugwa fufunhende, mmane nilonge choni? Ivo, nilonge, ‘Tata nilohole nilawe mgamadununzo gago?’ habule, kwavija niza ili nidanganike kwa mbuli ya wamwenga. 28 Tata zina jako ditogoligwe. Baho dizi ilonga kulawa kuulanga kwa Mulungu, "Niditogola na noditogola kaidi."

29 Basi dija bumbila da wanhu dikalile hanhu haja, wahulika dizi ija, wamwenga walonga,"Uwo mbumo." Mbali wamwenga walonga, "Iyo mtumigwa wa kuulanga kwa Mulungu kalonga nayo." 30 Mbali Yesu kawalongela, "Ijo dizi imuhulike hailawile kwa mbuli mbali kwambuli yenu. 31 Sambi icho chipindi wanhu wa isi ino kulamuligwa na iyo mkulu wa isi ino kohinduligwa. 32 Niye nihatumbikigwa mumbiki, nowakwega wanhu wose kumwangu. 33 Yesu kagalonga gose kulagusa ni ifa gani yonda yafe.

34 Baho wanhu wengi haho wamwidika, "Cheye cholongiligwa mzindagizi zetu kua Kilisito yasaguligwe na Mulungu kokala mazua gose halibule uhelelo. Gweye kolongaze kua Mwana wa Munhu kolondeka yatumbikigwe mumbiki? Mwana wa Munhu iyo nani?" 35 Amala Yesu kawalongela, "Bung'hulo ding'hali na mweye chipindi chiguhi, gendeni kwa vija mng'hali na ijo bung'hulo ili ziza sekediwavike, manake munhu yotembela mdiziza hakumanya kuyoita. 36 Basi chipindi mnajo bung'hulo ditogoleni ili muwe wanhu wa bung'hulo."

Viyakomeleza kulonga gago Yesu kainenga na kaita kuifisa.

37 Hata kama Yesu kasang'hana uzonza mwingi hamwao, mbali hawamtogole.

38 Ivo usenga uyalongile Isaya mlagusi wa Mulungu uvikila, "Mndewa nani yautogole usenga wetu na udaho wa Mndewa wa kulohola kalagusigwa nani?

39 Ivo hawadahile kutogola manake Isaya kaulonga kaidi.

40 "Mulungu kawatenda sekewalole, kaugela ubozi ubala wao, seke waone kwa meso gao hebu seke wavimanye kwa ubala wao na sekewanihindukile kolonga Mndewa ili mhate kuwahonya."

41 Isaya kalonga usenga uno kwa vija kauona ukulu wa Yesu, na kalonga mbuli zake.

42 Hata ivo vilongozi wengi wa Wayahudi wamtogola Yesu. Mbali kwa mbuli ya Mafalisayo, hawalongile hazelu kwa kudumba kua wobaguligwa Muing'anda ya Kuiting'hanila Wayahudi. 43 Wao walonda kutogoligwa na wanhu kubita kutogoligwa na Mulungu.

44 Amala Yesu kalonga kwa dizi kulu, "Munhu yonitogola niye, hanitogola niye niiyeka, mbali kumtogola ivija yanhumile. 45 Yanionile niye, kamuona ivija ija yanhumile. 46 Niye niza ili wanhu wadimanye bung'hulo dilawa muukweli wa Mulungu ili wose wonitogola niye sekewakale mdiziza da kuleka kuumanya ukweli wa Mulungu. 47 Yoihulika mbuli yangu na hautegeleze niye simulamula, manake sizile kulamula wanhu wa isi, mbali kuwalohola. 48 Munhu ija yonilema na hagogile usenga wangu kanayo wa kumlamula, usenga uja niulongile uwo wonda mlamule mdizua dilibule uhelelo. 49 Manake silongile kwa mbuli yangu mwenyego, mbali Tati yangu yanhumile, iyo yanilagize chilihi cha kulonga na nichilonge vilihi.

50 Na niye nozimanya ndagizi zake ni ugima ulibule uhelelo. Baho niye nolonga gaja tu Tata gayanilagize nigalonge."