1 Zua dimwe Yesu viyakalile kobita kamona munhu imwe yakalile chipofu kulawa viyaleligwe.

2 Waluko wake wamuuza, "Mfundaji, yelihi yeli na malozo, munhu ino hebu Tati na mami yake mbaka yaleligwe chipofu?"

3 Yesu kedika, mbuli ino hailawile kwa malozo gake ino hebu malozo ga tata na mami yake, mbali kaleligwa chipofu ili udaho wa Mulungu uwoneke muugima wake. 4 Cholondeka kusang'hana sang'hano za ija yachitumile ing'hali imisi, kwa vija chilo yokwiza habule munhu yoyose yoodaha kusang'hana sang'hano.

5 Nihawa muuisi ino niye iyo bung'hulo da isi."

6 Viyakomeleze kugalonga gago, katema mate gake hasi, kasang'hana nhope kwa gaja mate gake, amala kasola nhope kamhaka mzing'hope za ija munhu chipofu,

7 amala Yesu kamlongela munhu ija, "Genda kasunhe chihanga chako mdilamba da Siloamu." Zina Siloamu manake yatumigwe. Na ija munhu chipofu, kaita kusunha chihanga chake amala kabwela yolola.

8 Baho wanhu waja wokala behi na ukae yake na wanhu wamwenga wamwonile umwaka yopula, wasonga kuiuza wenyego, ivo, ino sio ija chikumbi muyega yakalile kopula wanhu mnzila? 9 Wamwenga walonga, "Iyo yeye." Wamwenga walonga, "Bule sio ino! mbali waigala." Nayo ija yaakalile chipofu kalonga, "Iyo niye!"

10 Baho wamuuza, "Ilawilaze mbaka sambi kolola?"

11 Nayo kedika, "Munhu imwe yokemigwa Yesu kavunyanga nhope, kanibaka mchihanga amala kanongela, ‘Genda Siloamu kasunhe chihanga chako.’ Baho, niye niita nisunha chihanga na vino sambi nolola."

12 Wamuuza, "Kakulihi munhu iyo?" Munhu ija kalonga, "Mmane!"

13 Amala wamgala munhu ija yakalile chipofu mbaka kwa Mafalisayo. 14 Zua Yesu viyavunyange ija nhope na kumuhonya munhu ija yakalile chipofu dikala zua da kuhumula.

15 Baho Mafalisayo nawo wasonga kumuuza viyahonyigwe. Nayo kawalongela, "Yesu kavunyanga nhope na kunibaka mmameso ivo sambi nolola."

16 Mafalisayo wamwenga walonga, "Munhu ino halawile kwa Mulungu kwa vija hadimanya zua da kuhumula." Wamwenga walonga, "Munhu yeli na malozo kodahaze kutenda chilaguso kama chino?" Baho wasonga kuleka kuitogolela.

17 Wamuuza kaidi munhu ija yakalile chipofu, "Kwa vija iyo kakutenda ulole, na gweye komlongelelaze munhu iyo?" Nayo kawalongela, "Iyo mlagusi wa Mulungu."

18 Vilongozi wa Wayahudi hawatogole kama munhu ija kakala chipofu kulawa viyaleligwe na sambi kolola, mbali hawatogole mbaka viwawakemile tata na mami yake. 19 Baho wawauza tata na mami yake, walonga, "Ivo ino iyo mwanenu yumlonga kaleligwa chipofu? Ivo sambi kapataze kulola?"

20 Tata na mami yake walonga, "Chovimanya kua ino iyo mwanetu na kaleligwa chipofu. 21 Mbali kapataze kulola, hachivimanyile hebu yamfumbule meso hachimmanya. Muuzeni mwenyego, kwa vija iyo ni mkulu na kodaha kuilongela mbuli iyo mwenyego!" 22 Tata na mami yake walonga ivo manake wawadumba waja vilongozi wa Wayahudi kwa vija vilongozi hao wailalika kua, munhu yoyose, yonda yalonge kua Yesu iyo Kilisito kokimiligwa kumfugamila Mulungu Muing'anda ya kuiting'hanila Wayahudi. 23 Iyo mana tata na mami yake walonga, "Iyo mkulu mgima muuzeni mwenyego!"

24 Mala ya kaidi wamkema munhu ija yakalile chipofu na wamlongela, "Mtogole Mulungu kua kolonga ukweli! Kwa vija cheye chovimanya munhu ino kana malozo."

25 Munhu iyo kawedika, "Kama kana malozo niye sivimanya. Mbali chinhu chimwe tu chinimanya, ng'hala chipofu na sambi nolola."

26 Baho wamuuza, "Kakutendendela choni? Kakuhonyaze meso gako?"

27 Munhu iyo kawedika, "Nimala kuwalongela na mweye hamnihulike. Habali molonda kuhulika kaidi? Hebu mweye ivija monda kua waluko wake?" 28 Mbali wao wamliga, "Wamlongela kama gweye iyo mwaluko wake, na cheye iyo waluko wa Musa. 29 Cheye chivimanya kua Mulungu kalonga na Musa, mbali munhu ino hachimanya kuyalawile!"

30 Nayo kawedika kawalongela, "Uno ni uzonza! Mweye hamvimanya kuyalawile, mbali kanihonya meso gangu! 31 Ija yakalile chipofu kalonga, "Chose chovimanya kua Mulungu hawahulika wanhu weli na malozo, mbali Mulungu kumhulika munhu yoyose yomfugamila na kusang'hana goyolonda.

32 Kulawa mwaka muuisi, hachina hulika mbe, munhu yamuhonyile munhu yaleligwe chipofu yadahe kulola. 33 Mbali kama munhu iyo halawile kuulanga kwa Mulungu, wahapotigwe kusang'hana chinhu kama chino."

34 Wao wamwidika, "Gweye kuvumbuka uli mmalonzo, kodahaze kuchifunda cheye?" Baho wamuwinga kulawa muing'anda ya kuiting'hanila Wayahudi.

35 Yesu viyahulike munhu ija yamuhonyile meso kawingigwa kunze, baho viyamting'hane kamuuza, "Ivo gweye komtogola Mwana wa Munhu?" 36 Munhu ija kedika, "Go mkulu, nilongele iyo nani nimtogole!" 37 Yesu kamlongela, "Kumona na yuulonga nayo iyo."

38 Baho munhu ija kalonga, "Nhogola Mndewa!" Kamtumbalila mavindi na kumwinamila mbaka hasi.

39 Yesu kalonga, "Niye niza muno muuisi kulamula, ili vipofu wadahe kuona na waja woona wawe vipofu."

40 Mafalisayo wamwenga wakalile habehi nayo, wazihulika mbuli izo na kumuuza, "Ivo, cheye ivija vipofu?"

41 Yesu kawedika, "Maza mwahawile vipofu, mwahawile bule malozo, mbali sambi mweye molonga, ‘Cheye choona,’ na iyo yolagusa kua mng'hali na ubananzi."