1 Mbali Yesu kaita kuchigongo cha Mizeituni.

2 Igolo yake imitondo kaita kaidi Muikae ya Mulungu, na wanhu wose wakala wamzunguluka, nayo Yesu kasonga kuwafunda. 3 Wafundaji wa ndagizi za Musa na Mafalisayo wamgala kwa Yesu mwanachike imwe yagogigwe ugoni, wamwika haulongozi wao.

4 Baho wamuuza, "Mfundaji, mwanachike ino kagogigwa muugoni. 5 Mzindagizi zetu za Musa yochilagiza kwa mbuli kama ino, mwanachike ino yatoigwe mabwe mbaka yadanganike, na gweye kolongaze? 6 Nao wamuuza mbuli iyo kuno womgeza ili wadahe kumlongeleza. Mbali Yesu kainamila hasi na kwandika kwa chidole haja hasi. 7 Viwagendelele kumuuza ng'hani, nayo Yesu kenuka na kuwalongela, "Kama hana munhu yoyose mmwenu yabule malozo yalongole kumpigisila dibwe." 8 Kainamila kaidi, na kwandika muiisi. 9 Viwahulike mbuli iyo, wasonga kusegela imwe imwe, walongola wavele mbaka Yesu kakala yasigale yaiyeka, na ija mwanachike kema haulongozi hake. 10 Yesu viyenuke kamuuza ija mwanachike, "Mama wakulihi waja wanhu wakulongeleze kumwangu? Ivo, habule hata munhu imwe yakulongele?"

11 Ija mwanachike kalonga, Muhenga habule hata munhu imwe. Nayo Yesu kamlongela, ivija niye sikulamula. Genda zako, na kulawa sambi sekeutende malozo kaidi.

12 Amala Yesu kawalongela kaidi, niye iyo bung'hulo da wanhu wa isi, yoniwinza niye hogenda mdiziza mbe, mbali kokua na bung'hulo da ugima.

13 Mafalisayo wamlongela, "Gweye koilongela mwenyego, kwaivo icho chuuilongela mwenyego hachitogoligwa.

14 Yesu kedika kawalongela, "Hata kama niye noilongela mwenyego, nokimanya chinilonga, kwa vija nokumanya kulihi kunilawile na kulihi kuniita. Mbali mweye hamkumanya kunilawile na hamkumanya kuniita. 15 Mweye momlamula munhu kama wanhu viwalamula, mbali niye simlamula munhu yoyose. 16 Hata nihamlamula munhu, ulamuzi wangu wofaya, kwa vija silamula niiyeka, mbali nolamula hamwe na Tata yanhumile. 17 Mzindazi zenu yandikigwa kua, galongigwe wa wanhu waidi gotogoligwa. 18 Niye noilongela mwenyego, nayo Tata yanhumile, konilongelela ivija.

19 Baho wamuuza, "Tati yako kakulihi?" Yesu kawedika, "Mweye hamnimanya niye, kama mhanimanyile nie mhammanyile na Tati yangu ivija."

20 Yesu kakala kofunda gago viyakalile yofunda Haing'anda ya Mulungu behi na sanduku da kwikila nhosa, na ivija hawamvikile munhu yamgogile kwa vija saa yake ikala ing'hali kuvika.

21 Yesu kawalongela kaidi, "Niye nosegela, na mweye monizambwila na mofa mmalozo genu. Kuja kuniita niye mweye hamdaha kuvika."

22 Baho vilongozi wa Wayahudi waiuza, ‘Ivo, koita koikoma? Habali kalonga kuniita mweye hamdaha kwiza?"

23 Yesu kawalongela, "Mweye molawa bahano hasi muiisi na niye nilawa kuulanga kwa Mulungu. Mweye mwawaisi ino, na niye sio wa isi ino. 24 Iyo mana niwalongeleni mweye mofa mmalozo genu, na mofa mmalozo genu kama hamtogola kua, "Niye iyo nilongigwe."

25 Nao wamuuza, "Gweye iyo nani?" Yesu kawalongela, "Niwalongeleni kulawa haumwanduso. 26 Ning'hali na mbuli nyingi za kuwalongela na kuwalamula. Mbali ija yanhumile ni mkweli, na niye nowalongela wanhu wa isi gaja tu ganihulike kulawa kumwake."

27 Hawavimanyile kua kakala kowalongela mbuli ya Tata. 28 Amala Yesu kawalongela, "Muhamwinula Mwana wa Munhu mumbiki, ivo monda mvimanye kua, ‘Niye iyo,’ sidaha kusang'hana chochose chinilonda niiyeka, mbali nolonga vija tu Tata viyanifundile. 29 Na iyo yanhumile kahamwe na niye, hananileka niiyeka, kwa vija mmazua gose nosang'hana gaja gayanogeligwa."

30 Wanhu wengi viwahulike Yesu viyalonga gago wamtogola.

31 Ivo Yesu kawalongela waja Wayahudi wamtogole, "Muhayagoga mafundo gangu kweli mokua waluko wangu, 32 moimanya kweli nayo kweli yomwikeni kuilegeha."

33 Nao wamwidika, "Cheye wa ulelo wa Abulahamu," na hachinapata mbe kua watumwa wa munhu yoyose ija. Baho choni kuchilongela, ‘Chokala bila utumwa?"

34 Yesu kawalongela, "Nowalongeleni kweli, chila munhu yotenda malozo iyo mtumwa wa malozo. 35 Mtumwa hakala ukae mazua gose, mbali mwana kokala ukae mazua galibule uhelelo. 36 Ivo Mwana yahamtendani kuilegeha, na mweye moilegeha kweli. 37 Niye novimanya mweye uwo ulelo wa Abulahamu, hata ivo monda kung'homa kwavija mafundo gangu gabule nyafasi mmoyo wenu." 38 Niye nolonga gaja ganionile vinikalile na Tata na mweye ivija mosangang'hana gaja gamuhulike kulawa kwa tati yenu."

39 Nao wamwidika, "Cheye wanage Abulahamu!" Yesu kawalongela, "Mwahawile wana wa Abulahamu, "Mwahasang'hane kama viyasang'hane Abulahamu. 40 Mbali mweye monda kung'homa, munhu niwalongele ukweli uja unihulike kulawa kwa Mulungu, ila Abulahamu hatendile ivo. 41 Mweye mosang'hana mbuli zija ziyasang'hana Tata yenu." Wamwidika, "Cheye hachili wana wa ugoni! China tata imwe tu, iyo Mulungu."

42 Yesu kawalongela, "Mulungu kama yahawile Tata yenu, muhawile nawende naniye, manake niye nilawa kwa iyo Mulungu na vino sambi nabaha. Niye sizile mbe kwa udaho wangu mwenyego, mbali niza kwa udaho wa iyo yanhumile. 43 Habali hamgamanya gano ganilonga? Kwa vija hamgagesa mafundo gangu. 44 Mweye mwa wana wa tata yenu Chinyamkela, na molonda kusang'hana maya za tata yenu. Iyo kakala yokoma kulawa haumwanduso, hadaha kuwimila ukweli, kwa vija ukweli wenyego wa habule mgati yake. Chila viyolonga uvwizi kolonga kama vigali mazoela gake na mwenyego iyo Tata wa uvwizi. 45 Kwavija nolonga ukweli, mweye hamnitogola. 46 Yalihi mmwenu yonda yagangamize kua niye munhu nili na malozo? Kama nowalongela kweli, habali hamtogola vinilonga? 47 Yoyose ija yolawa kwa Mulungu hutegeleza Usenga wa Mulungu, mbali mweye hamtegeleza Usenga wa Mulungu kwavija mweye hamlawa kwa Mulungu.

48 Wayahudi wamuuza Yesu, "Ivo, hachilonga kweli kua gweye Msamalia na kaidi kuna chinyamkela?"

49 Yesu kawedika kalonga, "Niye nabule chinyamkela mbali niye nomtegeleza Tata yangu, na mweye hamnitegeleza. 50 Niye silonda ukulu wangu mwenyego, kabaho imwe yolonilondela ukulu uwo, nayo iyo mlamuzi. 51 Nowalongeleni kweli, munhu yahategeleza mafundo gangu hadanganika mazua gose galibule uhelelo."

52 Wayahudi wamlongela Yesu, "Kweli chivimanya kua gweye kuna chinyamkela. Abulahimu kakala kadanganika, na walagusi ivija wadanganika, na gweye kolonga kua, ‘Yoyose youtegeleza Usenga wangu hadanganika mazua gose.’ 53 Ivo, kotenda kwa mkulu kubita tati yetu Ibulahamu ija yadanganike? Hata Walagusi wa Mulungu wadanganika. Kokwagiza gweye nani?

54 Yesu kawalongela, nahaitogola mwenyego, nhogolwa yangu sio chinhu. Tati yangu iyo yonitogola, ija na mweye molonga Mulungu wenu. 55 Manake mweye hamummanyile mbali niye nimmanya. Kama nihalonga simmanyile, nokua mvwizi kama mweye. Niye nommanya na kusang'hana chiyalonga. 56 Abulahimu tata yenu kavina galigali adione zua jangu nayo kadiona, kadeng'helela."

57 Baho Wayahudi wamuuza, "Gweye hunavika milao hamsini, na gweye kumwona Abulahimu?

58 Yesu kawalongela, "Nowalongela kweli, "Kabula ya Abulahamu hanavumbuka, ‘Niye nabaha.’ "

59 Baho wadondola mabwe weze kumtoa, mbali Yesu kaibanga, kalawa haja haing'anda ya Mulungu.