1 Viyakomeleze gago, Yesu kaloka mbaka umwambu wa lamba da Galilaya hebu lamba da Tibelia. 2 Na bumbila kulu da wanhu dimuwinza, kwa vija wanhu wao waona vilaguso viyasang'hane va kuwahonya watamu. 3 Yesu kakwela kulugongo na kakala hamwe na waluko wake. 4 Chipindi icho lusona lwa Wayahudi ukemigwa Pasaka ukala mmabehi. 5 Baho Yesu viyaonile bumbila kulu da wanhu domuwinza, kamlongela Filipo, "Chigule halihi migate ili wanhu wano waje?" 6 Yesu kamuuza mbuli iyo Filipo kwa kumgeza, kwa vija kakala kakimanya mwenyego chakusang'hana. 7 Filipo kamwidika, "Hata chahawa na sente kwechekweche, havidahika kugula ndiya ya kuwenela wanhu wano wose na chila munhu yabokele chihande chidogo." 8 Mwaluko imwe mwa waja waluko wake, yokemigwa Andelea, wa tata imwe na Simoni Petulo, kamlongela Yesu, 9 "Hano hana mbwanga yali na migate mitano na somba waidi, mbali ino haidaha kuwenela wose." 10 Yesu kalonga, "Walongeleni wanhu wakale hasi." Haja hakala na mayani mengi, baho wanhu waja walume wadile wobita elufu tano. 11 Baho Yesu kaisola ija migate, kamwing'ha Mulungu hewela, na kuwagolela wanhu wose wakalile haja, na katenda ivo kwa waja somba na chila munhu kabokela chija chiyalondile. 12 Wanhu viwegute Yesu kawalongela waluko wake, "Vidondoleni vija vihande va migate mwike hamwe sekevage." 13 Ivo wavidondola vija vihande vose visigale va migate na somba na kumemeza vigelo kumi na vidi. 14 Amala waja wanhu viwaonile chija chilaguso chiyasang'hane Yesu, wasonga kulonga, "Enaa ino iyo ija Mlagusi wa Mulungu yokwiza muuisi!" 15 Yesu viyavimanyile kuwa walonda kwiza kumgoga na kumtenda yawe mfaume wawo, kainega nawo kaita yaiyeka kuja kulugongo.

16 Hadiswele zua, waja waluko wake waita kuja kudilamba, 17 wengila muingalawa wasonga kuloka kuita kae ya Kapelenaumu. Ziza dikala dokwingila na Yesu kakala hanawavikila. 18 Ng'humbi ng'hulu ya mazi ilawila mdilamba kwa vija beho kulu disonga kubumha. 19 Waja waluko wake viwakalile waita behi na kilomita tano hebu sita, wamuwona Yesu kogenda uchanha ya gaja mazi behi na kuivikila ija ngalawa,waja waluko wadumba ng'hani. 20 Mbali Yesu kawalongela, "Sekemdumbe iyo niye." 21 Waitogolela yengile muingalawa, bahaja waona ngalawa ivika umwambu kuja kuwakalile woita.

22 Igolo yake, dija bumbila da wanhu dikalile disigale umwambu mwa lamba wavimanya kua haja hakala na ngalawa imwe tu, na Yesu haitile hamwe na waluko wake, mbali waluko wake wakala waita waiyeka. 23 Ngalawa zimwenga kulawa Tibelia zivika hanhu haja hawadile ija migate haja Yesu viyakomeleze kumwing'ha hewela Mulungu. 24 Baho waja wanhu viwamanyile kua Yesu hawile haja hebu waluko wake. Ivo wengila muingalawa waita mbaka Kapelenaumu kumzambwila Yesu.

25 Viwamvikile Yesu umwambu wa lamba wamuuza, "Mfundaji, kuvika lini hano?" 26 Yesu kawalongela, nowalongeleni kweli, mweye monizambwila sio kwa vija mkala muonile chilaguso, mbali kwa vija mja ija migate na mwiguta. 27 Seke muhunganikile ndiya ija iyola, mbali hunganikileni ndiya ija haimala kwa mbuli ya ugima ulibule uhelelo. Mwana wa Munhu ija Tata yomulongelela komwing'heni ndiya iyo."

28 Baho, wamuuza, "Cholondeka chitendeze ili chidahe kusang'hana sang'hano za Mulungu?" 29 Yesu kawalongela, "Ino iyo sang'hano iyolonda Mulungu muisang'hane, kumtogola ija yamtumile." 30 Ivo wamuuza, chilaguso chilihi chonda uchisang'hane ili chikutogole? Ivija kosang'hana chinhu gani? 31 "Kama viyandikigwe tata zenu waja ndiya yokemigwa mana mchiwala kama Mayandiko vigalonga, ‘Kaweng'ha ndiya kulawa kuchanha kuulanga kwa Mulungu.’ " 32 Amala Yesu kawalogela, "Nowalongeleni kweli, si Musa yamwing'heni ndiya kulawa kuulanga kwa Mulungu, mbali Tataangu iyo yomwing'heni ndiya kulawa kuulanga kwa Mulungu.

33 Manake ndiya ya Mulungu ni ija ahulumuke kulawa kuulanga kwa Mulungu, na kuweng'ha ugima wanhu muuisi.

34 Baho wamlongela, "Mndewa, ching'he ndiya ino mmazua gose."

35 Yesu kawalongela, "Niye iyo ndiya ya ugima. Munhu yokwiza kumwangu, hoona nzala mbe, ivija yonitogola hona ng'hilu mbe. 36 Mbali nowalongela hata kama mmbona mbali hamnitogole. 37 Wanhu wose yoning'ha Tata wokua wajalusona wangu, na niye simwasa kunze mbe yoyose yokwiza kumwangu, 38 kwa vija niye nihulumuka kulawa kuulanga kwa Mulungu si kwa mbuli ya kusang'hana gaja ganilonda, mbali niza kukomeleza gaja gayalonda ija yanhumile. 39 Na gaja gayalonda yanhumile iyo gano, kua sekenimwagize yoyose mwa waja yaning'hile, mbali niwazilibule wose mdizua da uhelelo. 40 Manake chino icho choyolonda Tataangu, chila yomoona Mwana na kumtogola yawe na ugima ulibule uhelelo, na niye nomzilibula mdizua da uhelelo.

41 Baho wayahudi wasonga kumnung'unikila, kwa vija kalonga, "Niye ni ndiya ihulumuke kulawa kuulanga kwa Mulungu." 42 Wakala wolonga, "Ivo ino sio mwanage Yusufu? Chimmanya mami yake na tati yake. Ivo kodahaze kulonga kahulumuka kulawa kuulanga kwa Mulungu?"

43 Yesu kawalongela, "Lekeni kuinung'unikila wenyego kwa wenyego. 44 Habule munhu yonda yeze kumwangu, kama Tata yanhumile hamkwegile kumwangu, na niye nomzilibula muukomelezo wa zua. 45 Mvitabu va walagusi wa Mulungu vandika, ‘Wanhu wose wokuwa wafundigwa na Tata.’ Chila munhu yamuhulike Tata na kuvimanya, kokwiza kumwangu.’ 46 Ino hailagusa kuwa kuna munhu kamuona Tata, mbali ija yalawile kwa Mulungu, iyo iyo yamonile Tata. 47 Nowalongela kweli, iyo yanitogole kana ugima ulibule uhelelo. 48 Niye iyo ndiya ya ugima. 49 Wavele wenu waija ndiya ya mana kuchiwala na wadanganika. 50 Mbali ino iyo ndiya uhulumuke kulawa kulawa kuulanga kwa Mulungu, ili yoyose yonda yaje hadanganika. 51 Niye iyo ndiya ya ugima ihulumuke kulawa kuulanga kwa Mulungu. Munhu yoyose yoja ndiya ino kokala na ugima ulibule uhelelo. Na ndiya inimwing'ha ni lukuli lwangu, niulava kwa mbuli ya ugima wa wanhu muuisi.

52 Baho Wayahudi wasonga kuleka kuitogolela, "Ino kodahaze kuching'ha lukuli lwake chiuje?"

53 Baho Yesu kawalongela, "Nowalongeleni kweli, kama hamuuja uja lukuli lwa Mwana wa Munhu na kuing'wa damu yake, habule ugima mgati yenu. 54 Chila munhu yonda yaje lukuli na kuing'wa damu yangu kanao ugima ulibule uhelelo, na niye nomzilibula mdizua da uhelelo. 55 Manake lukuli lwangu iyo ndiya ya kweli na damu yangu icho chinhu cha kweli cha kung'wa. 56 Munhu youja lukuli lwangu na kung'wa damu yangu, kokala mgati yangu na niye mgati yake. 57 Kama vija Tata yali mgima viyanhumile, na niye nina ugima kwanzila yake, ivija yonija niye kopata ugima kubitila niye. 58 Ivo ino ndiya ihulumuka kulawa kuulanga kwa Mulungu, sio kama ndiya ya mana waidile wasao zenu amala wadanganika. Yoija ndiya ino kokala na ugima ulibule uhelelo." 59 Yesu kalonga gago viyakalile yofunda Muing'anda ya kuiting'hanila Wayahudi kuja Kapelenaumu.

60 Baho wanhu wengi mwawaluko wake viwahulike mbuli ino walonga, "Mafundo gano madala, "Yalihi yodaha kuyatogola?" 61 Yesu viyamanyile kua waluko wake wonung'unika kwa mbuli ya mafundo gake, kawauza, "Ivo habali mbuli ino imulumizeni mmoyo mbaka mleke kutogola? 62 Yokuwaze basi kama mwahamona Mwana wa Munhu yahainuligwa kuita kuja hayakalile haumwanduso? 63 Muhe wa Mulungu iyo yogala ugima, lukuli haudaha chinhu. Mbuli ziniwalongele ni muhe na ugima. 64 Hata ivo baho mmwenu wamwenga wenu hawatogola." Yesu kalonga ivo kwa vija kavimanya kulawa haumwanduso kua welihi hawatogola na yelihi yolonda kumhinduka. 65 Amala kalonga, kwa mbuli iyo niwalongela kua habule munhu yonda yadahe kwiza kumwangu mbaka yadahizigwe na Tati yangu.

66 Kwa ulonzi uwo wajalusona wengi wahinduka chisogo, waleka kuilumba nayo kaidi. 67 Baho Yesu kawauza waja waluko wake kumi na waidi, na mweye ivija molonda kusegela? 68 Simoni Petulo kedika, Mndewa! Chiite kwa yelihi? Gweye iyo uli na usenga wa ugima ulibule uhelelo. 69 Na cheye chitogola na kuvimanya kua gweye iyo Mnang'hana ulawa kwa Mulungu.

70 Yesu kawalongela, "Ivo siwasagule mweye kumi na waidi? hata ivo imwe mmwenu ni Mwenembago! 71 Yesu kalonga gago kwa mbuli ya Yuda, mwanage Simoni Esikaliyote, manake iyo yonda yamuhinduke Yesu, hata ivo kakala imwe mwawaja kumi na waidi.