1 Yesu viyakomeleze kulonga gago, kaita umwambu mwa kizanda cha Kediloni, hamwe na waluko wake. Hanhu haja hakala na konde, nayo Yesu na waluko wake wengila umo. 2 Yuda, ija yamuhinduke Yesu, kahamanya hanu haja kwa vija Yesu kazoela kuiting'hanila na waluko wake haja.

3 Baho Yuda kasola maasikali na wamilizi kulawa kwa wakulu wa Walava nhambiko na Mafalisayo, keza nao kudikonde weli na lumuli na viwenge na migoha. 4 Yesu kuno yovimanya gonda gamlawilile, kawauza, "Momzambwila nani?"

5 Nao wedika, "Yesu Mnazaleti!" Yesu kawalongela, "Iyo niye." Yuda yamuhinduke kakala kema baho hamwe nao. 6 Basi Yesu viyawalongele "Iyo niye," wabwela kukisogo wagwa hasi. 7 Baho Yesu kawauza kaidi, "Momzambwila nani?" Nao wamwidika, "Yesu Mnazaleti!" 8 Yesu kwawalongela, "Niye nimala kuwalongela iyo niye. Ivo, kama monizambwila niye, walekeni wano wasegele." 9 Yesu kalonga gago ili gadahe kuvikila gaja gayalongile, "Tata waja uning'hile simwagize hata imwe." 10 Basi Simoni ija Yesu yamkemile Petulo kakala na panga, kasomola panga na kamkanha gutwi da ubanzi wa kulume mtumigwa wa Mkulu wa nhambiko. Na mtumigwa iyo kakemigwa Maluko. 11 Basi Yesu kamlongela Petulo, "Bweleza panga jako mumvuko wake. Ivo! hailondeka nibitile madununzo gaja Tati yangu kagalonda nigabitile?"

12 Amala ma asikali waja na mkulu wao na wamilizi wa Ng'anda ya Mulungu wamgoga Yesu na wamgela nzabi, 13 mosi wamgala kwa Anasi, nayo Anasi kakala tata mkoi wa Kayafa, ija yakalile mkulu wa Walava nhambiko mlao uja. 14 Na iyo Kayafa iyo yawalongele Wayahudi kua, yolondeka munhu imwe yafe kwa mbuli ya wanhu.

15 Simoni Petulo na mwaluko imwenga wamuwinza Yesu. Na iyo mwaluko imwenga kakala komanyika na mkulu wa Walava nhambiko, ivo kengila hamwe na Yesu haichiambaza cha mkulu wa Walava nhambiko,

16 mbali Petulo kema kunze, behi na lwivi. Ivo ija mwaluko imwenga yamanyike na mkulu wa Walava nhambiko kalawa kunze na kulongela ija mtumwa wa chike mkaliza lwivi, nayo kamwingiza Petulo mng'anda. 17 Iyo mtumwa wa chike mkaliza lwivi kamuuza Petulo, "Ivo, na gweye ivija si imwe mwa waluko wa munhu iyo?" Petulo kedika, "Hambee, sio ni e."

18 Watumigwa na wamilizi wakala wabwinha moto kwa vija hakala na mbeho, wakala wokotela moto. Nayo Petulo kakala kema hamwe nao kuno kokotela moto.

19 Gago vigakalile gogendelela, mkulu wa Walava nhambiko kakala komuuza mbuli ya Yesu na mafundo gake nawaja waluko wake. 20 Yesu kamwidika, "Niye nilonga na chila munhu mazua gose bila kifiso. Mala zose nikala nofunda Mzing'anda za kuiting'hanila Wayahudi na kufugama, ivija Muing'anda ya Mulungu, haja hawaiting'hanila Wayahudi wose, na nilonga chila chinhu hazelu. 21 Habali koniuza niye? Wauze wanhu wanihulike chinhu gani chiniwalongele, wao wochimanya chiniwalongele.

22 Yesu viyamalile kulonga gago, mmilizi imwe yakalile kema baho, kamtoa Yesu ng'hua yolonga, "Gweye ivo umwidika mkulu wa Walava nhambiko?

23 Baho Yesu kamwidika, kama nilonga vihile, lagusa chinibanange, mbali kama nilonga goya, konhoela choni? 24 Ivo Anasi kamgala Yesu kuno yafungigwe nzabi kwa Kayafa mkulu wa Walava nhambiko.

25 Baho Petulo kakala baho kokotela moto. Ivo wamuuza, "Na gweye ivija si imwe mwamwaluko wake?" Petulo kabela na kulonga, "Habule, nie sio." 26 Baho, imwe wa waja watumigwa wa mkulu wa Walava nhambiko yakalile mbwiga wa ija munhu yakan'higwe gutwi na Petulo, "Kauza, ivo niye sikuonile mdikonde vuukalile hamwe nayo?" 27 Petulo kabela kaidi, bahaja nzogolo keka.

28 Ivo vilongozi wa Wayahudi wamsola Yesu kulawa kwa Kayafa wamgala mbaka muing'anda ya Kifaume. Iyo ikala imitondo lukwili, nao ili wadahe kuja lusona lwa Pasaka, hawengile mng'anda ya ufaume ili sekewalemigwe kumfugamila Mulungu. 29 Baho Pilato kawawinza kunze na kawalongela, "Munhu ino momlongeleza kwa mbuli gani?"

30 Wamwidika, "Mbali kama munhu ino hawile mbananzi chihalekile kumgala kumwako."

31 Baho, Pilato kawalongela, "Msoleni mweye wenyego mkamlamule kwa kuilinga na ndagizi yenu." Wayahudi wamwidika, "Cheye chabule udaho wa kumkoma munhu yoyose." 32 Isang'hanika ivo ili mbuli ziyalongile Yesu kulagusa kodanganika ifa gani.

33 Baho Pilato kengila kaidi muing'anda ya ufaume, kalagiza wamgale Yesu kumwake na kamuuza, "Ivo eti gweye iyo mfaume wa Wayahudi?"

34 Yesu kamwidika, "Ivo, uno ulonzi wako mwenyego hebu wamwenga wakulongela mbuli zangu?"

35 Pilato nayo kamwidika, "Ivo niye ni Myahudi? Wanhu wa isi yako na Walava nhambiko wakugala kumwangu. Kubananga choni?"

36 Yesu kamwidika,"Ufaume wangu sio wa isi ino. Kama ufaume wangu uhawile wa isi ino, wajalusona wangu wahanigombele seke nigogigwe na Wayahudi. Mbali sambi ufaume wangu sio wa hano!"

37 Amala Pilato kamlongela Yesu, "Ivo gweye ni Mfaume?" Yesu kamwidika, "Gweye kulonga kua niye na Mfaume. Niye nileliligwa kwa mbuli iyo, na kwa mbuli iyo niza muiisi kuwalongela wanhu kwa mbuli ya kweli. Chila munhu yowinza ukweli konitegeleza."

38 Pilato kamlongela,"Ukweli ni chinhu gani?"

Baho Pilato viyamalile kulonga gago kawawinza kaidi Wayahudi kunze, kawalongela, "Niye sikiona chochose kumwake chiyabanange. 39 Mbali mna mazoela ga niye kuwalekesela mfungigwa imwe mchipindi cha Pasaka. Ivo molonda niwalekesele Mfaume wa Wayahudi?" 40 Baho watoa nyangi, "Habule! sio ino, ila Balaba!" Nayo Balaba kakala mbavi.