1 Hakala na kilongozi imwe Myahudi, kakala imwe mwa waja Mafalisayo zina jake Nikodemu, mkulu wa Wayahudi. 2 Mdizua dimwe Nikodemu kaita kwa Yesu ichilo kamlongela, "Labi, chivimanya kua gweye iyo mfundaji yatumigwe na Mulungu, manake habule munhu yonda yasang'hane vilaguso vino yuuvisang'hana, kama Mulungu heli nayo."

3 Yesu kedika kamlongela, "Nokulongela kweli, munhu hadaha kuwona Ufaume wa Mulungu mbaka yavumbuke mala ya kaidi."

4 Nikodemu kamuuza, "Yodahikaze munhu mvele kuvumbuka mala ya kaidi? Kodahaze kwingila muiinda ya mami yake na kuvumbuka kaidi!"

5 Yesu kamlongela, "Nokulongela kweli, munhu kama havumbuke kubitila mazi na muhe wa Mulungu hadaha mbe kwingila Muufaume wa Mulungu. 6 Munhu kovumbuka kilukuli kubitila tata na mami yake, na munhu kovumbuka kimuhe kubitila muhe wa Mulungu. 7 Ivo sekeukanganye vinikulongela kolondeka uvumbuke mala ya kaidi. 8 Mbeho yobuma hohose haulonda, Mbuhmo wake kouhulika vuubuma, mbali hudaha kuumanya kuulawa hebu kuuita. Ivo ivo ili kwa munhu yavumbuke kwa Muhe wa Mulungu."

9 Nikodemo kamuuza, "Mbuli zino zokuwaze?"

10 Yesu kamlongela, Ivo! Gweye iyo mfundaji wa Waizilaeli mbali ung'hali hunazitambula mbuli zino? 11 Nokulongela kweli, cheye chogalonga gaja gachigamanyile na chowalongela gaja gachigaonile, mbali mweye hamutogola usenga wetu. 12 Yahawa niwalongela mbuli za muuisi, mweye hamnitogole, modahaze kunitogola nihawalongela mbuli za kuulanga kwa Mulungu? 13 Labaho habule munhu yoyose yaitile kuulanga kwa Mulungu, mbali Mwana wa Munhu, yahulumuke kulawa kuulanga kwa Mulungu. 14 Kama vija Musa viyemtundike ija nyoka wa shaba mumbiki kuja kuluwala, ivo mwana wa Munhu kolondeka kutundikwa, 15 ili chila munhu yonda yamtogole yakale na ugima ulibule uhelelo. 16 Manake Mulungu kana wende ng'hani na wanhu wa muuisi zose, mbaka kamlava mwanage waiyeka, ili chila munhu yomtogola sekeyage, mbali yapate ugima ulibule uhelelo. 17 Manake, Mulungu hamtumile Mwanage muziisi zose ili yawalamule wanhu weli muziisi, mbali kubitila Mwanage yawakombole. 18 Yomtogola Mwana halamuligwa, ija hamtogole mwana tiyali kamala kulamuligwa, kwa vija hamtogole Mwana wa iyeka wa Mulungu. 19 Na ulamuzi uwo uno, najo bung'hulo diza muziisi mbali wanhu walonda ziza kubita bung'hulo, kwa vija sang'hano zao za ubananzi. 20 Manake chila munhu yosang'hana gehile kodihila bung'hulo, hebu heza mdibung'hulo, manake halonda sang'hano zake za ubananzi sekeumanyike. 21 Mbali iyo yosang'hana za kweli, kokwiza mdibung'hulo ili sang'hano zake zioneke zitendigwa kwa kumtegeleza Mulungu."

22 Vigamalile gago, Yesu na waluko wake waita mbaka isi ya Yudea, nayo kakala uko kwa chipindi chidodo kuno kobatiza wanhu. 23 Yohana nayo kakala kobatiza uko Ainoni behi na Salimu kwa vija uko kukala na mazi gamemile ng'hani. Wanhu wengi wakala woita uko nayo kawabatiza. 24 Ino itendeka kabula Yohana hanageligwa mchifungo. 25 Wakala wolema kuitogolela kati ya waluko wamwenga wa Yohana na Myahudi imwe kwa mbuli ya kutogoligwa kwa kumfugamila Mulungu. 26 Baho waluko waita kwa Yohana wamlongela, "Mfundaji ija munhu yakalile nayo umwambu wa lwanda wa Yoludani, ija yuulongile mbuli zake, sambi nayo kobatiza na wanhu wose womuwinza!" 27 Yohana kawedika kalonga, "Habule munhu yoyose yonda yawe na chinhu mbaka yeng'higwe na Mulungu. 28 Mweye wenyego motogola kua nilonga, ‘Niye sio Kilisito msaguligwa na Mulungu ila nhumigwa ili nimlongolele.’ 29 Mfunga zengele iyo yomsola mhambe. Mbali mbwiga wa mfunga zengele, ija yokwima behi nayo na kutegeleza, kodeng'helela ng'hani yahategeleza dizi da mfunga zengele viyolonga. Kwa mbuli ino ndeng'helelo yangu yenela. 30 Kilisito yasaguligwe na Mulungu kolondeka yatogoligwe ng'hani, na niye nhogolwa yangu ihungule."

31 Iyo yokwiza kulawa kuulanga, iyo mkulu kubita wose. Yolawa muziisi iyo wamuziisi, muziisi kokua uchanha ya gose, yeye yeli wa muziisi iyo wa muziisi, nayo kozilonga mbuli za muziisi. Mbali iyo yokwiza kulawa kuulanga kwa Mulungu, iyo mkulu kubita wose. 32 Iyo kolonga gaja gayaonile na kugahulika, mbali habule munhu yotogola usenga wake. 33 Ivo, munhu yoyose yotogola usenga wake, iyo yogangamiza kua, Mulungu ni kweli. 34 Ija yatumigwe na Mulungu kolonga usenga wa Mulungu, kwa vija Mulungu komwing'ha Muhe wake bila chipimo. 35 Tata kana wende na Mwanage, ivija kamwing'ha vinhu vose mmakono gake. 36 Yomtogola Mwana kana ugima ulibule uhelelo, Ija hamtogola Mwana hopata ugima ulibule uhelelo, mbali kopatigw na ludoko lwa Mulungu.