1 Haumwanduso kabula ya vinhu vose havinalumbigwa hakala na Usenga, na Usenga kakala hamwe na Mulungu, nawo Usenga kakala Mulungu. 2 Nayo Usenga kakala hamwe na Mulungu kulawa haumwanduso.

3 Vinhu vose vilumbigwa kubitila kwa iyo usenga, na bila iyo habule chinhu chochose chilumbigwe. 4 Mgati mwake kukala na ugima, na ugima uno ukala bung'hulo da wanhu. 5 Bung'hulo ijo dobung'hula mdiziza, na ziza hadidahile kudihuma ijo bung'hulo.

6 Hakala na munhu imwe yatumigwe na Mulungu zina jake Yohana, 7 Yohana keza kuwalongela wanhu mbuli ya iyo bung'hulo, ivo wanhu wose wadahe kuhulika usenga na kutogola. 8 Iyo Yohana hakalile iyo bung'hulo, mbali keza yadahe kuwalongela wanhu mbuli iyo bung'hulo. 9 Iyo iyo bung'hulo da kweli, bung'hulo keza muuisi yawabung'hulile wanhu wose.

10 Usenga kakala Muuisi, na vinhu vose vilumbigwa kubitila iyo, mbali wanhu weli muisi hawammanyile. 11 Keza kwa wanhu wake, mbali wanhu wake hawambokele. 12 Mbali waja wambokele na kumtogola, kaweng'ha udaho wa kusang'hanigwa kua wana wa Mulungu. 13 Wano hawapatile udaho wa kuwa wanage Mulungu kwa nzila ya kuleligwa kubitila tata na mami yao, hebu waleligwa wana kwa nzila iyolonda tata, Mulungu mwenyego iyo Tata. 14 Usenga utendigwa lukuli nayo kakala kumwetu, yamemile unovu wa Mulungu na kweli. Chiuna ukulu wake, ukulu kama Mwana waiyeka wa Tata.

15 Yohana kawalongela wanhu mbuli zake, kakala yokwinula dizi yolonga, "Ino iyo ija niwalongele mbuli zake, ‘Kokwiza hachisogo yangu, mbali ni mkulu kubita niye, kwa vija kakala baho kabula ya niye.’"

16 Kwa unovu wake wose wenele cheye chose chibokela unovu wa Mulungu kaidi na kaidi. 17 Kwa vija ndagizi zigaligwa kwa nzila ya Musa, mbali unovu wa Mulungu na kweli ziza kubitila Yesu Kilisito. 18 Habule munhu mbee yapatile kumwona Tata. Mwana yaiyeka yeli behi na Tata, ino iyo yatendile Tata yamanyike.

19 Zino izo mbuli ziyalongile Yohana, chipindi vilongozi wa Wayahudi kuja Yelusalem viwawatumile Walava nhambiko na Walawi ili wamuuze, "Gweye nani?" 20 Yohana halemile kuwedika mbuli iyo, ila kawalongela, "Niye sio Kilisito mlohozi." 21 Baho wamuuza, kwaivo, "Gweye nani? Gweye iyo Eliya?" Yohana kedika, "Hambe sio niye." Wamuuza, "Ivo, Gweye iyo ija mlagusi wa Mulungu yalongigwe kokwiza?" Yohana kedika, "Habule,"

22 Walonga, "Kwaivo chilongele gweye kwa nani," Gweye kolongaze kwa mbuli yako mwenyego? chilongele ili chipate cha kuwalongela waja wachitumile."

23 Yohana kawedika, kama viyalongile mlagusi wa Mulungu Isaya. "Niye ‘iyo ija mlagusi wa Mulungu Isaya yalongile, "Dizi da munhu dokema kuchiwala, igoloseni nzila iyobitila Mndewa!’ " 24 Wanhu wao wakala watumigwe na Mafalisayo, 25 baho wamuuza Yohana, "Kama gweye sio Kilisito, hebu sio Eliya na hebu Mlagusi ija wa Mulungu, habali kobatiza?" 26 Yohana kalonga, "Niye nobatiza kwa mazi, mbali mgati yenu kema ija hamummanyile. 27 Iyo yokwiza hachisogo yangu, niye kumwake sifaya hata kufungula nzabi za makwabazi gake." 28 Mbuli izo zitendeka uko Betania umwambu mwa lwanda wa Yoludani, uko Yohana hayakalile yobatiza.

29 Igolo yake Yohana kamwona Yesu yokwiza hamwande yake, kalonga, "Ino iyo Mwanang'hondolo wa Mulungu yosola malozo ga wanhu wa muuisi! 30 Ino iyo niwalongele mbuli yake nilonga, ‘hachisogo yangu kokwiza munhu hachisogo yangu, mbali iyo ni mkulu kubita niye kwa vija kakala baha kabula ya niye.’ 31 Niye mwenyego ng'hala simmanyile, mbali niza kubatiza wanhu kwa mazi kwa mbuli iyo ili Waizilaeli wammanye."

32 Amala Yohana kalonga vija viyatammanyile Yesu, "Niwona muhe wa Mulungu wohulumuka kulawa kuulanga kwa Mulungu kama hua na kukala uchanha yake. 33 Hata niye simmanyile, mbali iyo yanhumile kubatiza wanhu kwa mazi, iyo yanongele, ‘Uhamwona munhu ija yohulumukiligwa na Muhe wa Mulungu na kukala uchanha yake, iyo iyo yobatiza kwa Muhe wa Mulungu.’ 34 Niye mwenyego niyona mbuli ino na notogola kulonga kua ino iyo Mwana wa Mulungu."

35 Igolo yake Yohana kakala kaidi hanhu haja hamwe na waluko wake waidi, 36 viyamwonile Yesu kobita, kalonga, "Loleni, ino iyo Mwana ng'hondolo wa Mulungu!" 37 Waja waluko waidi viwamuhulike Yohana viyolonga gago, wamuwinza Yesu. 38 Yesu viyageluke kukisogo, kawaona womuwinza, kawauza, "Mozambwila choni?" Wamlongela, "Labi" Manake Mfundaji, "Gweye mfundaji kokala kulihi?" 39 Yesu kedika, "Izoni mlole," Hao waluko wamuwinza, waita waona hanhu haja hayokala, wasinda nayo zua jose, viyawagoneke iyo ikala saa kumi chigulogulo. 40 Andelea, yakalile tata imwe na Simoni Petulo, kakala imwe mwa waja waidi wamhulike Yohana na kumuwinza Yesu. 41 Andelea iyo yalongole kumwona Simoni, wa tata imwe, wamlongela, "Chimuona Masiya Manake, "Yasaguligwe na Mulungu." 42 Amala kamgala Simoni kwa Yesu. Nayo Yesu viyamlolile Simoni kalonga, "Gweye iyo Simoni mwanage Yohana. Sambi kokemigwa Kefa." Kwa kigiliki manake Petulo, yani, "Dibwe kulu."

43 Igolo yake Yesu kalonda kuita Galilaya. Na uko kamvika Filipo na kamlongela, "Niwinze." 44 Nayo Filipo kakala mwenekae wa Betisaida, kae yakina Andelea na Petulo. 45 Filipo kamvika Natanaeli, kamlongela, "Chimvika ija yandikiligwe mbuli zake na Musa mvitabu va ndagizi, na ija walagusi wa Mulungu wandika mbuli zake, yani Yesu mwana wa Yusufu, kulawa kae ya Nazaleti." 46 Natanaeli kamuuza Filipo, ivo, "Yodahika mbuli inogile kulawa Nazaleti?" Filipo kamlongela, "Izo ulole." 47 Haja Yesu viyamonile Natanaeli kokwiza kumwake, kamlongela, "Loleni ino iyo Muizilaeli kweli, kabule gehile mmoyo." 48 Natanaeli kamuuza, "Kunimanyaze?" Yesu kamwidika, "Nikuona kulawa vuukalile hasi hamkuyu, yang'hali Filipo hanakukema." 49 Natanaeli kamlongela, "Mfundaji, gweye iyo Mwana wa Mulungu! Gweye iyo Mfaume wa Izilaeli!" 50 Yesu kedika, kamlongela, "Ivo kunhogola kwa vija nikulongela nikuona vuukalile hasi hamkuyu? Kogaona makulu ng'hani kubita gano." 51 Yesu kagendelela kulonga, "Nowalongeleni kweli, mouona Ulanga wogubuka na watumigwa wa kuulanga kwa Mulungu wokwela na kuhulumuka kuchanha kwambuli ya Mwana wa Munhu."