1 Yesu kawalongela, seke mgwe fufunhende mmoyo. "Mtogoleni Mulungu na mhogole na niye ivija.

2 Muikae ya Tati yangu hana nyafasi ng'hulu ya kukala, maza haiwile ivo nihawalongeleni. Sambi noita kuwatandileni goya nyafasi. 3 Na nihaita kuwatandileni hanhu hakukala, nobwela kuwagala kumwangu, ili hanili niye na mweye mkale. 4 Na mweye movimanya vija va kuita kuja kuniita.

5 Tomasi kamlongela, "Mndewa cheye hachimanyile kuuita, chodahaze kuimanya nzila iyo?"

6 Yesu kamwidika, "Niye iyo nzila, nowalongela wanhu ukweli wa Mulungu na kuweng'ha ugima ulibule uhelelo, munhu heza kwa Tata bila kubitila niye. 7 Mwahanimanya niye, mommanya na Tata ivija, kulawa sambi mommanya, na kaidi mmona.

8 Filipo kamlongela, "Mndewa, chilagusile Tata, yotosha."

9 Yesu kamlongela Filipo, "Nikala na mweye mazua gano gose, na gweye Filipo ung'hali hunimanya niye? Yanionile niye kamona Tata. Ivo kodahaze, kunongela, ‘Chilagusile Tata?’ 10 Ivo, gweye hutogola kama niye namgati ya Tata, nayo Tata kamgati yangu? Mbuli ziniwalongeleni, sizilonga kwa udahi wangu, mbali Tata yeli mgati mwangu iyo yosang'hana sang'hano zake. 11 Molondeka kunhogola kua niye namgati ya Tata na Tata kamgati yangu. Kama hamnitogola, nhogoleni kwa sang'hano zinisang'hana. 12 Nowalongeleni kweli, munhu yonitogola niye, nayo kosang'hana mbuli zose zinisang'hana, enaa, kozisang'hana sang'hano ng'hulu ng'hani kwa vija niye noita kwa Tata. 13 Na mwahapula jojose kama vinilonda nodisang'hana, ili Tata yatogoligwe mgati ya Mwana. 14 Ivija mwahanipula jojose kama vinilonda nomsang'hanileni.

15 "Kama mwahawa na wende na niye, mozitegeleza ndagizi zangu. 16 Na niye nowapulila kwa Tati yangu yaweng'he Mtazi imwenga yakale na mweye mazua gose galibule uhelelo. 17 Iyo ni Muhe wa kweli, wanhu wa isi hawadaha kumbokela kwa vija wanhu hawadaha kumuona hebu kummanya. Mbali mweye mommanya kwa vija kokala na mweye na kamgati yenu.

18 "Niye siwaleka wachiwa, ivo nobwela kaidi kukala na mweye. 19 Ching'hali mazua madodo, wanhu wa muuisi hawaniona niye kaidi, mbali mweye moniona, kwa vija niye namgima na mweye mokua na ugima. 20 Zua ijo dihavika, movimanya kua niye na mgati ya Tata na mweye mokua mgati yangu. 21 Waja wozibokela ndagizi zangu na kuzigoga, wao weli na wende na niye. Nayeli na wende na niye kokwing'higwa wende na Tata yangu, na niye nomwing'ha wende na kuilagusa kumwake. 22 Yuda mbali si ija Isikaliote kamlongela, "Mndewa yodahikaze gweye konda kuilagusa kumwetu na sio kwa wanhu wa isi?" 23 Yesu kalonga, "Waja waning'ha wende nie, wosang'hana gaja ganiwalongela, nayo Tata yangu komwing'ha wende, nie na Tataangu chokwiza kumwao na kukala nao. 24 Munhu yelibule wende na niye hasang'hana kama vinilonda, na usenga umuhulike si wangu, mbali ulawa kumwake Tata ija yanhumile. 25 Niwafunda mbuli zino ng'hali na mweye. 26 Mbali Mtazi ni Muhe wa Mulungu, iyo Tata kamtuma kwa zina jangu, kowafunda chila chinhu na kuwakumbusa gose ganiwalongeleni. 27 "Nowalekeleni utindiwala, enaa, noweng'heni utindiwala wangu. Siweng'heni mweye kama vija wanhu wa isi viwoweng'ha. Sekemdumbe hebu sekemgwae. 28 Mkala mnihulike vinilongile, ‘Nosegela amala nobwela kaidi kumwenu. Kama mwahawile na wende na niye, mwahawile na deng'ho kwa vija noita kwa Tata, manake iyo iyo Mkulu kubita niye. 29 Niwalongeleni gano sambi, gang'hali haganalawilila, ili gaheza kulawilila mwize kutogola. 30 Niye silonga ng'hani na mweye mbuli zino, kwa vija mkulu wa isi ino kokwiza. Iyo kumwangu niye hadaha chinhu, 31 mbali wanhu wa isi wolondeka kuvimanya kua niye ninawende na Tata, iyo mana nosang'hana chila chinhu kama vija Tata viyanilagize. "Haya imeni chisegeleni hano!