1 Amala Yesu kalonga, "Niye iyo mzabibu wa kweli, na Tati yangu iyo mlimi. 2 Chila kwamvi mmwangu dilekile kulela kodisegeza, na chila kwamvi dilela kodidahulila dilele ng'hani. 3 Mweye mmala kunang'hana mmoyo kwavija msunhigwa kwa uja usenga uniwalongeleni. 4 Kaleni mgati yangu kama vinikala mgati yenu. Kama vija kwamvi da mzabibu hadidaha kulela manhunda diiyeka kama hadikalile mdisina, ivija namweye hamdaha kusang'hana vija viyalonda Mulungu kama hamkala mgati yangu. 5 Niye uwo mzabibu na mweye iyo makwamvi. Waja wokala mgati yangu, na niye mgati yao, wao wosang'hana mbuli nyingi ziyalonda Mulungu, manake bila niye mweye hamdaha kusang'hana chochose.

6 Munhu yoyose kama hakalile mgati yangu, kokwasigwa kunze kama kwamvi vijasigwa kunze mbaka donyala. Wanhu hudidondola kwamvi kama ijo na kujasa mmoto dilungule.

7 Mweye mwahakala mgati yangu, na usenga wangu uhakala mgati yenu, puleni jojose dimlonda na mweye mokwing'higwa. 8 Baho Tati yangu kotogoligwa kama muhasang'hana mbuli nyingi ziyalonda Mungu na mweye mokua waluko wangu. 9 Niye nina wende na mweye kama vija Tata viyeli na wende na niye. Kaleni muuwende wangu.

10 Mwahazitegeleza ndagizi zangu, mokala muuwende wangu, kama na niye vinitegeleza ndagizi za Tati yangu na kukala muuwende wake. 11 Niye niwalongeleni mbuli zino ili deng'helelo jangu dikale mgati yenu, na deng'ho jenu jenele. 12 Ino iyo ndagizi yangu, mkale na wende, amala mkale na wende kama vinikalile na wende na mweye. 13 Habule wende mkulu kubita wende wa munhu yolava ugima wake kwa mbuli ya mbwiga zake. 14 Mweye mokua mbwiga zangu mwahazitenda ziniwalagiza. 15 Niye siwakema kaidi watumigwa, kwa vija watumigwa hawavimanya choyosang'hana mkulu wao, mbali niwakema mweye mbwiga zangu, kwa vija nikala niwagubulila mbuli zose zinihulike kulawa kwa Tati yangu. 16 Mweye hamnisagule niye, mbali niye niwasagule mweye na kuwalagiza mukasang'hane gaja goyolonda Mulungu, naizo sang'hano zokala mazua gose, ili jojose monda mumpule Tata kama vija vinilonda, yaweng'he. 17 Na ndagizi yangu iyo ino muwe na wende wenyego kwa wenyego.

18 "Kama wanhu wa isi ino wahawehila mweye, mvimanye kua mng'hali kuhiligwa mweye wanihila niye. 19 Kama mwahawile wanhu wa isi ino, wanhu wa isi wahaweng'heni wende kama wanhu wao. Kwa vija mweye sio wanhu wa isi ino, mbali niye niwasagula kulawa muuisi ino, ino iyo mbuli ya wanhu wa isi kuwehila.

20 Sekemuisemwe mbuli viniwalongeleni, mtumigwa si mkulu kubita mkulu wake. Yahawa wanidununza niye, wowadununza na mweye ivija, kama wategeleza mbuli zangu, wotegeleza na mbuli zenu ivija.

21 Mbali wowasang'hanila gago gose kwavija mweye wajalusona wangu, manake hawamanyile iyo yanhumile. 22 Mbali kama sizile na kuwalongela usenga wa Mulungu, wahalekile kua na malozo, mbali sambi hawadaha kuigombela kua wabule malozo. 23 Munhu yoyose yonihila niye iyo komwihila na Tati yangu ivija. 24 Maza sizisang'hane mbuli zija hagati yao gaja habule munhu imwenga yagasang'hane wahalekile kua na gehile, mbali sambi wagaona nie vinigasang'hane gago wanihila niye na wamwihila na Tata yangu. 25 Iyo mana gaja gandikigwe mzindagizi zao ni kweli.

‘Wanihila bule!’

26 "Yaheza iyo Mtazaji inilonda nimtume kumwenu kulawa kwa Tata, iyo Muhe wa kweli, yolawa kwa Tata, iyo kowalongela kweli yose kwambuli yangu. 27 Na mweye ivija mowalongela wamwenga mbuli zangu kwa vija mukala na niye kulawa haumwanduso.