1 Hakala na munhu imwe yokemigwa Lazalo, mwenekae wa Betania, iyo kakala mtamu. Chijiji cha Betania chikala hanhu hawakalile Malia na Mata mdodo wake. 2 Ino Malia iyo ija yambakile Mndewa mavuta ga chinung'hila ga bei ng'hulu na kumhangusa magulu kwa mvili zake.

3 Baho lumbu zake wamtumila usenga Yesu na kumlongela, "Mndewa mbwigaako mkulu mtamu!"

4 Mbali Yesu viyahulike gago kalonga, "Lazalo hadanganika kwa utamu uno, mbali kwa mbuli ya Mulungu kutogoligwa, kalumwa ili kwa nzila iyo Mwana wa Mulungu yatogoligwe."

5 Yesu kakala na ubwiga mkulu na Mata na Malia na lumbujao Lazalo.

6 Viyapatile usenga kua Lazalo mtamu, Yesu kakala uko kwa mazua maidi kaidi. 7 Vigabitile mazua gago, kawalongela waluko wake, "Aya chiteni kaidi Yudea."

8 Waluko wake wamlongela, "Mfundaji, chipindi chiguhi chibita waja Wayahudi walonda kukukoma kwa mabwe, na gweye konda kubweleganya uko kaidi?"

9 Yesu kedika, "Ivo saa za imisi si masaa kumi na maidi? Baho munhu yahagenda imisi hadaha kuikwala, kwa vija kodiona bung'hulo da isi ino. 10 Mbali kama wanhu wahagenda ichilo woikwala kwa vija habule bung'hulo dakuwabung'hulila."

11 Viyakomeleze kugalonga gago, Yesu kawalongela, "Mbwiga yetu Lazalo kawasa ivo noita kumlamusa."

12 Baho Waluko wake wamlongela, "Mndewa kama kweli munhu iyo kawasa basi kolamka tu."

13 Yesu kakala yolonga mbuli ya ifa ya Lazalo, mbali waluko wake hawavimanyile, wao watonga kua Lazalo kawasa utulo.

14 Ivo Yesu kawalongela bila kufisa kua, "Lazalo kadanganika, 15 mbali nodeng'helela kwa mbuli yenu kwa vija sikalile uko haja Lazalo viyakalile yang'hali kudanganika, ili mdahe kutogola haya chiteni kumwake."

16 Tomaso yokemigwa pacha kawalongela waluko wayage, "Haya na cheye chiteni chikadanganike hamwe na Mndewa!"

17 Yesu viyavikile uko, kavika Lazalo kakala mazua mane gabita kulawa viyawandigwe.

18 Mbali chijiji cha Betania ikala behi na Yelusalemu kama utali wa kilometa nhatu. 19 Wayahudi wengi weza kwa Mata na Malia kuhani kwa ifa ya lumbujao.

20 Ivo Mata viyehulike Yesu kokwiza, kaita kumbokela, mbali Malia kasigala bahaja ukae. 21 Mata kamlongela Yesu, "Mndewa maza ukalile hano, lumbujangu sambi yadanganike. 22 Mbali novimanya kua hata sambi chochose chiumpula Mulungu kokwing'ha.

23 Yesu kamlongela, "Lumbujako kozilibuka."

24 Mata kamwidika, "Novimanya kua kozilibuka chipindi cha uzilibuko zua da uhelelo." 25 Yesu kamlongela, "Niye iyo uzilibuko na ugima. munhu yonda yanitogole niye hata yahadanganika kokua mgima kaidi, 26 na yoyose yeli na ugima na yonhogola niye, hadanganika mbe. Ivo, koditogola dino?"

27 Mata kamlongela,"Enaa, Mndewa nitogola kua gweye iyo Kilisito yasaguligwe na Mulungu, Mwana wa Mulungu, ija yokwiza Muuisi."

28 Mata viyakomeleze kugalonga gago, kaita kumkema Malia mdodo wake na wainega kamlongela, "Mfundaji kabaha, kokukema." 29 Malia viyahulike ulonzi uwo, bahaja kenuka, kaita kwa Yesu. 30 Yesu kakala hanakwingila mchijiji, mbali kakala yang'hali bahaja Mata hayambokele. 31 Baho waja Wayahudi wezile kuhani wakalile ukae hamwe na Malia viwamonile bahaja kenuka na kulawa kunze, wamuwinza. Wagiza koita kuja kudipanga kulilila uko.

32 Na Malia viyavikile hanhu haja hayakalile Yesu, kafugama mafindi, na kumlongela, "Mndewa maza ukalile hano lumbujangu sambi yadanganike!"

33 Yesu viyamonile Malia kolila na waja Wayahudi yezile nawo wolila, kengila giogio na fufunhende mmoyo. 34 Amala Yesu kawauza, "Mmuwanda halihi?" Wamlongela, "Mndewa izo uhalole."

35 Yesu kalila mbaka kalava mahozi. 36 Baho, Wayahudi walonga, "Loleni viyeli na wende nayo!"

37 Mbali wamwenga wauza, "Ivo, ino iyo yamhonyile meso chipofu, nayo hadahile kutenda ino Lazalo sekeyafe?"

38 Baho Yesu kakala na giogio mmoyo wake kaidi, kavika kudipanga. Ijo panga dikala mhango ivija digubikigwa na dibwe. 39 Yesu kalonga, "Disegezeni ijo dibwe." Nayo ija Mata lumbujake yadanganike kamlongela, "Mndewa kasonga kunung'ha, manake kakala mdipanga sambi zua da kane!"

40 Yesu kamlongela Mata, "Ivi sikulongele kua wahatogola kouona ukulu wa Mulungu?" 41 Baho wadisegeza dija dibwe. Yesu kalola kuchanha kuulanga kwa Mulungu kapula kalonga, "Nokwing'ha hewela Tata kwa vija gweye konihulika." 42 Novimanya kua gweye mmazua gose konihulika. Mbali nilonga gano kwa mbuli ya wanhu wali hano ili wadahe kutogola kua gweye iyo unhumile." 43 Viyakomeleze kulonga gago, kamkeka kwa dizi kulu, "Lazalo lawa kunze!" 44 Ija yakalile yadanganike kalawa kunze, kuno kafungigwa mmagulu na mmakono, na mchihanga chake chigubikigwa chitambala. Baho Yesu kawalongela mvuguleni na mlekeni yaite."

45 Ivo, Wayahudi wengi wezile na Malia, viwaonile mbuli iyo iyasang'hane Yesu wamtogola. 46 Mbali wamwenga waita kwa Mafalisayo na kuwalongela mbuli ziyasang'hane Yesu. 47 Kwa ivo waja wakulu wa Walava nhambiko na Mafalisayo wakema chigwena waiuza, "Chitendeze? manake munhu ino kosang'hana vilaguso vingi ng'hani!" 48 Chahamleka yagendelele kusang'hana vilaguso vino, chila munhu komtogola, baho Wakulu wa Loma wokwiza kuchibanangila ukulu kwa mbuli ya Ng'anda ya Mulungu na isi yetu!"

49 Munhu imwe mmwao yokemigwa Kayafa, ija yakalile Mkulu wa nhambiko mlao uwo kalonga, "Mweye hammanya chinhu chochose! 50 Ivo, mweye hamuona yofaya kumwenu munhu imwe yafe kwa mbuli ya wanhu wamwenga, kubita wanhu wa isi yose wakomigwe?" 51 Nayo hailongile mbuli iyo kwa viyolonda mwenyego, mbali kazilonga mbuli izo kama Mkulu wa nhambiko wa mlao uwo. Kakala yagesile kua Yesu kodanganika kwa mbuli ya isi ya Wayahudi, 52 hebu sio kua kodanganika kwa mbuli ya weli Wayahudi waiyeka, mbali kwa mbuli ya wana wa Mulungu wapwililike, ivija yawakunzanye na kuweka hamwe. 53 Ivo kulawa zua ijo waja Vilongozi wa Wayahudi wasonga kuilumba hamwe kulonda kumkoma Yesu. 54 Kwaivo Yesu hagendelele kugenda hazelu kaidi mwa Wayahudi, mbali kainega kaita hanhu hakalile na chiwala, mbaka kae ikemigwa Efulahimu, kakala uko hamwe na Waluko wake.

55 Lusona lwa Wayahudi lwa Pasaka vuukalile habehi, wanhu wengi walawa mzikae zao waita Yelusalemu kuitanda kabula ya lusona uno. 56 Basi wakala womzambwila Yesu, nao viwaikunyanye hamwe Muing'anda ya Mulungu, waiuza, "Moonaze? yooneka kua munhu ino heza kabisa mulusona hebu sio?" 57 Baho wakulu wa nhambiko na Mafalisayo wakala walava malagizo kua munhu yoyose yahamona Yesu kuyeli, yawalongele wakulu ili wamgele mmakono.