1 Yesu kagendelela kulonga, "Niye niwalongeleni gago ili mgangamale sekemuileke nhogola yenu.

2 Wanhu wowawinga mweye mui Ng'anda ya kuiting'hanila Wayahudi na kufugama, kaidi chipindi chokwiza chila yomkomeni mweye kotonga kua komsang'hanila Mulungu.

3 Nao wowatendela gago kwa vija hawammanyile Tata hebu niye.

4 Baho niwalongela mweye mbuli zino, ili saa yake ihavika, sekemuisemwe kua niwalongeleni.

"Niwalongeleni mbuli zino kulawa haumwanduso kwa vija nikala hamwe na mweye. 5 Mbali sambi noita kwa iyo yanhumile, na habule hata munhu yaniuzile, kuniita kulihi? 6 Kwa vija viniwalongele mbuli zino mmema giogio mmoyo. 7 Hata ivo niye nowalongeleni kweli, yofaya ng'hani kumwenu niye nisegele, manake kama nahaleka kuita mtazaji hokwiza kumwenu, mbali nihaiita baho nomtuma kumwenu. 8 Nayo vonda yeze kowagangamizila wanhu wa isi kua wabananga kwa mbuli ya malozo, utogoligwa na ulamuzi wa Mulungu. 9 Wabananga mbuli ya malozo, kwa vija niye hawanitogola, 10 muhe wa Mulungu kowagangamizila kwa mbuli ya kutogoligwa kwangu ha Mulungu, kwa vija noita kwa Tata na mweye hamniona kaidi,

11 na mbuli ya ulamuzi, kwa vija ija Mwenembago iyo Mkulu wa isi ino kamala kulamuligwa.

12 "Ning'hali na mbuli nyingi za kuwalongeleni, mbali sambi hamdaha kufunya moyo.

13 Mbali vonda yeze iyo Muhe wa kweli kowalongoza muikweli yose, manake halonga chinhu kwa udahi wake mwenyego, mbali kogalonga gaja yagahulike kulawa kumwangu na kowalongeleni gaja gonda kwiza. 14 Iyo koning'ha nhogolwa niye kwa vija komulongeni gaja gonda kupata kulawa kumwangu.

15 Vose viyali navo Tata ni vangu, iyo mana nilonga kua uwo Muhe wa Mulungu komulongeleni gaja gose gonda kupata kulawa kumwangu.

16 "Ching'hali chipindi chidodo hamniona, na chahabita chitambo chidodo kaidi moniona. 17 Baho waluko wake wamwenga waiuza, "Manake choni viyachilongela, ‘ching'hali chipindi chidodo moniona na chahabita chipindi chidodo kaidi moniona?’ Kaidi kolonga, ‘kwa vija noita kwa Tata!’ 18 Waja waluko wagendelela kuiuza, "Manake choni viyalonga, ‘Ching'hali chipindi chidodo?’ Hachivimanya kulonga choni." 19 Baho Yesu kavimanya kua wonda wamuuze, baho kawalongela, "Ivo moiuza kwa mbuli ya gaja ganilongile, ‘Ching'hali chipindi chidodo hamniona, na chahabita chipindi chidodo kaidi moniona?’

20 Nowalongeleni kweli, mweye molila na kulombokeza, mbali wanhu wa isi wodeng'helela, mweye mogwa giogio, mbali giogio jenu dohinduka kua ndeng'helelo.

21 Mwanachike yahaibasula kogwa giogio kwa vija saa ya usungu ivika, mbali yahaibasula hakumbuka kaidi usungu uwo kwa mbuli ya ndeng'helelo ya kua munhu kavumbuka muiisi. 22 Mweye ivija mna giogio sambi, mbali nombweleleni kaidi, na mweye momema ndeng'helelo mmoyo, na ndeng'helelo iyo habule munhu yonda yailave kumwenu. 23 Mdizua ijo hamnipula chochose. Nomlongeleni kweli chochose chumumpula Tata komwing'heni kama vinilonda. 24 Mbaka sambi hamnampula chochose kwa udaho wangu. Puleni, na mweye mokwing'higwa ili ndeng'helelo yenu yenele.

25 "Niye niwalongela mbuli zino mchifiso. Mbali chipindi chokwiza silonga na mweye kaidi mchifiso, mbali nowalongeleni bila chifiso kwa mbuli ya Tata. 26 Mdizua ijo mopula kwavija vumnitogola, na siwalongeleni kua nokwiza kumpula Tata kwa mbuli yenu, 27 kwa vija iyo Tata mwenyego kana wende na mweye kwa vija mweye mna wende na niye na mtogola kua ndawa kwa Mulungu.

28 Nilawa kwa Tata kwiza muuisi, na sambi noileka Isi nobwela kwa Tata.

29 Amala Waluko wake walongela,"Onaa, sambi kolonga hazelu kabisa bila kuchifisa.

30 Sambi chovimanya kua gweye kochimanya chila chinhu na hulonda kuuzigwa mbuli na munhu yoyose, kwaivo chitogola kua kolawa kwa Mulungu.

31 Yesu kawedika, Ivo, motogola sambi? 32 Saa yokwiza, na kaidi ivika baho na mweye mose mopwililika chila munhu kobwela kumwake, na niye nolekigwa niliye. Mbali niye siliniiyeka, manake na hamwe na Tata.

33 Niwalongeleni mbuli zino ili mkale kwa utindiwala kwa mbuli kuilumba na niye. Muuisi ino mweye mogaya, mbali gangamaleni, kwa vija niye niuhuma ludabwa lwa ubananzi!"