1 Yesu viyakomeleze kugalonga gago, kalola kuulanga kwa Mulungu kawapulila na kulonga, "Tata, ija saa ivika! Mwing'he Mwanago nhogolwa, nayo Mwanago yakwing'he nhogolwa. 2 Manake kumwing'ha Mwanago udahi mwa wanhu wose ili yaweng'he ugima ulibule uhelelo waja wose umwing'hile. 3 Na ugima ulibule uhelelo uwo uno, wakumanye gweye waiyeka Mulungu wa kweli na kumanya Yesu Kilisito umtumile. 4 Niye nikutogola hano muiisi, nikomeleza ija sang'hano yuning'hile niisang'hane. 5 Na vino sambi, Tata, nhogole hamwako kwa kulagusa ukulu uja ung'halile nao ing'hali isi hainalumbigwa.

6 "Nikutenda umanyike kwa wanhu waja uning'hile kulawa muuisi. Wakala wanhu wako, na gweye kuning'ha wawe wangu, nao wautegeleza usenga wako.

7 Sambi wavimanya kua chila chiuning'hile chilawa kumwako.

8 Niye niwafunda gaja gauning'hile, nao waubokela na wavimanya kweli nilawa kumwako, na watogola kua gweye iyo unhumile.

9 "Nowapulila wao, hebu siwapulila wanhu wa isi, mbali nowapulila waja uning'hile, manake ni wako. 10 Waja wanilinao ni wako, na wako ni wangu, na ukulu wangu wooneka mgati yao wao uning'hile. 11 Sambi nie nokwiza kumwako, nosegela muuisi ino, mbali wao wamuuisi. Tata uliyeka! Nokupula wamile wakale kama vuuli, kaidi wakale hamwe kama cheye vichili hamwe. 12 Vinikalile nao, niye niwakimila goya kama vuulondile. Kaidi niye niwakimila, hebu nabule hata imwe mmwao yagile, mbali kwa ija mwana yagile, ili Mayandiko ga Mulungu gavikile. 13 Ivo sambi nokwiza kumwako, nilonga mbuli zino muuisi, ili wadahe kuilumba vinogile muindeng'helelo yangu. 14 Niye niweng'ha usenga wako, nao wanhu wa isi wawehila kwa vija wao sio wa isi, kama vija niye vinili sio wa isi. 15 Niye sipula uwalave muuisi, mbali nokupula uwakimile kulawa kwa ija Mbananzi. 16 Wao sio wa isi ino, kama nie ivija vinili sio wa isi ino. 17 Wasimike muukweli, na usenga wako iyo ukweli. 18 Kama vija vuunhumile muuisi, na niye ivija niwatuma wao muuisi. 19 Na kwa mbuli yao niye mwenyego noilava ubanzi wako ili wao wamwede, nawao walavigwe wawe wako kubitila kweli.

20 "Niwapulila wao waiyeka, mbali nowapulila na waja wose wonda wanitogole kubitila usenga wao. 21 Nopula ili wose wawe chinhu chimwe. Tata! Nopula wawe mgati yetu, kama vija gweye vuuli mgati yangu na niye mgati yako. Nopula wawe chinhu chimwe ili wanhu wa isi watogole kua gweye iyo unhumile. 22 Niye niweng'ha nhogolwa yuuning'hile niye niweng'ha wao ili wawe chinhu chimwe kama cheye vichili wamwe. 23 Niye nikale mgati yao, na gweye ukale mgati yangu, nopula ili uwagangamize wawe chinhu chimwe, ili wanhu wa isi wavimanye kua gweye iyo unhumile, na kaidi gweye kuna wende nao kama vuuli na wende na niye.

24 "Tata! Nolonda, wao uning'hile wawe hamwe na niye haja hanili, ili wawone uja ukulu wangu uning'hile, kwa vija kukala na wende na niye isi ing'hali hainalumbigwa. 25 Go Tata mtendagoya mazua gose! wanhu wa isi hawakumanyile, mbali niye nokumanya. Wano nao wovimanya kua gweye iyo unhumile. 26 Nikutenda umanyike nao na nogendelela kusang'hana ivo wakumanye, ili wende ulinao kumwangu ukale mgati yao, na niye nikale mgati yao."