As 10 parábolas mais importantes de Jesus

Samaariya teŋ Nivosoŋ la Maɣahir la

25 Nila nila wara-mi’it da dɔɔ zɛ’ɛl yi U mak Yezu. Ka yel yii, <<Pa’ala,>> mam nan iŋ la yela ka nyɛ vom kum ba’ah la?>>

26 Ka U yel u yii, <<Lan n golih dɔ wara la ni? Lan ka i kaan niŋa?>>

27 Ka u lebih yii, <<Nɔŋim i Daan Na’ayen la ni i sũũr zã’ã, ni i sii ni i paŋ ni putẽ’ẽr zã’ã; ka nɔŋ i taraan a aa i mɛŋ la?>>

28 Ka Yezu yel u yii, <<I lebihug la a ntɔɔ, iŋim yela, ka i nan vo?>>

29 Un da bɔɔt yi u te u mɛŋ boot la, u da le bɔ’ɔh Yezu yii, <<Ka ɔn n a mam taraana?>>

30 Yezu lebih yii, <<Buraa n da zɛ’ɛl Geruzalɛm yɛ Geriko, ka da lu naɣayi fããrih nu’uhin, ba da ŋmɛ u ka fã u se’el woo, ka bah u ka u a nan kpi. 31 La da ti mak mi ka Malemadaan dol niŋa yɛ gat, ka un da nyɛ u la, u da lɔk mi keŋ gaat. 32 Yela nɔɔ, ka Levi nir mi da paa ni, nyɛ u ka gaat. 33 Amaa Samaariya teŋ nir mi da paa na nyɛ u, ka zo u nimbɔ̃’ɔ̃g. 34 U da paa u sa’ani zaŋ daam duuh u nɔra la, ka zaŋ kpaam ma' ka bob a somma. U pana da zaŋ u yaɣɛl u boŋ zugu tar u keŋ saam yir, te behit u. 35 Ka beog n da yelig la, u da zaŋ ligiri n a dabiha ayi wɔɔt, te so n behit yir la ka yel u yii, <<Wolim u zugu somma ka man ti leb na n nan wɔ sam-se’er woo ka i nyɛ la.

36 Nirib batã wa poŋi, ba ɔni ka nyɛ tẽ’ẽh yi, u a taraan tet nira ka naɣayiih fã wa?>>

37 <<Ka u yel yii, <<So n zo u nimbɔ̃’ɔ̃g la?>>

Ka Yezu yel u yii, <<Kem ti iŋ yela nɔɔ?>>

4 <<Ya ɔni, n nan tar pihi kɔbig ka kukɔ̃ borig, ka u kun bah pihiwai ni ba wai la sɛ̃ɣir la ni, ka keŋ ti ɛ pese’eog n borig la, hali gur un ti nyɛ ku? 5 Ka un ti nyɛ ku, u kun zaŋ ku buk u bɔɣɔrin ka nyɛɛmit ni popeelum? 6 Ka un ti paa yirin na, u kun bɔɔl u zɔnam ni u kpɛ’ɛh, yet ba yii, nyɛɛm mi nim, ka n nyɛ m pese’eog n daa borig la.> 7 Yela nɔɔ, ka N yet ya wa, popeelum ni nyɛɛma nan zɔ’ɔ tensoŋ yir ha, yelebe’et daan nkɔ̃ n ki’ih u yelebe’et, gaat toonsoma dem pihiwai ni ba wai seba n pu ɛɛt yelebe’et ki’ihugo?>>

Dawɔsa’alig la Maɣahir la

11 Ka Yezu da yel yii, <<Buraa n da be tar dawɔɔ siyi. 12 Ka pit la da yel u ba' la yii, <M ba’a, te m mam se’el n a n vaagir tɔ̃t i laɣara ni nan-nan na.> Ka u ba' la serin da tɔ̃r u laɣat la te ba.

13 Dabiha n da kããl bɛ’ɛla wa la, pit la da dɔɔ kã’ãh se’el woo n a u den, lɔ kateŋ zãã ha, niŋa ka u da puɣulum u laɣara ni yaalug. 14 Ka un da sɔ̃tim ti ba’ah la, kon-nyaliŋ da lu teŋ la ni, ka u da pu le tar se’el la. 15 U da pana keŋ teŋ la nir nkɔ̃ sa’ani yi u tomit tet u, ka u daan da bah ka u it diit tet u kurikurinam. 16 U da ni pana bɔɔt yi u laɣun di kurikurinam diit la; ka so da pu te u wa. 17 Ka un da tẽ’ẽh ki’i ka u putẽ’ẽr tɛɛ la, u da bɔ’ɔh u mɛŋ yii, <Mam ba' ntomirib balɛ n pu dit dii ka ket sakote, ka behum man n ŋwala vibit ni kom! 18 N nan dɔɔ leb m ba' sa’ani, ti yel u yii, <<M ba’a, Mam tom be’em gɛ̃’ɛ̃h Na’ayen ni nyɛ; 19 Mam pu le nar yi ba bɔɔn nim yi i dawɔɔga; tarim a aa i ntomiriba nkɔ̃?>>> 20 Ka u da pana va dɔɔ leb u ba' sa’ani. Ka un da be zãã ken na la, u ba' la da zɛ̃k zugu nyɛ u ka nimbɔ̃’ɔ̃g sããgu; ka u zo to’oh u ti kɔk ka bob u. 21 Ka u dawɔɔ la yel u yii, M ba’a, Mam iŋ taal gɛ̃’ɛ̃h Na’ayen ni nyɛ; Mam pu le nar yi ba bɔɔn nim yi nyɛ dawɔɔga.

22 Ka u ba' la da yel u da’aba la yii, <Kalam, ka ya zaŋ fuug n bɔɔn fuug na yɛɛl u; zaŋ nutoo mi pir u nubil, ni taɣara pir u nɔba. 23 Ka gbã’ã naɣapaalig n kãrig somma na ko, ka ti di ka nyɛɛm; 24 ka n dawɔɔga daa kpi mi ka leb vo’o, u daa borig mi, ka n le nyɛ u!> Ka ba da pĩ’ĩl dit ka nyɛɛmit.

25 Sankãã la wa, u dawɔkpɛɛm la da be la pooŋin ha; ka un da yɛ kun na ti pɔr yir la, u da wom baaŋ ni wa’a. 26 U da bɔɔl da’aba la nkɔ̃ ti bɔ’ɔh se’el n it. 27 Ka u lebih yii, <I sɔ̃’ɔ̃g la kul mi na, ka i ba' ko naɣapaalig n kãrig, un nyaŋ leb u sa’ani na ni nima’ahum la.>

28 Ka u dawɔkpɛɛm la sũũr da dɔɔ ka u zaɣah yi u kun kpɛ̃’ɛ̃. Ka u ba' da yina belemit u. 29 Ka u da lebih u ba' la yii, <Womih maa! Woma wa woo n gaara, mam tomit te i mi a aa da’abir la, m mi pu tabel zaɣah i nɔɔre; ka i pu tabel te mam bobil yi n di ka dɛ’ɛm ni n zɔnama. 30 Ka i dawɔkãã la wa n leb na wa, so' n sãɣam i laɣat yaal ni bompɔɣɔyaalih ha, ka i ko naɣarib-kãt te u!>

31 Ka u ba' la yel u yii, << <N dawɔɔga, nyɛ be ni mam mi saŋa woo, ka se’el woo n a m bon, a la nyɛ mi bon. 32 Ka ti n dit ka nyɛɛmit la, i sɔ̃ɔ̃ga daa kpi mi ka leb vo’o; u daa borig mi ka ti leb nyɛ u.> >>

Farasii nir ni Lempodɛ’ɛhit Maɣahir la

9 U da le mak maɣahir te seba n nam ba mɛŋ yi bam a la kassidem, ka nyɛ seba ka bam a yelebe’et dem la: 10 <<Buraah siyi n da do po’ohug doog la ni yi ba po’oh, nkɔ̃ da a la Farasii nir, ka nkɔ̃ la a lempodɛ’ɛhit. 11 Farasii nir la da zɛ mi, ka po’ohit yii, <Na’ayene, Mam po’oh I zɔ’ɔ zɔ’ɔ yi, mam pu laɣun a aa niribaa la wa: naɣayiih, nivokãha, barih dem, bee poɣun a aa lempodɛ’ɛhaa. 12 Mam loot nɔɔr buyi bakɔ’ɔr woo; N tet pii kɔbig poŋi man tomit nyɛt se’el woo la ni.> 13 Ka lempodɛ’ɛha n da zɛ zãã ha la, pu yaŋ poɣun gɔrig saazugu wole, ka u da ŋmɛ’ɛra u ŋwɔ’ɔg ka yet yii, <Na’ayene, dim suguru te m, man n a yelebe’et daan la!>

14 N yet ya mi wa, burakãã la wa da kul mi ni sũma’ahum gaat ɔ̃ɔ̃ la; seba woo n zɛ̃kit ba mɛh nan nyɛ sirigir, ka seba woo n sirig ba mɛh nan nyɛ zɛ̃kir?>>

Bondaan la ni Lazarɔs Yela

19 Bura-bondaan n da be, ka daar woo ka yɛɛra kparikota ka la mah, ka u dit disoŋ sɔ̃r sɔ̃r. 20 Ka u zanɔrin, nɔndaan, ka u wo’or bɔɔn Lazarɔs da dɔ ni, ka nɔra dɛ’ɛ u ningbina zã’ã, 21 Lazarɔs da maahum mi gur yi u pɛ’ɛl u poor ni dise’et ka na’ab la dit ka la yaamit teŋ la. U da dɔ la niŋa, hali ka baah da tana lɛɛn u nɔra la.

22 Daar da paa mi ka nɔndaan la kpi ka Na’ayen Malekanam zi u keŋ yi u ti be ni Ebraham. Ka bondaan la mi da kpi, ka ba pĩ u. 23 Ba n pĩ u la, ka u keŋ be tenzɛ̃’ɛ̃ug ni, zĩse’e ka la womit u la, u da gɔrig saazugu nyɛ Ebraham zãã ha ka Lazarɔs be u loɣirin. 24 Ka u bɔɔl yii, <Mba Ebraham, dim suguru te m, ka tom Lazarɔs ka u zaŋ u nɔbil tom kɔ’ɔmi, tana tɔk n zɛlemira na ka la iŋ di ma’ahiri; ka m be la buɣum poŋi ka la pu maha.

25 Ka Ebraham yel u yii, <Biiga, tẽr yi ya n daa vo la, nyɛ daa dit la nyaɣahum, ka Lazarɔs daa dit vẽẽha ma’a, ka nan-nan na, u be la ma' ma' niŋa kpela, ka nyɛ mi be vẽẽha ni. 26 Yit yel ãã la wa ni, yam ni tam tinsok, nangɔn-wɔŋir n beŋ, ka so m bɔɔt yi u zɛ’ɛl kpela yak niŋa na, kun tɔ’ɔn iŋe, ka so mi n zɛ’ɛl nila yi u yak kpela na, kun nyaŋe.>

27 Ka bondaan la yel yii, <Ŋwala, M ba’a, N sohit i mi yi i tom Lazarɔs m ba' yir ha, 28 ka n tar sɔ̃’ɔ̃t tinu, u ŋmaagum ba tobir dããl, ka bam mi da ti tã buɣum boo ni na dit vẽẽhaa.>

29 Ka Ebraham lebih yii, <<Ba tar Moozis ni Nɔdɛ’ɛhirib la; ba womihum ban tɔɣum.>

30 Ka u yel yii, <Aai, Mba Ebraham; Ya n tom so ka u zɛ’ɛl kpi’in teŋa keŋ, ba nan ki’ih ba yelebe’et.> 31 Ka u yel u yii, <bam pu womih Moozis ni Nɔdɛ’ɛhirib laa, ba kun womih so’o, hali ni un poɣun yi kpi’in teŋa keŋe.> >>