1 Yezu N da tɔɣɔ te nirib la ba'ah la, U da keŋ la Kapanaum teŋ. 2 Niŋa, soogɛ kpɛ'ɛm da'abir, so ka u nɔŋ paa paa la bẽ'ẽt, ka la a kum ŋwuuŋ. 3 Un da wom ye Yezu kpɛ̃ teŋ la ni na la, u da tom Geudem kpɛm baseba yi ba keŋ Yezu sa'ani ti belim U ka U tana teb u da'abir la. 4 Ba n da tã U sa'ani na la, ba da belim U yet yii, <<Bura-kãã nar mi yi I soŋ u, 5 den zugo, u nɔŋ ti nirib la mi, la a la ɔn n da mɛ ti po'ohug dobila te ti. 6 Ka Yezu da dol ba yɛ, ba n da pɔr nira yir la, Soogɛ kpɛ'ɛm la da le tom u zɔnam, yi ba to'oh yel U yii, <<N daana, da daam I mɛŋa, ka mam pu nar yi I tã mam yir naa; 7 Yela n so ka mam tẽ'ẽhin yi n pu nar ka n tã I sa'ani naa. Ka I ya'an ya'a nɔɔr yel se'el, ka n ntomira nan nyɛ u tebug. 8 Se'el n so la mam mi a la buraa n tar kpe'eoŋ, behit soogɛnam ka ba tomit. Ka man ya'a nɔɔr yel ba nkɔ̃ yii, <kem ha,> u nan iŋ yela nɔɔ, man ni le yel yi, <kem na,> u yɛ mi na. Man yel n da'abir yii, <iŋim ŋwala> u it ti?>>

9 Yezu n da wom ŋwala la, la da iŋ U la pakir, ka U ŋmɛrig yel nirikooŋ la n dol U la yii, <<N yet ya mi wa, hali ni Izirɛal poŋi ha Mam pu nyɛ nir n tar sera sakir ŋwalaa?>> 10 Ka niriseba ka u tom la n da lebit na la, ba da nyɛ ka da'abir la bã'ã la bah mi.

11 La da pu wuugɛ ka Yezu keŋ teŋ n bɔɔn Nayin, U nya'andolib la ni nirib berigu da dolih U mi. 12 Un da paa kpɛ̃'ɛ̃t teŋ la ni la, U da to'oh la nirib ka ba ziit buraa n kpi (kum) yit na. Ka ma da a la pɔkɔ̃ɔ̃r, kan mi n da a ka ma la bii, ka zã'ã, ka zugu ka dɔɔg; ka nirikooŋ da yi teŋ la ni dol u. 13 Daan la n da nyɛ bompɔk la, nimbɔ̃'ɔ̃g da gbã'ã U mi, ka U yel u yii, <<da kumira?>>

14 Ka da yɛɛ gaat tɔɔn ti kalim kumsouŋ (daka) la, ka bayaah la tɛk zɛ'ɛn ki'i. Ka U yel yii, <<Burasa'araa, Mam yet i yi i dɔɔ!>> 15 Ka kum la dɔɔ zi'in ka pĩ'ĩl tɔɣɔt, ka Yezu zaŋ u te u ma.

16 Dabɛɛm da sãã nirib la zã'ã; ka ba pɛ̃ɣɛt Na'ayen, yet yii, <<Na'ayen bah ka som paa U nirib!>> ka ke ka <<Nɔdɛ'ɛh n bɔɔn nɔdɛ'ɛh yi tam tinsok na!>> 17 U yeledee la wa da yerig paa Geudiya teŋ ni ka kpɛ'ɛh la zã'ã.

18 Geon nya'andolib la da pirig yel ãã woo te u. Ŋwala ka Geon da pana bɔɔl u nya'andolib la bayi 19 tom ba Daan la sa'ani yi ba bɔ'ɔh yii, <<Nyɛ n a so n nan tana laa, bee ti yi ti gur la so ha?>>

20 Buraah la n da tã U sa'ani na la, ba da yel yii, <<Geon Baptis n tom ti na yi ti bɔ'ɔh yii, <nyɛ n a so n nan tana laa, bee ti kpelin gur la so?> >>

21 Sankaŋa Yezu da kɔ'ɔn teb la nirib zɔ'ɔ zɔ'ɔ yit ba bã'ãh buuri buuri poŋi, ni seba ka kolekpãbɛ'ɛh dol, ka kpelim bah ka zɔ'ɔnam leb nyɛt. 22 Ka U da lebih ba yii, <<kemi ti yel Geon yam n nyɛ ka wom se'el la: zɔ'ɔnam leb nyɛt, kaarena dɔ'ɔh ken, nkɔma ningbina leb saalim, tokperanam leb womit, kpi'inam vo'o dɔɔ, Na'ayen yelesomir la paa nɔndem mi na. 23 Ka kamaalug paa so woo n ka taal ni Mam?>>

24 Geon ntomirib la n da gaat ba'ah la, Yezu da pĩ'ĩl tɔɣɔt Geon Baptis yela tet nirikooŋ la yii: <<I da keŋ sɛ̃ɣir la ni ɛɛt yi i nyɛ la nani? Sambeog n lobit mɔɔg la ka ku mimit laa? 25 Ka lan ka i da yi i nyɛ? So n yɛ laɣawɔɣa sommaa? Beh ma, niriseba n yɛ laɣasoma ka vo bondem vom, be la na-yɛ'. 26 Ka lan ka ya lee yina, yi ya nyɛ? Na'ayen nɔdɛ'ɛhiraa? Ẽẽ, N yet ya mi wa, i nan nyɛ se'el n gaat nɔdɛ'ɛhit. 27 Ɔ̃ɔ̃ N a so yela n poŋun deŋ golih dɔ yii,

<Behimaa, Mam tomira N ntomit yi u gaat i tɔɔn na,

so n nan ma'ahum i sɔr la gur i.>

28 Mam yet ya mi wa, so pu be ka bompɔk dɔɣɔ u teŋa ka u gaat Geon Baptise; ka tensoŋ nir ni u billa mi gaat u mi?>> 29 (Ka niriseba woo n da wom ŋwala la, laɣum ni lempodɛ'ɛhirib la, da sak Na'ayen gãkir la, se'el n so la ba da dɛ'ɛ Geon soob la mi. 30 Amaa Farasiinam la ni warami'irib la n da zaɣah yi ba dɛ'ɛ u soob la, da zaɣah la Na'ayen n tar putẽse'er tet ba la.)

31 <<N nan zaŋ la nan mak ni zomaaŋ kãã niriba? Ba ŋwani ni nani? 32 Ba ŋwani ni biih n zĩ da'a ni ka bɔɔn taaba yet yii,

<ti pɛɛb yiih bah ya,

ka ya pu wa'a;

ti kã namɔr,

ka ya pu kaahe.>

33 Geon Baptis tana ka pu dit boom bee ŋwũũt daam, ka yam yel yii, <u tara kolekpãbɛ'ɛh.> 34 Asaal Dawɔɔ tana dit ka ŋwũũt, ka ya yet yii, <beh mi ni, U a la ponya'an daan ni dãbuɣit, Lempodɛ'ɛrib ni yelebe'et dem zɔ.> 35 Ni yela n zã'ã, Na'ayen yam la nɛɛgit tet la seba woo n sak te U la?>>

36 Farasiinam la nkɔ̃ da bɔɔl Yezu yi U di ni u ka U da ti kpɛ̃ u yir, zi'in yi U di. 37 Bompɔk da yi teŋ la ni na, a yelebe'et daan, ka un da wom yi Yezu be Farasii la yir dit la, u da tar la doɣobil ni kpaam na. 38 U da zɛ'ɛl la U nya'aŋ na dɔ̃bel U nɔba bɔba kumit ka tar u nintam la n sigit Yezu nɔba zugu la pɛɛt a, ka tar u zɔɔbit duuhit a. U pana da tar u kpaam la sɔ̃ɔ̃t Yezu nɔba la. 39 Ka Farasii la n da nyɛ ŋwala la, u da yel u mɛŋ yi, nira n serin a la nɔdɛ'ɛh, u nan baŋe bompɔka n a so, yi u a la yelebe'et daan.

40 Yezu da tɔɣɔ bah na, bɔɔl u yi Simɔne, Mam tar se'el nan yel i, ka u lebih yii,

<<Pa'ala>> <<Tɔɣɔ ma?>>

41 Sampehit so n da be, da tar san-ditib bayi, nkɔ̃ la samir da a la sidi-kɔbig ka nkɔ̃ a sidi-pihinu. 42 Ka ba n da kun tɔ'ɔn wɔ la, u da zaŋ sama la bah te ba zã'ã mi. Nan-nan na, ba ɔn n nan nɔŋ san-daan la gaat zã'ãga?

43 Simɔn lebih u yii, man tẽ'ẽh yi so samir n zɔ'ɔ la. Ka Yezu yel u yii,

<<i gãk somma.>>

44 Yezu ŋwɛrig tɔ bompɔk la ka yel Simɔn yii, i nyɛ bompɔkaa? Mam n kpɛ̃ i yira na; I pu te N kɔ'ɔm ye M pɛɛ n nɔbaa, amaa u pɛɛ Mam nɔba ni u nintam ka zaŋ u zɔɔbit duuh. 45 Nyɛ pu iŋ se'el pa'al i nɔŋire, ka Man kpɛ̃ na daar bompɔka m pa'alim la nɔŋir. 46 I pu sɔ̃ɔ̃h Mam zugu ni kpasom mo. 47 Yela zugu, man yet i mi, u nyɛ u yelebe'et la n zɔ'ɔgin la suguru dii; yela u pa'al la nɔŋir berigu. Ka so n pu nyɛ suguru dii berigu la, mi kun tar nɔŋir zɔ'ɔge.

48 Ka yel bompɔk la yii, <<N di i yelebe'et suguru te i?>>

49 Seba n da laɣun zĩ dit la da yet taaba yi, U a la ɔni dit nirib yelebe'et suguru?

50 Ka Yezu yel bompɔk la yii, <<I sera sakir fããgi bah, paagum ni suma'ahum?>>