1 Lahir daar beogin wo'oŋ wo'oŋ, ka bompɔɣɔh la da tar kpasom la ka ba maal la, tã wɔɔg la ni na. 2 Ba da nyɛ ka sɛtaŋ la bilig wɔɔg nɔɔrin la mi dɔ ha, 3 ka ba n da kpɛ̃ ku ni la, ba da pu nyɛ Yezu niŋ laa. 4 Ka ba n da zɛ bora ni yel la la, ba di'i ka buraah siyi zɛ ni ba, yɛ fut ka ti nyaɣit kpɛɣɛ kpɛɣɛ. 5 Dabɛɛm da sãã bompɔɣɔha mi ka ba su'un teŋ, ka buraah la yel ba yii, <<Yibo ka ya ɛɛt so n vo kpi'inam poŋi? U le ka kpelaa, U vo'o dɔɔ mi. 6 Tẽrin Un daa nan be Galili ka yel ya se'el la: 7 yi ba nan zaŋ Asaal Dawɔɔ la te yelebe'et dem, ka ba kpa U mpuur dɔɔg zugu, ka dabiha atã daar U nan le vo'o dɔɔ?>> 8 Niŋa ka ba tẽẽ Yezu yelehum la.

9 Ka ban zɛ'ɛn wɔɔg la ni lebit la, ba da yel U nya'andolib piiga ni nkɔ̃ la ni nirib la zã'ã se'el n iŋ. 10 La da a la Mɛɛri Magedalin, ni Geona, ni Gemis ma Mɛɛri, ni bompɔɣɔse'eh m be ni ba la n da yel nya'andolib la. 11 Yel ãã la wa da ŋman ni solima mi tet nya'andolib la, ka ba pu sak seraa. 12 Ka Pita da dɔɔ zo keŋ wɔɔg la ni; ka un da ku'un veeh beh ku poŋi la, u da nyɛ la laagir laɣat la ma'a; ka leb kul, ka tẽ'ẽhit ka la iŋ u pakir ni se'el n iŋ la.

13 La da a la daan den ka ba bayi da yɛ Imayɔs, tembil n a aa mɛɛla ayopoi paagit Geruzalɛm, 14 ka tɔɣɔt tet taaba yel se'a n iŋ la. 15 Ba n da sɔ̃hit la, ka Yezu mɛŋ keŋ paa ba ka ba laɣun ken, 16 la da pu tã ba tẽ'ẽrin na ka ba baŋ yi Un laa.

17 Ka U bɔ'ɔh ba yii, <<Lan ka ya be sɔr zugu ken ka tɔɣɔt ni taaba?>>

Ka ba da tɛk zɛ'ɛn kĩ'ĩ, ni sũsã'ãuŋ. 18 Ka ba nkɔ̃, so n da bɔɔn Kilopas la, lebih yii, <<Nyɛ a la saan Geruzalɛm ni ka pu mi yel se'a n iŋ dabiha wa nii?>>

19 Ka U lebih bɔ'ɔh ba yii, <<Yel ani?>> Ka ba lebih yii, <<Yel se'a n iŋ Yezu n yi Nazarɛf na la, so n daa a nɔdɛ'ɛh, pɛ'ɛl ni paŋ ni yelehum Na'ayen ni nir woo tɔɔn la. 20 Ka ti malema kpɛ'ɛnam ni tɔɔngatib la daa zaŋ U teh, ka ba gãk U ka kpa U mpuuredɔɔg zugu la. 21 Tam daa tar putẽ'ẽr yi U a la so n nan fãã Izirɛal bah. Ɛ̃ɛ̃, se'el m pa'ah ŋwala zã'ã ni la, a la zina a la dabiha atã ka yel ãã la wa woo iŋ. 22 Se'el m pa'ah a la, bompɔɣɔh seba m pa'ah ti poŋi la n ke ka ti nɔya maam. Zina beogin wo'oŋ wo'oŋ ka ba keŋe wɔɔg la ni, 23 ka pu nyɛ Yezu niŋ la ni la, ba leb mi na yel ti yi ba nyɛ la Na'ayen ntomirib ka ba yel yi U vo mi. 24 Seba n been ni ti la, keŋ wɔɔg la ni, ka nyɛ ka la a la bompɔɣɔh la n yel se'em la nɔɔ; bam mi pu nyɛ U wa?>>

25 Ka U yel ba yii, <<Oo, ya gaam mii, ka ya bɔkir mi tɔ ni ya sak se'el ka U nɔdɛ'ɛhirib la yel ya laa! 26 La poɣun nar mi yi Fããt la namih yel ãã la zugu ka pana kpɛ̃ U na'am la ni?>> 27 Zɛ'ɛn Moozis ni, ni nɔdɛ'ɛhirib la zã'ã, Yezu da tɔɣɔ teba pa'al U Mɛŋ yela n a se'em golihug la zã'ã ni.

28 Ba n da ken ti pɔ̃r teŋ la ka ba yɛ la, Yezu da keŋ zɔɔ ba aa U gatin ha la. 29 Ka ba belim U yii, <<Kpelimim ni ti kpela, ka la a la zaanɔɔr ka wuntɛɛŋ yɛ luu. <<Yela ka U da kpɛ̃ yir la ni yi U be ni ba.

30 Un da zi'in ni ba yi ba di la, U da zaŋ boruboru, po'oh ka gbɛ̃'ɛ̃ bu, lɔɔh tɔ̃r ba. 31 Yela ma'a ka ba pana baŋ Un a so; ka U da mɛlim ba tɔɔn. 32 Ka ba yet taaba yii, <<Ti sũya pu toligin mi ti poŋi ha Un tɔɣɔrin tet ti sɔr la zugu, ka pa'an Na'ayen yeletɔɣum la n golih se'em la tet ti laa?>>

33 Sankaŋ, ka ba pana dɔɔ tulig leb Geruzalɛm; ti nyɛ nya'andolib piiga ni nkɔ̃ la ka bam ni ba son-nam laɣah taaba. 34 Ba da yet yii, <<Daan la serin vo'o dɔɔ mi, Ka nɛɛ U Mɛŋ pa'al Simɔn!>> 35 Ka ba bayi la da pana yel se'el n iŋ sɔr la zugu, ni Un ke ka ba baŋ U boruboru gbɛ̃'ɛ̃hug niŋa la.

36 Ba n da nan tɔɣɔt yel se'a n iŋ la, ka Yezu Mɛŋ tana zɛ'ɛn pa'ah ni ba ka yel ba yii, <<Sũma'ahum be ni ya?>> 37 Ka ba zɛ gbi'it ni dabɛɛm, ka tẽ'ẽhit yi ba nyɛta kouk. 38 Ka U bɔ'ɔh ba yii, <<Yibo ka dabɛɛm sãã ya, ka ya tẽ'ẽhit buyi buyi ya putẽ'ẽra poŋi? 39 Beh mi Mam nu'uh ni N nɔba wa; ka nyɛ yi la a la Mam Mɛŋ. Kalim mi nim beh, ka kouk ka ningbiŋ ni kɔ̃ba a aa yan nyɛ ka Mam tar se'em maa?>>

40 Un da yel ŋwala ba'ah la, U da pa'al ba U nu'uh ni U nɔba la. 41 Hali ba n da nyɛɛmit ka sin, ka kpelim pu sak sera ka bo'ot la, Yezu bɔ'ɔh ba yii, <<Ya tar dii kpelaa?>> 42 Ka ba da zaŋ zin-sɛ̃'ɛ̃rig billa te U, 43 ka U dɛ'ɛ ɔb ba tɔɔn.

44 Ka U pana da yel ba yii, <<Mam yelehum n ŋwala, ka N daa yel Man daa nam be ni ya la, yi se'el woo n golih Mam wo'or zugu ka be Moozis wara la, ni nɔdɛ'ɛhirib gbana la, ni Saams-gbauŋ la poŋi la a la, la tom yela?>>

45 U da wo'o ba putẽ'ẽra yi ba bɔk Na'ayen yelehum la n golih se'em la, 46 ka da yel ba yii, <<La golih mi, yi Fããt la nan namih ka vo'o kum poŋi dɔɔ dabiha atã daar, 47 ka U wo'or poŋi ka ba nan tɔɔn vom tɛɛgir ni yelebe'et suguru dii, pi'in Geruzalɛm tar paagit teh la zã'ã. 48 Yam a la sɛhira dem yel ãã la wa woo poŋi. 49 Ka beh mi, Mam nan tet ya dol la M Ba' nɔdiŋa la poŋi; yela, kpelim mi teŋa gur ya n ti pɛ'ɛl ni panse'e n zɛ'ɛn saazugu na la?>>

50 Yezu da dol ni U nya'andolib la mi yi keŋ Bɛtani teŋ, ka zɛ̃k U nu'uh saazugu, kamaal ba. 51 Un da be ni kã'ãt maan ba la, U da bah ba sa'ani mi ka zɛ̃k U Mɛŋ doot ha ti kpɛ̃ tensoŋin ha. 52 U nya'andolib la da na'ah U mi ka tulig leb Geruzalɛm ni popeelun-kãt; 53 ti be po'ohug yir la ni na'ahit Na'ayen saŋa woo.