1 Ka Yezu mak maɣahir pa'al U nya'andolib la n nar se'em yi ba po'ohit saŋa woo ka da ve'era. 2 U da yel yii, <<Teŋ kakɔ̃ ni, ka wara gãɣahit da be, ka pu zot Na'ayen bee zaŋ nir da kɔbiga. 3 Teŋ la ni pɔkɔ̃ɔ̃r mi n da be nɔɔt buraaga kpalinkpaɣara yet yii, <Soŋum ni n yel la n dindaana sa'ani.>

4 Wara gãɣahit daan la da nan zaɣah mi; ka pana da ti tẽ'ẽh buyi ka yel yii, <M mi mam pu zot Na'ayen bee da nir kɔbiga, 5 ka pɔkɔ̃ɔ̃ra n ba nɔɔt n kpalinkpaɣara se'em ma, n nan soŋ gãk u yel la te u, ka u da le nɔɔrum yelaa.> >>

6 Ka Daan la da yel yii, <<Womih mi ŋmɛlema wara gãɣahit la n yel se'em. 7 Ŋwala wa, Na'ayen kun te U mɛŋ nirib seba n kaahit ni U wuntɛɛŋ ni wo'oŋ la ntɔɔ gãkire? U nan go'om ka soŋ baa? 8 N yet ya mi wa, U nan soŋ te ba ntɔɔ gãkir kalam ma. Ka dee wa ni, Asaal Dawɔɔ la n tana, U nan nyɛ sera sakir teŋaa?>>

9 U da le mak maɣahir te seba n nam ba mɛŋ yi bam a la kassidem, ka nyɛ seba ka bam a yelebe'et dem la: 10 <<Buraah siyi n da do po'ohug doog la ni yi ba po'oh, nkɔ̃ da a la Farasii nir, ka nkɔ̃ la a lempodɛ'ɛhit. 11 Farasii nir la da zɛ mi, ka po'ohit yii, <Na'ayene, Mam po'oh I zɔ'ɔ zɔ'ɔ yi, mam pu laɣun a aa niribaa la wa: naɣayiih, nivokãha, barih dem, bee poɣun a aa lempodɛ'ɛhaa. 12 Mam loot nɔɔr buyi bakɔ'ɔr woo; N tet pii kɔbig poŋi man tomit nyɛt se'el woo la ni.> 13 Ka lempodɛ'ɛha n da zɛ zãã ha la, pu yaŋ poɣun gɔrig saazugu wole, ka u da ŋmɛ'ɛra u ŋwɔ'ɔg ka yet yii, <Na'ayene, dim suguru te m, man n a yelebe'et daan la!>

14 N yet ya mi wa, burakãã la wa da kul mi ni sũma'ahum gaat ɔ̃ɔ̃ la; seba woo n zɛ̃kit ba mɛh nan nyɛ sirigir, ka seba woo n sirig ba mɛh nan nyɛ zɛ̃kir?>>

15 Nirib da laɣun tar bibibih ken U sa'ani na yi U zaŋ nu'ug paɣɛl ba zut ka kamaal ba; ka nya'andolib la n da nyɛ yela la, ba da sa'ahit ba mi yi ba da it yelaa. 16 Ka Yezu da bɔɔn ba yi ba leb na ka yet yii, <<Bah mi ka biih la tã N sa'ani na, ka da gu'urin baa; ka la a la bãã la wa n so Na'ayen So'olum la. 17 Yelemɛŋir ka N yet ya wa, so woo n pu dɛ'ɛ Na'ayen So'olum la a aa bibil laa, ɔŋ daan kun malegun kpɛ̃ di ni?>>

18 Tenso'ot so da bɔ'ɔh Yezu yii, <<Pa'an pa'al-Soŋaa, N nan iŋa yela ka nyɛ vom n kum ba'ah la?>> 19 Ka U bɔ'ɔh u yii, <<La iŋa yela ka i bɔɔn Nim yi soŋa? So ka somm, la n ka Na'ayen ma'a. 20 I mi nɔdiŋa la: <I da tom barih toomaa; I da ko niraa; I da zuu; I da maɣara; na'ahum i ba' ni i ma.> >>

21 Ka u lebih yii, <<Mam tomit ãã woo mi m biilimi na?>>

22 Ka Yezu N da wom ŋwala la, U da yel u yii, <<Bon lakɔ̃ kpelim pɔ'ɔ i ni. Kɔɔhum nyɛ n tar se'el la zã'ã waabi, ka zaŋ ligiri la tɔ̃r nɔndem, ka i nan nyɛ laɣat Tensoŋi la; ka pana tana dol Mam?>>

23 Un da wom ŋwala la, u sũũr da sa'am mi; un da a bondaan la zugu. 24 Yezu da beh u ka yel yii, <<La a kpɛ'ɛmir paa yi bondem nyaŋ kpɛ̃ Na'ayen So'olum la ni! 25 Sera, la nan a naana tet wɔɣun yi u kpɛ̃ fupĩĩm niuh ni gaat bondaan n nan kpɛ̃ Na'ayen So'olum la ni?>>

26 Seba n da wom dee la wa la, da bɔ'ɔh yii, <<Ka ɔni n nan pana nyɛ fããgire?>>

27 Ka U lebih yii, <<Se'el n tɔ tet saalib la, pu tɔ tet Na'ayene?>> 28 Ka Pita yel yii, <<Beh maa, ti bah ti yɛ mi ka dol I?>>

29 Ka U yel ba yii, <<N yet ya la yelemɛŋira, so pu be bah yir bee pɔɣɔ bee sɔ̃ɔ̃t bee ba' ni ma' bee biih, Na'ayen So'olum la zugu, 30 ka kun nyɛ se'el n gaat yela zomaan - kãã la wa, bee zomaan se'e n kenna wa vom kum ba'ah poŋi?>>

31 U da pana tar U nya'andolib pii ni bayi la leb nkpeŋ ti yel ba yii, <<Beh mi nii, ti yɛ doora Geruzalɛm, ka se'el woo ka nɔdɛ'ɛhirib la da golih yit Asaal Dawɔɔ la ni la, nan dolih yela nɔɔ. 32 Ba nan zaŋ U te seba n pu sak sera te Na'ayen la; ka ba nan kɛɛr, to'ot ka tobehit nantɔ̃ɔ̃t ma'ar U. 33 Ban ŋmɛ U ba'ah, ba nan ko' U, ka dabiha atã ni, U nan vo'o dɔɔ ya'ah?>> 34 Ka ba da pu bɔk se'el se'el yit tɔɣum ma nii; Yelemɛŋir, Un da yet se'el la, da pu nɛɛ te baa, ka ba da pu bɔk Un yel se'el la.

35 Un da pɔ̃r Gɛriko la, burafɔɔ n da zĩ sɔr la nkpeŋ sohit. 36 Ka un da wom nirikooŋ n yɛ gat la, u da bɔ'ɔh se'el n it. 37 Ba da yel u yii, <<Yezu Nazarɛf teŋ nir la n yɛ gat?>>

38 U da pana tãh yii, <<Yezu, Devit Dawɔɔgaa, dim suguru te m!>>

39 Seba n da be tɔɔn la, da tãh u yi u gɔ'ɔ; ka u da maalin ãrig gaat yela, <<Devit Dawɔɔgaa, dim suguru te m!>>

40 Yezu da tɛk zɛ'ɛl ki'i ka yel yi ba tar buraa la tã U sa'ani na; ka un da vurig lɛm na la, U da bɔ'ɔh u yii, 41 <<Lani ka i bɔɔt yi N iŋ te i ya?>>

Ka u yel yii, <<Daana, n bɔɔt yi n nyɛt i>>

42 Yezu da yel u yii, <<Dɛ'ɛgum i nini la; i sera sakir la n fãã i bah?>> 43 Nila nila ka u nini la leb nyɛt ka u dol U, pɛ̃ɣɛt Na'ayen; ka nirib la zã'ã, n da nyɛ se'el n iŋ la, da pɛ̃ɣɛt Na'ayen.