1 Yezu da zɛ' la Gennisarɛt mɔɣir la doon, ka nirikooŋ la da it ba n nan iŋ se'em paa U sa'ani womih Na'ayen yela la, 2 U da nyɛ ããrina ayi ka a zɛ' mɔɣir la doon; zin-gbã'ãrib la da sigi ããrina la ni mi pɛɛt ba woɣih. 3 U da kpɛ̃ ããruŋ kukɔ̃ n da a Simɔn ããruŋ la niŋa, ka yel Simɔn yi u bah ka ããruŋ la leb nya'aŋ bɛ'ɛla ha. Ka U pana da zi'in ka pa'al nirikooŋ la.

4 Un da tɔɣɔ ba'ah la, U da yel Simɔn yii, <<Zaŋim i wok la lob kɔko'og la niŋa ha gbã zimi?>>

5 Simɔn da lebih U yii, <<Daana, ti sa tom mi wo'oŋ la zã'ã, amaa ti pu gbã'ã se'el la. Ka Nyɛ N yel yela, mam nan lob wok la?>>

6 Ba n da lob wok la, ba da gbã zimi berigu ka wok la da yi ka ããhih. 7 Ba pana da yebih ba taab la n be ããrun-koo la ni ha la, yi ba tana souŋ ba. Zimi da pɛ'ɛl ããrina bayi la mi, ka ããrina la da kpelim yi ba sim kɔ'ɔm la ni.

8 Amaa Simɔn Pita n da nyɛ ŋwala la, u da kpã la duna Yezu tɔɔn, ka yet yii, <<Kem ka bahum, Ndaan naa, ka mam a la yelebe'et daan!>> 9 La da iŋ Simɔn Pita ni u taab la la pakir ni zinse'a ka ba gbã la; 10 La da a la yela nɔɔ ni Gemis ni Geon seba n a Zebedii dawɔɔh ka laɣun tomit ni Simɔn la.

Ka Yezu da yel Simɔn yii, <<Da bah ka dabɛɛm tar i ya; ka zina saŋit yɛ ha, ya nan kã'ãhit nirib?>> 11 Ba n da tar ããrina la leb kɔ'ɔm la nɔɔrin la, ba da bah se'el woo mi ka dol Yezu.

12 Yezu n da be tenkãra la kakɔ̃ niŋa la, buranin-sãɣuŋ daan da be niŋa. Buraaga n da nyɛ Yezu la, u da kpã la duna ka belimit U, <<Daana, nyɛ M bɔɔt, I tɔ'ɔm bah ka n ningbiŋa saalim feppi?>> 13 Ka Yezu tẽẽ U nu'ug, kalim u, ka yel yii, <<Mam bɔɔt yi N teb i ka i ningbiŋ la a feppi?>> Nila nila ka u bã'ã la bah u.

14 Ka Yezu yel u yi u da yel so so. <<Kema, <<Zaŋim i mɛŋ pa'al malemadaan la, a aa Moozis n yel ya se'em la, kem ti iŋ teeb pa'al yi i nyɛ i tebug?>>

15 Amaa Yezu tɔɣum la da malegun yerig mi zĩ'ĩ woo ka nirib berigu kenna yi ba womih ka nyɛ ba tebug. 16 Amaa U da yi la nkpeŋ ha U ma'a sɛ̃k la ni ha ti po'ohit.

17 Daar dikɔ̃, ka Farasiinam ni warapa'alib n zɛ'ɛl Galili ni Geudiya ni Geruzalɛm tana zĩ lɛm ni zĩ'se'e ka Yezu da pa'an la; ka Daan la paŋ da be ni U ka U teb ba. 18 Niŋa ka buraah baseba da tana, ka ziit kaaruŋ ka u dɔ sandɛya zugu. Ba da bɔɔt yi ba tar u kpɛ̃ ti dɔ'ɔl Yezu sa'ani; 19 amaa ba da pu nyɛ fɔl nan tar u kpɛ̃ Yezu sa'ani, se'el n so la nirib la da zɔ'ɔ mi mikit, ka ba da lak mɔpil, zaŋ u dolih nirikooŋ la tinsok sigi Yezu tɔɔn.

20 Ka Yezu n da nyɛ yi ba tar sera sakir la, U da yel yii, <<N zɔɔ, i nyɛ i yelebe'et suguru?>> 21 Ka gban-mi'irib ni Farasiinam la da bɔ'ɔhit ba mɛŋ, <<U aa ɔni tɔɣɔt to'ot Na'ayene? Ɔni n nan tɔ'ɔn di nirisaal yelebe'et suguru te u, la n ka Na'ayen ma'a?>>

22 Yezu n da baŋ ba n tẽ'ẽhit se'em la, U da lebih ba yii, <<La iŋa yela ka ya tẽ'ẽhit yela ya sũya ni? 23 La nan itug n tɔ', i yel yii, <I nyɛ i yelebe'et suguru, <bee, i yel yii, <dɔɔgum zɛ'ɛl saazugu ka keŋe?> 24 Amaa la nan iŋ se'em ka ya tɔ'ɔm baŋ yi Asaal Dawɔɔ la tar kpe'eoŋ tengbauŋa zugu, yi U di nirisaal yelebe'et suguru te u,>> U da yel kaaruŋ la <<Mam yet ti yii, dɔɔgum zɛ'ɛl saazugu ka zaŋ i sandɛya la kul.>> 25 Nila nila ka u dɔɔ zɛ'ɛl ba tɔɔn, zaŋ u sandɛya la, kul u yir, ka pɛ̃ɣɛt Na'ayen. 26 La da iŋ ba waabi la pakir, ka ba da pɛ̃ɣɛt Na'ayen ni U yelenyalima la, ka pana yet yii, <<Ti nyɛ yelesaan zina.>>

27 Ŋwala nya'aŋ la, Yezu da yi mi ka nyɛ Levi n a lempodɛ'ɛh n zi lempoo-doog la ni; ka U da yel u yii, <<Dɔɔgum dol Mam.>> 28 Ka u da dɔɔ, bah se'el woo, ka dol U.

29 Ka Levi da iŋ dii u yir yi ba di ni Yezu; lempoo dɛ'ɛhirib la da zɔ'ɔ mi ka baseba laɣun zĩ teebul ni ni Yezu nam. 30 Farasiinam ni ba gban-mi'irib la da nɔɔmit tet Yezu nya'adolib la, yet yii, <<La naam ma yela ka U dit ka ŋwũũt ni lempodɛ'ɛrib ni yelebe'et dem ma?>>

31 Ka Yezu lebih ba yii, <<Nir seba n pu bẽ'ẽra pu ɛɛt tebaa, ka seba n bẽ'ẽt ma'a; 32 Mam pu tana yi M bɔɔl la ntɔɔ dem ma'a. amaa yelebe'et dem n nan iŋ se'em ka tɛɛ?>>

33 Ka ba bɔ'ɔh U yii, <<Geon nya'adolib la, a aa Farasiinam la, loot nɔɔr ka po'ohit, amaa nyɛ nya'adolib la ditin ka ŋwũũt?>>

34 Ka Yezu yel ba yii, <<Ya kun tɔ'ɔm bah ka pɔɣɔdir daan la zɔnam lo nɔɔr ka pɔɣɔdir la nan pu ba'ahe, ya nan tɔ'ɔm bahee? 35 Dabiha kenna ka pɔɣɔsaaŋ la kun be ni baa, niŋa ka ba nan loot nɔɔr?>>

36 U da le mak maɣahir te ba: <<So pu zaŋit fupaalug tan ligit fukorugo; ka yela n iŋ, tam paal la nan bah ka tan kot la ãã pa'ah, ka tam paal la kun ŋman ni tan kot laa. 37 So pu zaŋit dãkumirum it leŋ niŋa ka bɛ'ɛra; ka yela n iŋ leŋ la nan tãh ka daam la kpa'ah. 38 Ka dãkumirum nar yi bu be la lem-paalig ni. 39 So ka' nan ŋwũ dãkorim ka le ɛɛt dãpaalim, u nan yel yii, <<Dãkorim la a soma gaat?>>