1 Nan-nan na, lempodɛ'ɛhirib ni yelebe'et dem la da ken lɛmit Yezu mi na yi ba wom U tɔɣum. 2 Ka Farasiinam ni gban-mi'irib la da buɣun yet yii, <<Ɔ̃ɔ̃ wa bɔɔt yelebe'et dem mi ka dit ni ba?>>

3 Ka U da mak maɣah dee la wa te ba: 4 <<Ya ɔni, n nan tar pihi kɔbig ka kukɔ̃ borig, ka u kun bah pihiwai ni ba wai la sɛ̃ɣir la ni, ka keŋ ti ɛ pese'eog n borig la, hali gur un ti nyɛ ku? 5 Ka un ti nyɛ ku, u kun zaŋ ku buk u bɔɣɔrin ka nyɛɛmit ni popeelum? 6 Ka un ti paa yirin na, u kun bɔɔl u zɔnam ni u kpɛ'ɛh, yet ba yii, nyɛɛm mi nim, ka n nyɛ m pese'eog n daa borig la.> 7 Yela nɔɔ, ka N yet ya wa, popeelum ni nyɛɛma nan zɔ'ɔ tensoŋ yir ha, yelebe'et daan nkɔ̃ n ki'ih u yelebe'et, gaat toonsoma dem pihiwai ni ba wai seba n pu ɛɛt yelebe'et ki'ihugo?>>

8 <<Bee bompɔɣɔkani n nan tar laɣakɔ̃ba pii, ka bukɔ̃ n borig, u kun laŋ buɣum, ka piih doog la, ɛ nima nima gur un nyɛ bu? 9 Ka un nyɛ bu, u nan bɔɔl u zɔnam ni u kpɛ'ɛh, yet yii,' Nyɛɛm mi ni m, ka n nyɛ laɣase'eb m borig la.> 10 Ŋwala zugu, ka N yet ya yii,' popeelum ni nyɛɛma be ni Na'ayen Malekanam la, yelebe'et daan nkɔ̃ n ki'ih u yelebe'et.> >>

11 Ka Yezu da yel yii, <<Buraa n da be tar dawɔɔ siyi. 12 Ka pit la da yel u ba' la yii, <M ba'a, te m mam se'el n a n vaagir tɔ̃t i laɣara ni nan-nan na.> Ka u ba' la serin da tɔ̃r u laɣat la te ba.

13 Dabiha n da kããl bɛ'ɛla wa la, pit la da dɔɔ kã'ãh se'el woo n a u den, lɔ kateŋ zãã ha, niŋa ka u da puɣulum u laɣara ni yaalug. 14 Ka un da sɔ̃tim ti ba'ah la, kon-nyaliŋ da lu teŋ la ni, ka u da pu le tar se'el la. 15 U da pana keŋ teŋ la nir nkɔ̃ sa'ani yi u tomit tet u, ka u daan da bah ka u it diit tet u kurikurinam. 16 U da ni pana bɔɔt yi u laɣun di kurikurinam diit la; ka so da pu te u wa. 17 Ka un da tẽ'ẽh ki'i ka u putẽ'ẽr tɛɛ la, u da bɔ'ɔh u mɛŋ yii, <Mam ba' ntomirib balɛ n pu dit dii ka ket sakote, ka behum man n ŋwala vibit ni kom! 18 N nan dɔɔ leb m ba' sa'ani, ti yel u yii, <<M ba'a, Mam tom be'em gɛ̃'ɛ̃h Na'ayen ni nyɛ; 19 Mam pu le nar yi ba bɔɔn nim yi i dawɔɔga; tarim a aa i ntomiriba nkɔ̃?>>> 20 Ka u da pana va dɔɔ leb u ba' sa'ani. Ka un da be zãã ken na la, u ba' la da zɛ̃k zugu nyɛ u ka nimbɔ̃'ɔ̃g sããgu; ka u zo to'oh u ti kɔk ka bob u. 21 Ka u dawɔɔ la yel u yii, M ba'a, Mam iŋ taal gɛ̃'ɛ̃h Na'ayen ni nyɛ; Mam pu le nar yi ba bɔɔn nim yi nyɛ dawɔɔga.

22 Ka u ba' la da yel u da'aba la yii, <Kalam, ka ya zaŋ fuug n bɔɔn fuug na yɛɛl u; zaŋ nutoo mi pir u nubil, ni taɣara pir u nɔba. 23 Ka gbã'ã naɣapaalig n kãrig somma na ko, ka ti di ka nyɛɛm; 24 ka n dawɔɔga daa kpi mi ka leb vo'o, u daa borig mi, ka n le nyɛ u!> Ka ba da pĩ'ĩl dit ka nyɛɛmit.

25 Sankãã la wa, u dawɔkpɛɛm la da be la pooŋin ha; ka un da yɛ kun na ti pɔr yir la, u da wom baaŋ ni wa'a. 26 U da bɔɔl da'aba la nkɔ̃ ti bɔ'ɔh se'el n it. 27 Ka u lebih yii, <I sɔ̃'ɔ̃g la kul mi na, ka i ba' ko naɣapaalig n kãrig, un nyaŋ leb u sa'ani na ni nima'ahum la.>

28 Ka u dawɔkpɛɛm la sũũr da dɔɔ ka u zaɣah yi u kun kpɛ̃'ɛ̃. Ka u ba' da yina belemit u. 29 Ka u da lebih u ba' la yii, <Womih maa! Woma wa woo n gaara, mam tomit te i mi a aa da'abir la, m mi pu tabel zaɣah i nɔɔre; ka i pu tabel te mam bobil yi n di ka dɛ'ɛm ni n zɔnama. 30 Ka i dawɔkãã la wa n leb na wa, so' n sãɣam i laɣat yaal ni bompɔɣɔyaalih ha, ka i ko naɣarib-kãt te u!>

31 Ka u ba' la yel u yii, << <N dawɔɔga, nyɛ be ni mam mi saŋa woo, ka se'el woo n a m bon, a la nyɛ mi bon. 32 Ka ti n dit ka nyɛɛmit la, i sɔ̃ɔ̃ga daa kpi mi ka leb vo'o; u daa borig mi ka ti leb nyɛ u.> >>