1 Ka Yezu da yel U nya'andolib la yii, <<Bura-bondaan n da be ka tar u tooma zugudaan, ka ba yet u yii, buraaga sãɣamit laɣat la mi. 2 Ka u da bɔɔl u yel yii, <Nan bon n la ka n womit i zuga? Pa'alim se'el woo ka i nyɛ tooma behiga ni, se'el n so la i kun le nyaŋ a mam tooma wa zugudaana.>

3 Ka zugudaan la yel u mɛŋ yii, <Lan ka n nan iŋe, nan-nan na, ka n daana dɛ'ɛgit n tooma wa ka bahit m ma? N ka paŋ nan laɣan tũ'u, valim mi tarim yi n soh. 4 N tẽ'ẽh baŋ man n nan iŋ se'em, ka ban ti sa'agum n zugudaan tooma wa ni, nirib nan sak yi n kpɛ̃ ba yɛ.>

5 Ŋwala, ka u da bɔɔl seba woo n tar u daan la sama la nkɔ̃ nkɔ̃, u da bɔ'ɔh yiiga daan la yii, <Nyɛ tar n daana samir la alɛ?>

6 Ka u lebih yii, <Pihi pii.> Ka u yel u yii, <Dɛ'ɛgum i samir gbauŋ n ŋwala, zi'inim kalam ka bah ka la a pihi anu.>

7 Ka u leb bɔ'ɔh so n taɣel la mi, <Nyɛ mi samir a la alɛ?> Ka u lebih yii, <Ki bora pii.> Ka u yel ɔŋ mi yii, <Dɛ'ɛgum i samir gbauŋ n ŋwala ka bah ka la a bora anii.>

8 Ka u daan la da pẽɣɛ ŋmɛlema zugudaan na ni un nyaŋ baŋ u putẽ'ẽr ka tom se'em la; lan a se'em la aa, nan-nan na biih baŋit ba zomaan kãã nirib putẽ'ẽra ba tooma poŋi gaat ntɔɔ biih. 9 Ka N yet ya mi wa, zãh mi zɔnam ni ŋmɛlema laɣat ka ti n ti ba'ah, ba nan dɛ'ɛ ya ba vom kun ba'ah yɛ la poŋi.

10 So woo n tomit ni yelemɛŋir lauk fĩĩ, nan tɔ'ɔn tom ni yelemɛŋir laɣat berug berug; ka so woo mi n tomit ni ŋmɛlema fĩĩ, tomirin ni ŋmɛlema zɔ'ɔ zɔ'ɔ. 11 Ka nyɛ n pu tar yelemɛŋir ni ŋmɛlema laɣat la, ɔni n nan zaŋ sãlema ni ŋwɔɣum laɣat la te i ya? 12 Ka nyɛ n pu tar yelemɛŋir ni so bonne, ɔni n nan te i se'el n a i mɛŋ bonne?

13 Da'abir ka' nan nyaŋ tomit tet kpɛ'ɛnam bayii, u sii nan yi nkɔ̃ ka nɔŋ nkɔ̃, bee na'ahit nkɔ̃ ka kih nkɔ̃. I kun nyaŋ tomit tet Na'ayen ni ligirii?>>

14 Farasiinam la, seba n nɔŋ ligiri la, n da wom ŋwala woo la, ba da ɛ̃ɛ̃rigit Yezu mi. 15 Ka U da yel ba yii, <Yam a la seba n tet ya mɛŋ boot nirib tɔɔn; ka Na'ayen mi ya sũya n a se'em, ka se'el ka nirisaalib beh ka la tar zugu la, a la barih Na'ayen tɔɔn.

16 <<Wara la ni nɔdɛ'ɛhirib la da tomiri ka Geon nyaam paa na; sankaŋ la ti paa zina, ba tɔɔn Na'ayen na'am yir yelesoma la mi, ka nir woo zɛɣit yi u kpɛ̃ ni paŋ. 17 Ka la a la naana tet tensoŋ na'am yir la ni tengbauŋa yi ba mɛlim, gaat wara la yel dikɔ̃ n nan yih.

18 <<So n lebih u pɔɣɔ ka tɛɛ di kakɔ̃ toma kamboh, ka so n di pɔɣɔse'e mi n bah ka ser ka yina, mi toma kamboh.

19 Bura-bondaan n da be, ka daar woo ka yɛɛra kparikota ka la mah, ka u dit disoŋ sɔ̃r sɔ̃r. 20 Ka u zanɔrin, nɔndaan, ka u wo'or bɔɔn Lazarɔs da dɔ ni, ka nɔra dɛ'ɛ u ningbina zã'ã, 21 Lazarɔs da maahum mi gur yi u pɛ'ɛl u poor ni dise'et ka na'ab la dit ka la yaamit teŋ la. U da dɔ la niŋa, hali ka baah da tana lɛɛn u nɔra la.

22 Daar da paa mi ka nɔndaan la kpi ka Na'ayen Malekanam zi u keŋ yi u ti be ni Ebraham. Ka bondaan la mi da kpi, ka ba pĩ u. 23 Ba n pĩ u la, ka u keŋ be tenzɛ̃'ɛ̃ug ni, zĩse'e ka la womit u la, u da gɔrig saazugu nyɛ Ebraham zãã ha ka Lazarɔs be u loɣirin. 24 Ka u bɔɔl yii, <Mba Ebraham, dim suguru te m, ka tom Lazarɔs ka u zaŋ u nɔbil tom kɔ'ɔmi, tana tɔk n zɛlemira na ka la iŋ di ma'ahiri; ka m be la buɣum poŋi ka la pu maha.

25 Ka Ebraham yel u yii, <Biiga, tẽr yi ya n daa vo la, nyɛ daa dit la nyaɣahum, ka Lazarɔs daa dit vẽẽha ma'a, ka nan-nan na, u be la ma' ma' niŋa kpela, ka nyɛ mi be vẽẽha ni. 26 Yit yel ãã la wa ni, yam ni tam tinsok, nangɔn-wɔŋir n beŋ, ka so m bɔɔt yi u zɛ'ɛl kpela yak niŋa na, kun tɔ'ɔn iŋe, ka so mi n zɛ'ɛl nila yi u yak kpela na, kun nyaŋe.>

27 Ka bondaan la yel yii, <Ŋwala, M ba'a, N sohit i mi yi i tom Lazarɔs m ba' yir ha, 28 ka n tar sɔ̃'ɔ̃t tinu, u ŋmaagum ba tobir dããl, ka bam mi da ti tã buɣum boo ni na dit vẽẽhaa.>

29 Ka Ebraham lebih yii, <<Ba tar Moozis ni Nɔdɛ'ɛhirib la; ba womihum ban tɔɣum.>

30 Ka u yel yii, <Aai, Mba Ebraham; Ya n tom so ka u zɛ'ɛl kpi'in teŋa keŋ, ba nan ki'ih ba yelebe'et.> 31 Ka u yel u yii, <bam pu womih Moozis ni Nɔdɛ'ɛhirib laa, ba kun womih so'o, hali ni un poɣun yi kpi'in teŋa keŋe.> >>