1 Boruboru kãha maluŋ la, da bɔɔn Zɔɔgaat la, da pɔ̃r mi. 2 Malema kpɛɛnam la ni gban-mi'irib la da ɛɛra sɔse'er ka ba nan dolih gbã'ã Yezu ko', ka dabɛɛm da tar ba la nirib la zugu. 3 Sitaana da kpɛ̃ Geudas m bɔɔn Isekariyɔt, so n da a nya'andolib piiga ni bayi la nkɔ̃ la; 4 U da keŋ mi ha ti tɔɣɔ ni malema kpɛɛnam la ni Na'ayen po'ohug doog kpɛɛnam la ɔŋ n nan kɔɔh Yezu te ba se'em. 5 Ka nirib la poor pɛɛ hali ka ba gbã'ã nɔɔr yi ba nan te u ligiri. 6 Ka u sak ka pĩ'ĩl ɛɛt fɔl se'er ka u nan dolih zaŋ Yezu kɔɔh te ba sanse'e ka nirikooŋ kun be niŋa.*

7 Boruboru kãha maluŋ dabihir la n da paa la, la da a la ba kããb ni Zɔɔgaat pebil la. 8 Yela ka Yezu da tom Pita ni Geon ka yet yii, <<Kemi ti maal Zɔɔgaat diit la ka ti tana di?>>

9 Ka ba bɔ'ɔh U yii, <<Ya ha ka Nyɛ bɔɔt yi ti maal diit la?>>

10 Ka Yezu yel ba yii, <<Womih mi,>> yan ti kpɛ̃ teŋ la ni, ya nan to'oh buraa n ziit kɔ'ɔm ni woor; dolin ni u kpɛ̃ yise'er ka u kpɛ̃'ɛ̃t la 11 ni ya yel yir la daan, <Pa'al la bɔ'ɔh i yii, <<Saam doog la lee ka U ni U nya'andolib la nan zi'in di Zɔɔgaat diit la?>> 12 U nam pa'al ya doyaluŋ n be dotoɣoma zugu ha, poɣun maal zɛ ni koɣih. Maahum mi niŋa te ti?>>

13 Ka ba keŋ ti nyɛ se'el woo ka la a aa Ɔŋ m poɣun yel ba se'em la; ka ba maahum Zɔɔgaat dii la niŋa.

14 Saŋa la n da paa la, Yezu ni U nya'andolib la da zi'in ba dii zĩ'ĩ la. 15 Ka U yel ba yii, <<M ba' bɔɔt yi N di Zɔɔgaat diiga mi ni ya ka baŋ pĩ'ĩl namehug; 16 N yet ya mi wa, yi N kun le di ka taaba gur la ti pa'al la n nan a se'em Na'ayen so'olum la ni?>>

17 Ka zaŋ ŋman ni daam U nu'uhin, te Na'ayen tooma ba'ah ka yel ba yii, dɛ'ɛ mi ni ya ŋwũ ka te taaba; 18 Mam yet ya yii, nan-nan na tar yɛ ha, Man kun le ŋwũ tiwola daam gur Na'ayen so'olum la n ti paa na?>> 19 Ka pana zaŋ boruboru, te Na'ayen tooma ba'ah ka gbɛ̃'ɛ̃h te U nyaandolib la, ka yel yii, <<Mam niŋ n ŋwala ka N zaŋit tet ya wa. Iŋ mi ŋwala ni ya tẽr N yel?>>

20 Ban da di ba'ah la, U da le iŋa yela mɛŋ nɔɔ, zaŋ ŋwan ni daam, ka yel yii, <<Ŋwan na ka N kpa'agit tet ya wa, a la Mam nɔdiŋ paal, ka N diŋit ni ya ni N ziima. 21 Ka behimi nii, so n kɔɔh Mam la n zĩ ni Mam ka u nu'ug be laaga ni wa. 22 La a la sera yi Asaal Dawɔɔ la nan keŋ a aa la n poɣun golih dɔ'ɔl se'em na la, ka la nan a yel-kãt te so n kɔɔh U te la!>> 23 Ka nya'andolib la pĩ'ĩl gããt bɔ'ɔhit taaba, bam so n nan sak tom di.

24 Nɔkpɛ'ɛmir da lu nya'andolib la tinsok yi ba baŋ ba poŋi la, ba so n gaat ba zã'ã. 25 Ka Yezu yel ba yii: <<Teŋa ni, nanam pɛ̃rigit ba nirib mi, ka seba n pa'an ba kpe'eoŋa, ke ka nirib la nyɛt ka ba a soŋirib. 26 Amaa yam da a aa bam n a se'em laa; ke ka so n gaat zã'ã la a ya bii, ka tɔɔngat la ŋwan ni so n tomit tet ya. 27 Ɔni n gaat zã'ãga, so ka ba tomit tet la bee so n tomit tet la? La ka la so ka ba tomit tet laa? Ka Mam be ni ya wa, a la so n tomit tet la. 28 <<Yam n a seba n zɛ kpɛ ni Mam N namehuga poŋi; 29 ka Mam zaŋ n so'olum ma te ya mi, a aa M ba' la n zaŋ U so'olum te Mam yi N won se'em la 30 ya nan di ka ŋwũ Mam so'olum la poŋi, ka mi nan zĩ na'am koɣih zut gãkit Izirɛal buuri piiga ni bayi la.

31 <<Simɔn, Simɔn, womih ma! Sitaana bɔɔt yi u nyɛ fɔl yɛɛl ya zã'ã mi a aa ki' ut la bah. 32 Ka Mam po'ohit tet i mi yi i sera sakir tar paŋ; ka nyɛ n ti leb na, i nan kpemih i sɔ̃ɔ̃t la?>> 33 Ka Pita yel yii, <<N Daana, mam maahum ya yi n dol ni nyɛ keŋ paɣarib doog la ni, ka la n a la kum, mam ni nyɛ laɣan kpi?>>

34 Ka Yezu yel yii, <<Mam yet nyɛ Pita yii, nɔrɔɔg kun ka'ah zinaa, gur ka nyɛ ti ki'ih sugum butã yi i zi Mam?>>

35 U da yel ba yii, <<Man daa tom ya yi ya yim ka da tar potamaan bee tapɔk bee taɣara la, ya daa kɔŋit se'el laa?>>

Ka ba yel yii, <<aai, ti daa pu kɔŋira?>>

36 Ka U yel ba yii, <<Ka nan-nan na, ya so n tar potamaan un zaŋ ma, tapɔk daan mi iŋim yela nɔɔ. Ka so mi n pu tar so'oga kɔɔhum u fuug da nkɔ̃. 37 N yet ya mi wa, golih koo la wa nan dolih yela nɔɔ Mam yel la poŋi; La golih yi ba kããl U pa'aha naɣayiih poŋi.>; La mi a la sera yi ban golih Mam yela se'em la, serin tana tom.

38 Ba da yel yii, <<Daana, beh maa, so'oh siyi n ŋwala?>>

Ka U lebih yii, <<la sɛk ya?>>

39 U da yi na keŋ, do Olifs zɔɔr la ha, a aa Un ni poɣun it se'em la, ka U nyaandolib la dolih U; 40 Un da paa niŋa la, U da yel ba yii, <<Po'oh mi yi be'em gãkir la da paa yaa?>> 41 U da vurih keŋ tɔɔn ha ka bah ba, ti kpã duna po'ohit yii, 42 <<M Ba'a, Nyɛ M bɔɔt, Nyɛ n da ke ka N ŋwũ namehug ŋwan na nii; ka la lee iŋ a aa Nyɛ M bɔɔt se'em la, ka ka Mam N bɔɔt se'em?>> [43 Ka Na'ayen maleka zɛ'ɛn saazugu tã U sa'ani na pa'ah U paŋ.

44 U putẽtoora da bah ka U malegum po'oh gaat yela, ka murigir so U ka kpa'agit tɔɣɔhit teŋ a aa ziim la.]

45 Un da po'oh ka dɔɔ leb U nya'andolib la sa'ani la, U da nyɛ ka ba dɔ' mi gbĩhit, ba sũsa'auŋ la zugu, 46 ka U bɔ'ɔh ba yii, <<Yela ka ya gbĩhira? Dɔɔ mi ni ya po'oh ka be'eog gãkir la da paa ya?>>

47 Yezu da kpelim be ni tɔɣɔt la, ba di'i ka nirikooŋ paagit na, ka so n bɔɔn Geudas, a U nya'andolib piiga ni bayi la nkɔ̃ la, gaat tɔɔn dol ni ba paagit na. U da paa Yezu sa'ani yi u kɔk U; 48 ka Yezu yel u yii, <<Geudas, la a la kɔkir ka i nan zaŋ dɔ̃r Asaal Dawɔɔgaa?>>

49 Seba n da zɛ niŋa ka nyɛ se'el n it la, da bɔ'ɔh mi yii, <<Daana, ti kɛ' ba ni so'o laa?>> 50 Ka ba nkɔ̃ fɔɔ so'o pɛhig malema kpɛɛnam la nkɔ̃ da'abir dituŋ tobir bah.

51 Ka Yezu yel u yii, <<Da le pa'ah dii.>> Ka kalim u tobir la ka di leb tabel.

52 Ka Yezu pana yel kpɛɛnam la, ni yen po'ohug dobil zab-zabirib kpɛɛnam, ni yizut kpɛɛnam la n tana yi ba gbã'ã U la yii, <<Yibo ka ya yina ni so'oh ni dambana a aa Mam a la naɣayiiga? 53 Mam n daa be ni yam po'ohug doogin la daar woo la, ka yam pu gbã'ã Mam, ka la a la sankãã la wa n a lik paŋ saŋa wa!>>

54 Ba da gbã'ã U tar yɛ la malema daan-kpɛɛm la yir, ka Pita be nya'aŋ zãã ha dol ba. 55 Ban da laŋ buɣum ndɔuŋ tinsok kaa bu zĩ la, ka Pita tana laɣun zĩ ni ba. 56 Ka bompuŋ n a pɔɣɔsɔɔg, nyɛ Pita buɣum la ni, beh u ki'i ka yel yii, <<Bura-kãã la wa mi ni dol Yezu mi?>>

57 Ka Pita ki'ih yel yii, <<Bompɔkaa, mam pu mi U?>>

58 Ka la iŋ bɛ'ɛla, ka so mi nyɛ Pita ka yel u yii, <<nyɛ mi a la ba nkɔ̃?>>

Ka Pita lebih yii, <<Buraagaa, mam pu pa'ah ba nii!>>

59 Ka la iŋ aa gogo mumir dikɔ̃ la, ka bura-se'e mi yel yii, <<Sera, bura kã'ã la wa ni be mi ni Yezu, u yila Galili na?>>

60 Ka Pita yel yii, <<Buraagaa, mam zi nyɛ n tɔɣɔt se'el laa!>> 61 Ka Daan la ŋmɛrig beh Pita. Ka Pita tẽẽ Daan la yelehum la yii, <<Nɔrɔɔg kun kaah zinaa, lan ka nyɛ n ti ki'ih butã yi i pu mi Mam?>> 62 Ka Pita yi yeŋ ti fiɣimit ni nkuma.

63 Burase'eh n da gur Yezu la, da pĩ'ĩl kɛhir U ka ŋmɛ'ɛr U; 64 ba ni pĩ la U nini ka bɔ'ɔhit U yii, <<Bok ma! Ɔni n ŋmɛ'ɛ i wa?>> 65 Ka kɔ'ɔn to'ot U pɛsi pɛsi.

66 Beog n da yelig la, ba da laɣah kpɛɛnam, ni malema kpɛɛnam, ni gban-mi'irib, tar Yezu tã ba kpɛ'ɛnam kootin la na, 67 Ka yel U yii, <<Nyɛ n a la fããt la, nyɛ n yelim ti?>>

Ka U lebih yii, Man N yel ya, ya kun sak seraa; 68 ka Mam bɔ'ɔh ya se'el, ya kun lebihe. 69 Ka nan-nan na, tar yɛ ha, Asaal Dawɔɔ la nan zĩ la Na'ayen paŋ waabi Daan la dituŋ nu'ug?>>

70 Ka ba zã'ã bɔ'ɔh U yii, <<Ka Nyɛ n pana a Na'ayen Dawɔɔ laa?>>

Ka U lebih ba yii, <<Yam n yel yi N a mi?>>

71 Ka ba yel yii, <<Yelehum boni ka ti le ɛɛt ya'aha? Ti wom di U mɛŋ nɔɔrin!>>