1 La da pu wuuge, ka Yezu da ɛɛt tenkãra ni tembibih ni, tɔɔn Na'ayen tensoŋ yelesoma la tɛt nirib. U nya'andolib pii ni bayi la da be ni U mi, 2 pa'ah ni bompɔɣɔse'eh ka u da kar ba kolekpãbɛ'ɛh bee teb ba bã'ãh buuri buuri la. Mɛɛri ka ba da bɔɔn Magdalin, so ka U da kar kolekpãbɛ'ɛh siyopoi yih u ni la, 3 Geoana n da a Kuza pɔɣɔ ka a Hɛrɔd ntomit la ni Suzana ni ba taab baseba berigu, bompɔɣɔha n da a seba n diihit ba, ka laɣun tet ba se'el woo ka ba bɔɔt ni ba mɛŋ nɔtatim.

4 Nirikooŋ n da yi kateŋ kateŋ tana la, U da zaŋ maɣahir yel ba yii; 5 <<kpaat n da bor u bomboora, ka baseba lu sɔya zut ka nirib nɔ ba ka niih mi di baseba. 6 Baseba mi lu kuga zugu, ka ba nyaɣa pu nyaŋ sigi teŋa, ka ba koolim kpi, kɔ'ɔm n pu paa ba la zugu. 7 Ka baseba lu gɔ'ɔh ni ka gɔ'ɔh la zɔ'ɔ nyaɣɛ ba. 8 Seba mi da lu la ntan somit zugu, nyaŋ zɔ'ɔ somma, wol wola kɔbih kɔbih?>>

Un da tɔɣɔ ba'ah la, U da yel yii, <<So n tar toba yi u wom un womih ma!>>

9 Ka U nya'andolib la da bɔ'ɔh U yii, maɣahira vɔ̃ɔ̃r a la nani. 10 Ka U yel ba yii, <<N zaŋ Na'ayen yelese'a n sɔɣɔ la tɔɣɔ pa'al yam, ka seba mi, N zaŋa maɣaha tɔɣɔ te ba,

ba nan behit ka kun nyɛɛ,

ba nan womihit ka kun bɔke.>

11 Maɣahir la vɔ̃ɔ̃r n a se'em n ŋwala: Bomboora la a la Na'ayen yelehum. 12 Seba n lu sɔr zugu la, a la seba n wom; ka sitana pĩ ba sũya, ka ba pu sak sera ka kun nyɛ fããgir la. 13 Seba mi n lu kuga zugu la, a la seba n wom yelehum la ka dɛ'ɛ ni popeelum. Amaa bam pu tar nyaɣa la, ba sera sakir la pu wuugira, makir n ti paa na ba luu pu tɔɔ. 14 Ka seba n lu gɔ̃'ɔ̃h ni la, bam ŋmani ni seba n wom yelehum la ka nam, ligiri ni vom nyaɣahum nɔŋir n bah ka bam pu nyaŋ wole. 15 Ka lan a seba n lu ntan somit niŋa la, bam a la seba n ni wom yelehum la, tar kankaŋ ni yelemɛɣir ni sũsomir, tar suguru ni ŋmibig ti wol wola.

16 <<So pu be nan laŋ kania ka zaŋ peog vugule, bee zaŋ sɔɣɔ garug leoŋ nii, u nan zaŋ yaɣɛl zĩse'e ka nirib n kpɛ̃ doog la ni, ba nan nyɛt. 17 Se'el n so la, se'el pu be sɔɣɛ ka nir kum baŋɛ. 18 Yela, iŋim ki'i ka baŋ nyɛ n nan womih se'em, se'el n so la, nutatim bee laɣɛt pa'ah la bondaan ka seba n pu tar se'el la, hali ni bam poɣum tar se'el la, ba nan kɔŋ la.>>

19 Yezu ma ni U sɔ̃ɔ̃t da tana yi ba nyɛ U, amaa ba da pu nyaŋ paa U sa'ani, nirib la n da ba zɔ'ɔ mikit la zugu. 20 Ka ba da yel U yii, <<I ma ni I sɔ̃ɔ̃t n zɛ yeŋ bɔɔt yi ba nyɛ I.>> 21 Ka U yel ba yii, <<Mam ma ni N sɔ̃'ɔ̃t a la seba n womit Na'ayen yelehum la, ka mi tar bu tomit?>>

22 Daar dikɔ̃ ka U da kpɛ̃ ããruŋ ni, ni U nya'andolib la, ka da yel ba yii, <<Bah mi ka ti yak mɔɣira yakin dee ha?>> Ka ba pĩ'ĩl yɛ, 23 ka ban da yɛ yakit mɔɣir la, Yezu da zɛɛ gɔ'ɔm gbĩhit. Sambekãt da vuk na pĩ mɔɣir la ka kɔ'ɔm sigit pɛ'ɛn ããruŋ la. 24 Ba da keŋ U sa'ani tãh kpɛ'ɛmir nɛɛ U ka yel yii, <<N Daana, N Daana, kɔ'ɔm ma dit ti mi!>> Ka Un da nɛɛ la U da tãh sambekãt la ni kɔmiih la, ka ba ma'a sininini ka zĩ'ĩ woo a bããlam. 25 U da bɔ'ɔh ba yii, <<Ya sera sakir lee?>> Dabɛɛm da sãã ba mi ka la iŋ ba pakir, ka ba yet taaba yii, <<ɔ̃ɔ̃ daan a la ɔni, hali ka sambeog ni kɔ'ɔm womit U tɔɣum ka dɛ'ɛgit bu?>>

26 Ba da paa la Garasenes teŋ, n be Galili yaɣir la. 27 Un da doot mɔɣir la ni na la, buraa ka kolekpãbɛ'ɛh dol n da to'oh U. Buraaga da a la bɛɛl ka mi pu kpɛ̃'ɛ̃t yir ni, u da dɔ la wɔɔt zĩ'ĩ. 28 Un da nyɛ Yezu la, u da lu la u nɔba ni, ka kaah baɣa baɣa yet yii, <<I tara lan it ni mam, Yezu, Na'ayen Se'er N gaat zã'ã Dawɔɔgaa? M belemit I mi, da mɛrim mam naa!>> 29 Se'el n so la Yezu da tãh kolekpãbɛ'ɛh la mi yi ba yi buraa la ni na. (Lan da ni ti gbirig u, ba da ni gur u mi ka ba' u ni bana, ka ni yela mɛŋ zã'ã u da ni kɛ̃h bana wa mi ka kolekpãbɛ'ɛha tar u yi sɛ̃ɣir ni ha.)

30 Yezu da pana bɔ'ɔh u yii, <<I wo'ore?>> U da lebih yii, <<Tam (ligin)>> — se'el n so la kolekpãbɛ'ɛh la da zɔ'ɔ u poŋin mi. 31 Ka ba belim U yi U da kar ba ka ba yi leb boɣokãt la ni.

32 Sankaŋ ma'a la Kurikurinam berigu n da ɛɛt zɔɔr la labin dit, ka kolekpãbɛ'ɛh la da soh Yezu yi U bah ka ba kpɛ̃ kurikurinam la. Ka U da sak teba. 33 Ka kolekpãbɛ'ɛha da bah buraa la ka keŋ ti kpɛ̃ kurikurinam la, ka ba da zo sigi mɔɣir la ni, ka kɔ'ɔm di ba.

34 Seba n kemit kurikurinam la n da nyɛ se'el n iŋ la, ba da zo mi kpɛ̃ teŋ la ni, ni tembibise'eh woo n kpɛ ba la ti n tɔɔlum se'el ka ba nyɛ la zã'ã te ba. 35 Ka nirib da yina yi ba beh se'el n it, ka ban da paa Yezu sa'ani la, ba da nyɛ burase'e ka kolekpãbɛ'ɛh dol la n zĩ Yezu nɔba bɔba, yɛ fuug ka u yam leb na. Dabɛɛm da gba'a ba mi. 36 Seba n da be ni ka nyɛ lan iŋ se'em la, da tɔɣɔ pa'al ba buraaga n da nyɛ u fããgir la se'em. 37 Ka Garasenes ni ka kɔrun - kɔrum nirib la zã'ã da yel Yezu yi u keŋ ka bah ba, den zugu, dabɛkãt n da gbã'ã ba. Yela ka U da kpɛ̃ ããruŋ la ni tulig leb. 38 Kolekpãbɛ'ɛh la n yi burase'e ni la, da soh Yezu yi U bah ka u dol U, amaa Yezu da yel u yi u keŋ, ka yet u yii, 39 <<Lebim kul, ni i ti bah ka nirib wom Na'ayen n tom se'el te i?>> Buraaga da keŋ, tɔɔn teŋ la zã'ã kaagit, yet Yezu N tom se'em te ɔŋ.

40 Yezu n da tulig leb la, nirikooŋ la da to'oh U mi ni popeelum, ban da gur U la zugu. 41 La da pu wuuge ka buraa wo'or n bɔɔn Gayirus, so n da a tɔɔn-gat be Yen po'ohug dobil la ni la da paa na. U da lu Yezu nɔba ni ka belim yi U tã u yir na, 42 u biyeŋ, bompuŋ n a wom pii ni ayi, n da dɔ bẽ'ẽt yɛ kum.

Ka Un da ken la nirib la da mikirin nɔɔt taaba nɔba dol U. 43 Bompɔk kakɔ̃ mi n da be sigi sɛɛ ka ka pu kãhigira ti paa wom pii ni ayi; ka da sãɣam ka laɣat zã'ã dol teb-nam, ka ba so da pu nyaŋ teb u wa. 44 U da dolih Yezu nya'aŋ ti kalim U fuug, nila nila ka ziim la ŋmaa.

45 Ka Yezu da bɔ'ɔh yii, <<Ɔni n si'ih M ma?>> Ka nir woo n da ki'ih la, Pita da yel u yii, <<N Daana, niriba n zɔ'ɔ se'em kaa I bah tinsok da'at taaba se'em maa?>>

46 Ka Yezu yel yii, <<So n si'ihum, se'el n so la M baŋ yi paŋ yi N sa'ani?>> 47 Bompɔk la n da baŋ yi u kun le nyaŋ sɔɣɔ la, u da yi mi na gbi'it ka lu Yezu tɔɔn; ka yet nirikooŋ la se'el zugu ka u si'ih U la. U da yel ba yi un si'ih U la u bã'ã la bah u mi nila nila. 48 Yezu da yel u yii, <<M pɔɣɔwɔɔga, i sera sakir la teb i; kem ni suma'ahum?>>

49 Un da nan be ni tɔɣɔt la, so da zɛ'ɛl kpɛ'ɛm la yir tana yel yii, <<I pɔɣɔwɔɔ la kpi ya; da le nɔŋ yi i daam pa'ala ya'aha?>>

50 Yezu n da wom yel la, U da lebih yii, <<Da zot dabɛɛm. Sakum sera, ka u nan nyɛ fããgir?>>

51 Un da paa yir la ni la, U da pu sak ka so dolih U kpɛ̃ doog la nii; Pita, Geon, ni Gemis zaŋ bii la ba' ni u ma' ma'a n da dol kpɛ̃. 52 Ba zã'ã da kumiri ka si'imit kum la zugu; amaa Yezu da yel ba yii, <<Da kumiri nii; se'el n so la, u pu kpi'i ka u gbihirin mi.

53 Ka ba da la'at U, ka mi yi u kpi mi. 54 Ka U da gĩ u nu'ug ka bɔ'ɔl u yii, <<Biiga, dɔɔ ma!>> 55 Ka ka vom la da leb na, ka u vaa dɔɔ kalam. Yezu da yel ba yi ba te u se'el ka u di. 56 La da iŋ u dɔɣɔrib la la pakir, amaa U da yel ba yi ba da bah ka so wom se'el n iŋaa. ✝