1 Daar dikɔ̃ ka Yezu da yɛ Farasiinam la kpɛ'ɛm yir, yi U ti di Na'ayen po'ohug daar, ka ba da dol U nɔba fɛ̃t fɛ̃t. 2 U da nyɛ U tɔɔn, ka bã'ãt n a buraa zɛ, ka u nu'uh ni nɔba foohum. 3 Ka Yezu da bɔ'ɔh wara mi'irib la ni Farasiinam la yii, <<La tar sɔr yi i teb nirib Na'ayen po'ohug daar bee la ka'a?>> 4 Ka ba sin. Ka Yezu da gĩ bã'ãt la paa U tɔɔn teb u, ka yel yi u kem kul.

5 Ka pana da yel ba yii, <<Ya ɔn n tar bii bee lɔlig ka ka lu bulik ni, Na'ayen po'ohug daar ka u daan kun zo kalam ve'eg u dona?>> 6 Ka ba kɔŋ lebihug.

7 Un da nyɛ nirib la n lɔɔhit na'ahidem zĩ'ĩh la, U da te ba la maɣahir. 8 <<Bam bɔɔl i pɔɣɔdir kibih ni yi i tana di, da paa zi'in na'ahidem zĩ'ĩha la nii, ka daase'ere, kibih la daan bɔɔl zugudaan so' n gaat nyɛ; 9 ka so n bɔɔl ya zã'ã la, tɔ'ɔn tana yel i yii, <Dɔɔma ka ɔ̃ɔ̃ zi'in niŋa,' ka i pana dɔɔ lebit tarenam zĩ'ĩ la ni faɣahum. 10 Ka bam bɔɔl i zĩ'ĩ ka i paa, kem ti zi'in nya'aŋ bee teŋir zĩ'ĩha la ha, ka kibih daan la n ti paa na, u nan yel i yii, <<N zɔɔ, dɔɔgum do kpela na; niŋa ka i pana nan dɔɔ ni na'ahi doot ka niriwoo won i. 11 Seba woo n zɛ̃kit ba mɛh, nan nyɛ sirigir, ka seba woo mi n sirigit ba mɛh, nan nyɛ zɛ̃kir?>>

12 Ka Yezu yel kibih daan la yii, Nyɛ n ti bɔɔn nirib yi ba di, da bɔɔn zɔnam bee i sɔ̃se'et bee kpɛse'eh n a bondaanama, seba mi n nan ti tɔ'ɔn bɔɔl nyɛ mi ka i keŋ ti di lerig i samire. 13 Ka nyɛ n tar kibih, bɔɔlim la tarenam, kaarena, wɔbih, ni fɔɔh. 14 Ka i nan nyɛ kamaalug, den zugo, bam n kun tɔ'ɔn leb wɔ i la, i nan ti nyɛ i wɔɔt la nivosoma vo'ogum dɔɔ daar la?>>

15 Kibih la saam la nkɔ̃, n da wom ŋwala la, u da yel yii, <<Zusondaan n a so n nan ti di boom Na'ayen Na'am yir la!>> 16 Ka Yezu yel u yii, <<So' n da iŋ u dikãt kibih laɣahug, ka bɔɔl nirib berug berug. 17 Ka saŋa la n da paa la, u da tom u da'abir yi u ti yel seba ka u bɔɔl la yii, <Kemi nan-nan na; ka ti maahum se'el woo ba'ah.>

18 Ka ba zã'ã a aa ba yel la taaba la, da yet u se'el n so ka ba kun nyaŋ tanaa. Yiiga daan la da yel yii, <N da la tam, ka la nar yi n keŋ nyɛ bu, dim suguru te m.>

19 Nkɔ̃ mi da yel yii, N da la lɔlekɔɔrih pii, ka yi m maɣah ba beh nyaa ba nan sak kɔɔ; dim suguru te m.>

20 Ka nkɔ̃ mi yel yii, <N nan di la pɔɣɔsaaŋ, den zugu n kun nyaŋ tanaa.>

21 Ka da'abir la da pana leb yel u daan la se'el woo n iŋ la. Ka u daan la sũũr da dɔɔ, ka u yel da'abir la yii, <Yim tempoŋi ha ti beh sɔya zut ni zĩ'ĩ woo bɔɔl nɔndem, kaarena, fɔɔh, ni wɔbih.>

22 Ka da'abir la da yel yii, <Naa, nyɛ n yel se'el la poɣun iŋ mi, ka fɔl kpelim be.>

23 Ka daan la leb yel da'abir la yii, yim sɔya ni ha, ti pẽrig nirib yi ba tana, bah ka n yira pɛ'ɛl. 24 Ka n yet i mi wa, seba ka m bɔɔl la, ba so kun lem diigaa.> >>

25 Nan-nan na, nirikooŋ n laɣan ken ni Yezu; ka U ŋmɛrig yel ba yii, 26 <<So woo n tã Mam sa'ani na ka pu kih u ba' bee u maa, pɔɣɔ bee biiga, sɔ̃ɔ̃t bee tɔ̃ɔ̃h, hali, ni u mɛŋ vom, kun tɔ'ɔn a Mam nya'andola. 27 So woo n pu zi u mpuur dɔɔg la dol Mam, kun tɔ'ɔn a Mam nya'andola.

28 Ya ɔni, n tar putẽ'ẽr yi u mɛ yitoɣoma, ka kun zi'in yiiga beh ligiri alɛ n nan sɛke, ka baŋ nyaa un pĩ'ĩl u nan nyaŋ ba'ah di be? 29 La n ka yelaa, ka u pĩ'ĩl mɛɛ ka pu nyaŋ ba'ahe, so woo n nyɛ nan la'ar u, 30 ka yet yii, <Ɔ̃ɔ̃ la wa pĩ'ĩl la mɛɛ ka pu nyaŋ ba'ahe.>

31 Bee na' ɔni, n nan yi u zab ni naso', ka kun zi'in yiiga maɣɛh u mɛŋ beh nyaa u nan nyaŋ ni u zabezabirib tuhu piiga, ka u taraan na tar zabezabirib tuhu pihiyi waa? 32 Un kun nyaŋe, la a la, zabezab bãã la n nan be zãã ha la, u nan tom nirib ka ba to'oh sa, ti belim ba ka ba zi'in pĩ'ĩl suma'ahum sɔ̃hug. 33 Ŋwala zugu la, ya so kun nyaŋ a Mam nya'andol la, u daan n pu zaŋ u laɣat zã'ã tehe.

34 Yaarum a somma; ka bu mahum n pu le ti bee, bu mahum la nan iŋa yela leb na? 35 Bu pu le a somma tet ntan bee buɣulugo; la a la ba zaŋ bu lob bah.

Bah mi ka so' n tar toba nan wom la womih!>>