1 Daar dikɔ̃, ka Yezu da be Na'ayen po'ohug dobil ni tɔɣɔt yelesoma pa'an nirib la, malemadem kpɛ'ɛnam ni gban-mi'irib la da dol ni kpɛɛnam na 2 yel U yii, <<Yelim ti, lan kpe'eoŋ ka nyɛ tar it yel-ãã la wa? Ɔni n te i kpe'eoŋa?>>

3 Ka U lebih ba yii, <<Mam mi nan bɔ'ɔh ya bɔ'ɔhug ka ya lebih: 4 Geon kɔ'ɔm soob la yi la tensoŋi na bee nirib pĩ'ĩla ni na?>>

5 Ka ba sɔ̃hit U bɔ'ɔhug la ni taaba yet yii, <<Ti n yel yii, <ku yi la tensoŋi na,> U nan yel yii, <ka yela ka ya da pu sak sera te u wa?> 6 Ti n mi yel yii, <La a la nirisaal pĩ'ĩla,> nirib la zã'ã nan lob ti ni kuga ko; bam n sak yi Geon da a la nɔdɛ'ɛhit la zugu?>>

7 Yela ka ba lebih yi ba pu baŋ ku n yi zĩ'ĩ naa.

8 Ka Yezu yel ba yii, <<Mam mi kun yel ya se'el kpe'eoŋ ka N tar tomit yel ãã la waa?>>

9 Yezu da pĩ'ĩl yet nirib la maɣah dee la wa: <<Buraa n da kɔ poog, zaŋ bah te u pogutib, ka keŋ tense'e ha ka la wuu. 10 Ka bunik saŋa n da paa la, u da tom u da'abir dikɔ̃ yi u keŋ u pogutib la sa'ani dɛ'ɛ u poog la tɔ̃t na te u; ka pogutib la gbã'ã da'abir la ŋmɛ sa'a bah ka u leb zaalim. 11 Ka poog daan la le maan tom da'abir dikɔ̃; ka ba da gbã'ã ɔŋ mi ŋmɛ ka to u, ka bah ka u leb zaalim. 12 Ka poog daan la sin ka tom so pa'ah butã; ka ba gbã'ã ɔŋ mi ŋmɛ poɣolum ka sa'a gu.

13 Niŋa ka poog daan la bɔ'ɔh u mɛŋ, <M pana nan iŋa yela? M baŋ se'el. N nan tom n mɛŋ dawɔse'e ka n nɔŋa; daase'ere ba nan na'ah ɔŋ.>

14 Ka pogutib la n da nyɛ u bii la, ba da yel taaba yii, <Bi kãã la wa n nan ti tɛɛ so pooga; yela, bah mi ka ti ko' u ka tɛɛ so ku.> 15 Yela ka ba da sa'agu tar yi poog la yeŋ ha ti ko'.

Poog daan la pana nan iŋ ba la yela? 16 U nan tana ko bam mi ka tɛɛ zaŋ poog la te seba?>>

Ban da wom ŋwala la, ba da yel mi yii, <<Na'ayen da sak ka ŋwala iŋe!>>

17 Ka U beh ba ka yel yii,

<Tɔɣɔ-boo la wa vɔ̃ɔ̃r a la: <Kuguse'ere ka mɛtib la zaɣah la,

n nan a ɛ̃ɛ̃bir kugire?>

18 So woo n lu kugu-dee la wa zugu, nan ŋma bur bur; ka din lu so zugu la mi, nan ŋma yɛrig sãi?>>

19 Ka gban-mi'irib la ni malema kpɛ'ɛnam la n da baŋ yi maɣahir la gɛ̃ɛ̃ha bam la, ba da bɔɔt yi ba kɔ'ɔn gba'a U la sankaŋa, ka lee da zot dabɛɛm nirib la zugu.

20 Ba da gur U mi ka tom lɛɣɛh-nam na seba n da niɣimit a aa nir-soma la, ka sɔɣɔ behit ban nan iŋ se'em gba'a U dol U tɔɣum la ni, tar U ti te gãkir dem ni teŋ la gɔmena la. 21 Lan ka ba bɔ'ɔh U yii, <<Pa'ala, ti mi yii, I tɔɣɔt ka pa'an na laan dol sɔr ka pu bɛɛgira, I pu gãhit nirib I tɔɣuma nii, I pa'an na Na'ayen sɔr la yelemɛŋir n a se'em. 22 La tar sɔr yi ti wɔɔt lempoo tet nakãt Siiza la bee la ka'a?>>

23 Yezu da baŋ ba niɣuŋ la ka yel ba yii, 24 <<Pa'al mi nim laɣa-kɔ̃bir. Ɔni wo'or ni u zugu foto m be ni wa?>>

Ka ba yel yii, <<La a la Siiza?>> 25 Ka U yel ba yii, <<Zaŋ mi se'el n a Siiza bon te Siiza, ka zaŋ se'el n a Na'ayen bon mi te Na'ayen.>>

26 Ba da pu nyɛ se'el ka ba nan zaŋ bɛ̃r U nirib la tɔ'ɔn dol Un yel se'el la; U lebihug la mi da a la pakir te ba ka ba yar sin.

27 Saduusis dem, n pu sakit yi kum poŋi vo'ogir be la baseba da tã U sa'ani na 28 ka bɔ'ɔh U yii, <<Pa'ala, Moozis da golih te ti yi buraa sɔ̃ɔ̃g n kpi, ka bah u pɔɣa n ka biihe, buraa la tɔ'ɔn di pɔkɔ̃ɔ̃r la dɔɣɔ biih te u sɔ̃ɔ̃g la. 29 Nan-nan na, sɔ̃ɔ̃t bayopoi n da be; ka yiiga daan la di pɔɣɔ; ka kpi ka pu tar biiga; 30 ka so n taɣel buyi la 31 ni butã daan la mi di ka, ka la iŋa yela ka buraah siyopoi la zã'ã di pɔkɔ̃ɔ̃r la tɛɛh ka kpi ka ka ka' biiga. 32 Nya'aŋ ka bompɔk la mi kpi. 33 Kum vo'ogir daar la, ba ɔni pɔɣɔ n ti a bompɔk la, ka ba bayopoi la di ka tɛɛha?>>

34 Yezu lebih ba yii, <<Nirib m be teŋa zugu la n dit pɔɣɔb ka ɛn serib; 35 ka seba n nan vo'o kum poŋi kpɛ̃ tensoŋi la, kun ti dit pɔɣɔb bee ɛn seriba; 36 Sera la aa bam ku n le kpi ya'aha, bam nan ŋmani ni Na'ayen maleka nam la ka a Na'ayen biih, vo'ogum dɔɔ kum poŋi la biih. 37 Lan a la kum vo'ogir yel la, Moozis mɛŋ da golih la yela pa'al yi la be sanse'e ka buɣum da dit mɔɔg la, zĩ'ĩ ka Moozis da tɔɣɔt u Daan la yela yii, U a la Ebraham Na'ayen, Aizik Na'ayen, ni Gekɔb Na'ayen la. 38 Nan - nan na U ka la kpi'inam Na'ayene, U a la baan vo Na'ayen, Ɔŋ sa'ani ka nir woo tar ŋwɔ̃vom?>> 39 Ŋwala ka gban-mi'irib la baseba lebih yii, <<Pa'ala, I tɔɣɔ somma?>> 40 Ba da pana zot yi ba le bɔ'ɔh U se'el ya'ah.

41 Ka U da yel ba yii, <<Yela ka nirib yet yi Fããt la a la Devit dawɔɔga? 42 Ka Devit mɛŋ yel Wooma gbauŋ la ni yii,

<Daan la yel mam Daan la yii, <<Zi'inim m dituŋ nu'uga,

43 gur ka n ti bah ka i dindem la lebig i nɔba kok.>> >

44 Devit bɔɔn Yezu la Daan; ka yela ka Yezu nan a Devit dawɔɔga?>>

45 Nir woo toba ni, U da yel U nya'andolib la yii, 46 <<Baŋ mi gban-mi'iriba yela, seba n gin kaagit ni fuwɔɣa wa, bam nɔŋa nirib n dɔ̃ben teŋ po'ohit ba da'ah poŋi, ka nɔŋ ba zi nindaagin-dem koɣih zut dɛ'ɛnkãra poŋi. 47 Ba ken saahira pɔkɔ̃ya yɛ', ni bam bɔɔt yi nirib nyɛt ba la zugu, ba po'ohug a la po'oh-wɔɣa. Ba nan nyɛ la sããhekãt n gaat zã'ã?>>