1 Yezu, n da pɛ'ɛl ni Vo'ohun Som Sii la, da zɛ'ɛn Geɔdan leb na ka Sii la tar U keŋ sɛ̃k la ni ha, 2 zĩkaŋ ni ka sitaana da mak U dabiha pihinaahi. U da pu di se'ela dabih aŋ nii, ka nɔlor la n da ba'ah la, U kom n da pana dumit. 3 Ka sitaana la da yel U yii, <<Nyɛ N serin a la Na'ayen Dawɔɔ, bahum ka kugira lebig boruboru?>>

4 Ka Yezu lebih u yii, <<La poɣun golih yii, <Nirisaal pu vo diit ma'a zugo.> >>

5 Ka sitaana la tar U do ha ti pa'al U kpela kpela so'olum nam la n be tengbauŋa zugu la zã'ã. 6 Ka yel U yii, <<N nan zaŋ so'olum nama ni ba kpe'eoŋ zã'ã te I; ka ba zaŋ se'el woo te la mam, ka mam mi tɔ'ɔn zaŋ te so woo ka n sũũr nɔŋ. 7 Ka Nyɛ n nan na'ah mam, se'el woo nan a I den?>> 8 Ka Yezu lebih u yii, <<La golih dɔ' yii, <Na'ahum ti Daan Na'ayen, ka tomit tet Ɔŋ ma'a.> >>

9 Ka sitaana la zaŋ U keŋ Geruzalɛm, ti do yendoog la mɔpil-ŋwũ'ũ zugu ha, ka yel U yii, <<Nyɛ N a la Na'ayen Dawɔɔ, zaŋim I mɛŋ zɛ'ɛl kpela fãb teŋ ha, 10 ka la golih yii,

<< <U nan bah ka Na'ayen malekanam tã I sa'ani na,

gu I,' ka

11 <Ba nu'uh nan gi I zɛ̃k,

ka kugir kun mak kalim I nɔbire.> >>

12 Yezu da lebih u yii, <<La mi golih yii, <Da mak I Daan Na'ayene.> >>

13 Sitaana n da ba'ah ni u makir nam la, u da keŋ ka bah U gur un nan ti le nyɛ fɔl.

14 Ka Yezu, n da pɛ'ɛl ni Sii la paŋ la, da leb Galili teŋ, ka tɔɣum yit U yela ni na tii teŋ la ni ka kɔrunkɔrum la zã'ã. 15 U da pĩ'ĩl pa'an yendobibih la ni ka so woo da pɛ̃ɣɛt U.

16 Un da leb Nazarɛf na la, zĩse'e ka u da zɔ'ɔ la, u da keŋ yendobibih la ni vo'ohug daar la, a aa Un da poɣun ni it se'em la. La n da paa yi U kããl la, 17 ba da zaŋa Azaaya Na'ayen nɔdɛ'ɛh la gbauŋ te U. U da wo'o gbauŋ la nyɛ zĩse'e ka la golih yii:

18 <<Daan la Sii n be ni Mam,

se'el n so la, U kamaal Mam mi

yi N tar yelesoma na te nɔndem.

U tom Mam mi yi N tɔɔlum fããgir tet seba n be bobir ni,

ni nin-nɛɛgir te zɔ'ɔnam,

ka bah ka seba m be mugir poŋi nyɛ fããgir,

19 yi N tɔɔlum Daan la sũnɔŋirum womir la?>>

20 U da wo' gbauŋ la, zaŋ lebih te didaar ntomit la, ka zi'in. Ka seba woo n da be yendobil la ni la, kpã won U zĩĩ. 21 Ka U da pĩ'ĩl yet ba yii, <<Zina wa se'el ka ba golih ka N kããl ka ya woma a la mɛɣɛla?>>

22 Nirib la zã'ã da Pɛ̃ɣɛt U mi ka la mi iŋ ba pakir ni yelesonse'a n yit U nɔɔrin na la. Ka ba pana bɔ'ɔhit yii, <<La ka Geuzɛf dawɔɔ la n laa?>>

23 Ka U yel ba yii, <<Yam nan ti sak sera N maɣahira ni yii, <Dɔɣɔta waa, tebum i mɛŋ!> Ka ya nan yel yii, <Iŋim kpela mi I mɛŋ teŋa yelese'a ka ti wom yi I tom a Kapanaum teŋ la.> >>

24 Ka U yel yii, <<Yelemɛŋir ka N yet ya wa, Na'ayen nɔdɛ'ɛh pu be ka ba dɛ'ɛgu nu'uh siyi u mɛŋ teŋa. 25 Ka yelemɛŋir la a la, pɔkɔ̃ya da zɔ'ɔ mi Izirɛal teŋ Ilaagɛ saŋa la, sanse'e ka saa da pu nii ka la paa woma atã ni ŋmaar siyoobi la, ka kon-nyaliŋ da sigi teŋa zã'ã la; 26 ni yela mɛŋ zã'ã ba da pu tom Ilaagɛ ba so sa'ani, la n ka pɔkɔ̃se'er n da be Zarifat Sidom teŋi laa. 27 Nkɔma mi da zɔ'ɔ Izirɛal teŋa mi Na'ayen nɔdɛ'ɛh Ilisa saŋa la, ka ba so da pu nyɛ u tebugo, la n ka Neeman n yi Siiriya teŋ na laa?>> 28 Ba n da wom ŋwala la, seba woo n da be yendobil la ni la, sũya da dɔɔ mi ka la ka makire. 29 Ka ba da dɔɔ, sa'a Yezu yi teŋ la ni, tar U do zɔse'er n beŋ ba teŋ la lebih na la yi ba da'a U bah bok ni ha. 30 Amaa U da yɛɛ la ba tinsok keŋ gaat un yɛ zĩ'ĩ la.

31 U da keŋ sigi la Kapanaum, tense'e n be Galili la, ka da pa'an ba, la mi da a la vo'ohug daar. 32 La da iŋ ba la pakir ni U pa'alug la, se'el n so la, kpe'eoŋ n da be U tɔɣum la ni.

33 Burase'e da be yendobil la ni ka kolekpãbɛ'ɛ kpɛ̃ u, ka u da kaahit ni nkɔr kpɛ'ɛmir yet yii, 34 <<Bahum ti bããlam! I tar la nan yi I iŋ ni ti? Yezu Nazarɛf niraa? I tana yi I sãɣum ti mii? Mam mi nyɛ N a so, I a la Na'ayen kassi Daan?>> 35 Amaa Yezu da tãh u mi, yet yii, <<A bããlam, ka yi u sa'ani na!>> Kolekpãbɛ'ɛga da da'a buraaga bah ba tɔɔn, ka yi ka bah u ka pu sãɣam uu.

36 La da iŋ ba zã'ã la pakir ka ba yet taaba yii, <<Nan bon tɔɣum n ŋwala? Tɔɣɔse'eb n tar kpe'eoŋ ni paŋ tɔ̃ sa'ahit kolekpãbɛ'ɛh ka ba yit na!>> 37 Ka U tooma wa yela da tii zĩ'ĩ woo teŋ la ni.

38 Un da bah yendobil la ni la, U da kpɛ̃ la Simɔn yir. Simɔn dɛɛmpɔk da gbi'irin ni ɔɔt, ka ba da yel Yezu ka yel. 39 Ka U da keŋ u sa'ani ti zɛrig ɔɔt la, ka ti bah u. Nila nɔɔ ka bompɔk la da dɔɔ ka saam ba.

40 Wuntɛɛŋ n da lut la, seba nirib n da bẽ'ẽt ni bã'ãh buuri buuri la, ba da tar ba tã Yezu sa'ani na; ka U da zaŋ U nu'ug pa'al ba zut ka ba nyɛ ba tebug. 41 Kolekpãbɛ'ɛh da yi nirib berigu niŋa mi na, ka yet ni nkɔr kpɛ'ɛmir yii, <<I a la Na'ayen Dawɔɔ la!>> Amaa U da tãh ba mi ka pu sak yi ba tɔɣɛ, se'el n so la, ba da mi yi Ɔŋ n a Fããt la.

42 Ka beog n da yelig ba'ah la, U da bah ba mi ka keŋ zĩse'e ka nirib pu bee. Ka nirikooŋ la da ɛɛt U; ka ba n da paa U la, ba da bɔɔt yi ba gu U mi ka U da keŋ ka bah baa. 43 Amaa U da yel ba yii, <<La aa M pɛ̃rigir toomir yi N tɔɣɔ Na'ayen yelesoma la te tense'e n kpelim la mi; yel dee la zugu ka Na'ayen da tom M na?>> 44 Ka U da kpelin tɔɣɔt Na'ayen yelesoma la Geudiya yendobibih la ni.