1 U da po'ohirin zĩ'ĩ kakɔ̃, ka Un da po'oh ba'ah la, U nya'andolib la nkɔ̃ da yel U yii, <<Daana, pa'alim ti po'ohug, a aa Geon n da pa'an u nya'andolib la se'em la?>>

2 Ka U yel ba yii, <<Yam m po'ohit, yan yel yii:

Ba'a,

I wo'or zɔ'ɔ mi ni pɛ̃ɣɛb.

I na'am so'olum la tana,

3 Tem ti dabihir woo ti nɔɔr dii.

4 Ka di ti yelebe'et suguru te ti,

a aa tam mi n dit suguru te seba woo

n tom taal gɛ̃'ɛ̃h ti se'em la.

Ka da tar ti paa gãkir saŋa laa.

5 Ka Yezu yel ba yii, maɣah wuu ya so n tar u zɔ, ka keŋ u sa'ani wo'ontasoo saŋa ti yel u yii, n zɔɔ, peŋim mam boruboru batã; 6 ka n zɔ n tã n sa'ani na, ka m mi pu tar se'el n nan te u wa.> 7 Ka u be u doog ni ha ka lebih yii, <Da daam mam; doog koliŋ la poɣun deŋ wo' mi, ka mam ni m biih dɔ gbihit; n kun nyaŋ dɔɔ zaŋ se'el te i ya.> 8 Mam yet ya mi wa, un poɣun kun dɔɔ te u se'el la, ɔŋ n a u zɔ la zugo, u bolig la zugu, u nan kpelin dɔɔ te u se'el woo ka u bɔɔt la.

9 Yela la N yet ya mi wa, Bɔ'ɔh ma, ka i nan dɛ'ɛ; Ɛ ma ka i nan nyɛ; ŋmɛ'ɛm koliŋ la, ka ka nan wo'o te i. 10 So woo n bɔ'ɔhit, nan dɛ'ɛhit, Ka so woo n ɛɛt, na nyɛt, ka so woo n ŋmɛ'ɛt koliŋ la, ka nan wo'ohit.

11 Ya so be ti tinsok kpela ka u bii nan bɔ'ɔh u ziŋ yel, ka u zaŋ bombɛ'ɛ te u ka ka ziŋaa? 12 Bee bii la nan bɔ'ɔh gel yel, ka u zaŋ naŋ te u? 13 Yam n poɣun lɔr ni se'em mi, ya mi bonsomila mi tar te ya biih, la pana nan iŋ la yela, ka Ba' la N be tensoŋ na'am yir la, kun te seba n bɔ'ɔhit la, Vo'ohun Som Sii la!>>

14 Sankãã la wa, U da kat la kolekpãbɛ'ɛ yi ka yi, ka ka sin digi digi; kan da yi ba'ah la, ɔŋ so n da sin digi digi la, da ya'a nɔɔr tɔɣɔt, ka la da iŋ nirikooŋ la pakir. 15 Amaa ba seba da yet yii, <<U tar la Beelzebul so n a kolekpãbɛ'ɛh na'ab la paŋ kat kolekpãbɛ'ɛh la yihit nirib la ni?>>

16 Seba n bɔɔt yi ba mak U beh la, da zɛ mi yi U te ba yelemaan n zɛ'ɛl saazugu na.

17 Ka U da baŋ ban tẽ'ẽhit se'em la mi, ka yel ba yii, tense'e woo n bɔɣɔh ba mɛŋ zabit, nan lebig daboot, ka yir lut yir zugu. 18 Sitaana mi n bɔɣɔh u mɛŋ, u so'olum la nan iŋa yela zɛ'ɛle? Yam yel yi Mam tar la Beelzebul paŋ kat kolepkãbɛ'ɛh. 19 Nan-nan na, Mam N kat kolekpãbɛ'ɛh ni Beelzebul paŋ, yam dol nan-taah la tar la ɔn paŋ kat ba bahit la? Yela la bam n nan a seba n nan gãkit tet ya. 20 Ka lan a la Na'ayen nubil paŋ ka N tar kat kolekpãbɛ'ɛh la, la pa'al yi Na'ayen tensoŋ na'am la tã ya sa'ani na.

21 Paŋ daan n yɛ zabir laɣɛt gur u yir, u lauk kun borige. 22 Amaa so' mi paŋ n gaat u daan ka zab nyaŋ u ka fãã u zabir laɣɛse'et n te u paŋ la, u nan nyaŋ yerig u laɣɛt la bah.

23 So woo n pu be ni Mam a la N dindaan, so woo n pu kã'ãhit ni Mam, yerigit mi.

24 <<Kolekpãbɛ'ɛ n yi nir poŋi, u ɛɛt la zĩse'e ka kɔ'ɔm ka'a behit zĩse'e ka u nan vo'oh, u mi kun nyɛ. Ka u nan yet yii, <N nan leb la yise'er ka n daa yi na la.> 25 Un paa di ni, u nan nyɛ yi di piih mi ma'al ma'al dɔ wolam. 26 U nan pana leb ti tar kolekpãbɛ'ɛh siyopoi n lɔr gaat ɔŋ mɛŋ na pa'ah ka ba kpɛ̃ ningbiŋ la niŋa; ka nir la anim nan lɔr gaat un daa a se'em yiiga la?>>

27 Sanse'e ka U da yet ŋwala la, ka bompɔk zɛ'ɛl nirikooŋ la ni ãrig nkɔr kpɛ'ɛmir yet yii, <<Kamaalug be ni pose'er n da zi I la, ni bĩ'ĩh se'a m mɔɣɔh I la!>>

28 Ka U lebih yii, <<Kamaalug toɣum be mi ni seba n wom Na'ayen yelehum la ka sak te bu!>>

29 Nirikooŋ la n da ti laɣah zɔ'ɔgit pa'ahit la, U da pĩ'ĩl yet yii, <<Zomaan-kãã wa a la be'et zomaaŋ; ka ɛɛt la dããluŋ, amaa ka kun nyɛɛ lan ka Geona dããluŋ la ma'a. 30 A aa Geona n da lebig dããluŋ tet Ninevedem la, yela nɔɔ ka Asaal Dawɔɔ la nan a tet zomaaŋa. 31 Teŋir pɔɣɔna'ab nan dɔɔ gãkir daar la ni zomaan-kã'ã dem ka zɛrig ba, den zugu u da zɛ'ɛ la teŋ gbin ni na yi u womih Solomɔn yan som la, ka beh mi nii, se'el n gaat Solomɔn ni u yam la n ŋwala! 32 Nineve teŋ dem nan dɔɔ saazugu gãkir daar la ni zomaan-kã'ã niriba ka zɛrig ba, se'el n so la ba da ki'ih ba yelebe'et la Geona tɔɣum la ni, ka beh mi nii, se'el n gaat Geona n ŋwala!

33 <<So' pu be nan laŋ kania ka zaŋ ka sɔɣɔ zɛ'ɛl leoŋ nii, u nan zaŋ yaɣɛl la zĩse'e ka la nan nɛɛgit tet so woo n kpɛ̃'ɛ̃t na. 34 I niuh n a kania tet i ningbiŋ la. I niuh n tar nimma'ahum i ningbiŋ la zã'ã pɛ'ɛl mi ni peelim; ka bun ka nimma'ahum, i ningbiŋ la mi nan pɛ'ɛl ni ligir. 35 Den zugu, behim nyaa i peelim la n be i poŋin la nɛɛgit mi bee bu a la lika. 36 Ka lan a la i ningbiŋ la pɛ'ɛl mi ni peelim, ka lik pu be zĩ'ĩ zĩ'ĩga, ka nan pɛ'ɛl ni peelim, a aa kania peelim n nɛɛ se'em la?>>

37 Un da be ni tɔɣɔt se'em ma'a la, ka Farasiinam la nkɔ̃ da yel U yi ba keŋ u yir ti di; ka U da dol ni u ti kpɛ̃ ka ba zi'in yi ba di. 38 La da iŋ Farasii wa la pakir yi un nyɛ ka Yezu pu pɛɛ nu'uhe ka ma'ahum yi U di la.

39 Ka Daan la da yel u yii, Nan-nan na, yam Farasiinam ma pɛɛra ŋmana ni laah la nya'ah, amaa ya poŋin la pɛ'ɛl mi ni bɛ'ɛt ni putoog. 40 Yam gaana wa! La ka so' n da maal nya'aŋ la nɔɔ n maal poŋin la mi? 41 Yela la zaŋ mi se'el zã'ã n be poŋin la te nɔndem, ka beh mi, se'el woo nan a filam tet ya.

42 <<Bɔɔ nan nyɛ yam Farasiinam! Yam te Na'ayen pii kɔbig poŋi, se'el woo ka ya nyɛ a aa ki bee bonkɔ̃bit, ka toɣum bah yelemɛŋir ni nɔŋir tet Na'ayen; yel ãã n nar yi ya it, ka da lɔɔgin baseba la bahe.

43 Bɔɔ nan laŋ yam Farasiinam ma! Yam n nɔŋ yi ya zĩ birikina koɣih zugu Na'ayen po'ohug dobibih ni ka nirib it ya naa naa da'ah poŋin la.

44 Bɔɔ nyɛ ya! Yam n a aa wɔse'et n saa ka nirib nɔɔt gat ka pu mi la?>>

45 Wara gban-mi'irib la nkɔ̃ da lebih U yii, <<Pa'ala, Nyɛ n yet yel ãã wa, I to'ot ti mi n la?>>

46 Ka U yel yii, Bɔɔ nan laŋ yam wara gban-mi'irib ba! Yam n tar zitebiha n gaat zã'ã ziin nirib, ka yam ya mɛŋ pu zɛ̃kit nubil yi ya soŋ ba la.

47 Bɔɔ laŋ yam! Yam m mɛɛt Na'ayen nɔdɛ'ɛhirib seba ka ya yaanam da ko' la wɔɔt la. 48 Yela la ya a la sɛhira nam, ka mi nam ya yaanam n da tom se'em la; bam n da ko' ba la, ka mɛɛt ba wɔɔt. 49 Yela mi la Na'ayen yam la yel yii, <Mam nan tom N nɔdɛ'ɛhirib ni nya'andolib ba sa'ani na, ba nan ko' baseba ka gãk baseba ni ŋwɛlima,' 50 Ŋwala la, zomaan-kãã nan nyɛ gãkir yit Na'ayen nɔdɛ'ɛhirib la ziim la n da kpa'a teŋa pĩ'ĩlug ni na la, 51 zɛ'ɛn Abɛl ti paa Zakariya zi'im ni, bam seba n da kɔŋ ba vom kããbug nkuna la zut la. Ẽẽ, Mam yet ya mi wa, ba taal la dol la zomaan-kãã la wa.

52 Bɔɔ nan nyɛ yam wara gban-mi'iriba! Yam n zaŋ mi'ilim saafi la keŋ la; yam mɛŋ da pu kpɛ̃'ɛ̃, ka ya da gu' la seba n kpɛ̃'ɛ̃t la?>>

53 Un da yi yeŋ la, gban-mi'irib la ni Farasiinam la da daamit U mi ka bɔ'ɔh U yela berigu, 54 bɔɔt yi ba bɛ̃r U ni se'el ka U nan yel la.