1 Vo'ohug dabiha la dikɔ̃ ni ka Yezu ni U nya'andolib la da buugit poog ni gat, ka U nya'andolib la ãhit ki la ŋmɛmit ɔbit. 2 Ka Farasiinam la baseba da yel yii, <<Nan n ta'ah ka ya it se'el n pu nar vo'ohug dabihir la?>>

3 Yezu da lebih ba yii, <<Ya pu kããl se'el ka Devit da iŋ, u ni u nirib la kom n da dumit laa? 4 U da kpɛ̃ Na'ayen yir la ti zaŋ boruboru se'eb n kih la di, se'eb ka la pu nar yi so di bu, la n ka malemadem la ma'a, ka zaŋ baseba te u nirib?>> 5 Ka U yel ba yii, <<Asaal Dawɔɔ la n a vo'ohug dabihir la Daan?>>

6 Vo'ohug daar dikɔ̃ ka Yezu da kpɛ̃ Na'ayen dobil la niŋa ti pa'an, ka buraa kakɔ̃ da be ni ka u nu'ug kpi. 7 Ka gban-mi'irib ni Farasiinam la behit Yezu yi ba nyɛ nyaa U nan teb nirib vo'ohug dabihir laa, la n nan iŋ se'em ka ba tɔ'ɔn zɛrig U. 8 U da poɣum mi ban tẽ'ẽhit se'em mi, ka yel bura-nukpiuŋ la yii, <<Kem na zɛ'ɛl nir woo tɔɔn kpela?>> Ka u da dɔɔ zɛ'ɛl.

9 Ka Yezu yel ba yi, <<Mam bɔ'ɔh ya mi, la nar yi i iŋ som bee be'em vo'ohug daar la, i fãã vom bee i ko'?>>

10 U da beh kaa ba waabi, ka yel u yii, <<Tɛ̃ɛ̃gum i nu'ug la?>> Ka u iŋ yela nɔɔ, ka u nu'ug la leb tar paŋ. 11 Amaa ba sũũr da dɔɔ mi ni U, ka ba da sɔ̃hit ni taaba ba n nan iŋ Yezu se'em.

12 Dabih aŋ la, Yezu da do zɔɔr la zugu ha yi U po'oh; U da Zaŋa wo'oŋ la zã'ã po'oh Na'ayen. 13 Beog n da kãã la, U da bɔɔl U nya'andolib la ka da lɔɔh nir piiga ni bayi, seba ka U da sɛɣɛ yi apɔstaliinam: 14 Simɔn, so ka U da sɛɣɛ u wo'or Pita la, ni u sɔ̃ɔ̃g Andiru, ni Gemis, ni Geon, ni Filip, ni Batolomio, 15 ni Matieu, ni Tɔmas, ni Gemis so n a Alfayɔs dawɔɔ la, ni Simɔn, so ka u wo'or da bɔɔn Zilɔt la, 16 ni Geudas so n da a Gemis dawɔɔ, ni Geudas Isekarɔs, so n da lebig nivodɔ̃tik la.

17 Yezu da sigi na zɛ'ɛl zĩse'e n dɔ salililii, ni U nya'adolib babug ni nirikooŋ seba n zɛ'ɛl Geudiya, Geruzalɛm, ni mɔɣir doon teh, Taya ni Sidon na la. 18 Ba da tana yi ba womih U pa'alug ka nyɛ ba tebug; ka seba woo ka kolekpãbɛ'ɛh da daamit la da nyɛ ba tebug mi. 19 Nirikooŋ la zã'ã da bɔɔt yi ba si'ih U mi, se'el n so la, paŋ n da ni zɛ'ɛl U sa'ani yina teb so woo n si'ih U.

20 Ka U da gɔrig beh U nya'adolib la ka yel yii:

<<Kamaalug a la yam seba n a nɔndem,

ka Na'ayen so'olum la a la ya den.

21 Kamaalug a la yam seba kom n dumit nan-nan na,

ya poya nam pɛ'ɛl.

Kamaalug a la ya seba n kumit nan-nan na,

yam nan ti la',

22 <<Kamaalug a la yam seba ka nirib yaa, ka zaɣah ya, ka to'ot ya, ka sãɣamit ya wo'ora Asaal Dawɔɔ la zugu.

23 Nyɛɛm mi dabih den daar, ka yelemɛŋir la n a ya ŋwɔ̃ɔ̃t la kãrig mi tensoŋi; ba yaanam n da iŋ Na'ayen nɔdɛ'ɛhirib la se'em n la.

24 <<Amaa sabaab be ni yam seba n a bontatib la,

yam poɣun nyɛ ya von som.

25 Sabaab be ni seba woo poya n pɛ'ɛl nan-nan na,

kom nan a ya den.

Sabaab be ni seba woo n la'at nan-nan na,

yam nan nyɛ sũsãuŋ ni nkuma.

26 <<Sabaab be ni ya seba woo ka ba pɛ̃ɣɛt la,

ya yaanam la da iŋa yela nɔɔ tet nɔdɛ'ɛh namaɣanam la.

27 <<N yet ya mi yi ya womih, Nɔŋ mi ya dindem, iŋ mi som tet seba woo n dim ni ya, 28 kã mi maal seba woo n po nɔɔr te ya, ka po'ohit tet seba woo n iŋ ya be'em. 29 So n lob i tampɛ̃k, ŋmɛrigin tampɛ̃k kãã la te u; ka so n zaŋ i fuug, zaŋim i soot pa'ah u. 30 Tem so woo n soh i; ka so n zaŋ i laɣat, da bɔ'ɔh ti yel ya'a ha. 31 Iŋim ya taab a aa ya n bɔɔt yi ba iŋ ya se'em la.

32 <<Nyɛ n nɔŋ seba n nɔŋ i ma'a, nambon ŋwɔ̃ɔ̃t ka i yi i nyɛ? Se'el n so la, hali yelebe'et dem nɔŋ seba n nɔŋ ba mi. 33 Ka nyɛ n tomit som tet seba n tomit som tet i, nan ŋwɔ̃ɔ̃t ka i yi i nyɛ? Se'el n so la be'em dem mi it la yela. 34 Ka nyɛ peŋit so ka i tar putẽ'ẽr yi u nan ti lebih te i, nan ŋwɔ̃ɔ̃t ka i yi i nyɛ? Hali yelebe'et dem pehit ba taab mi, yi ba leb nyɛ ŋwɔ̃ɔ̃t berigu. 35 Amaa nɔŋim seba n dim ni i, tomum som te ba, ka pehit, ka da tẽ'ẽhit yi i lebih nyɛ se'el ba sa'anii. I nan nyɛ ŋwɔ̃ɔ̃t berigu, ka mi nan a Na'ayen bii; se'el n so la, Na'ayen it som tet seba nini n pu tɛɣɛt ni U ni putodem. 36 Tar suguru, a aa i Ba' la N tar suguru se'em la.

37 <<Da gãke, ka nyɛ mi kun nyɛ gãkire; da zɛrig so'o, ka nyɛ mi kun nyɛ zɛrigire. Zaŋim i tadaan toom-be'et daah u, ka nyɛ mi nan nyɛ i toom-be'et taal daahug; 38 te ma, ka nyɛ mi nan nyɛ teeb. I nan nyɛ teeb somma, tem yar yar ka pu tot ta, ka la nan leb sigi pɛ'ɛl i nu'uh ka yaamit; nyɛ n iŋ i taab se'em la, yela nɔɔ ka i nan nyɛ?>>

39 Yezu da le mak maɣahir te ba: <<zɔ'ɔm nan yaŋ ve'et zɔ'ɔmm? Ba zã'ã kun lu bok poŋii? 40 So n a nya'andol, kun tɔ'ɔn gaat pa'al la, amaa so daana n zamih somma, nan a aa pa'al la. 41 La iŋa yela ka i nyɛ sauk i kpɛ'ɛ niuh niŋa, ka pu nyɛt dɔɔg la i mɛŋ niuh la ni? 42 Bee la nan iŋa yela ka i yel i kpɛ'ɛ yii, <N zɔɔ, bahum ka n yih sauk i niuha ni,' ka pu nyɛt dɔɔg la n be i mɛŋ niuh ni la? Namaɣan-daana, yihum dɔɔg la i mɛŋ niuh la ni yiiga, lan nan iŋ se'em ka i tɔ'ɔn nyɛt somma ka yih i tadaan niuh sauk la bah.

43 <<Tisoŋ pu won wolebe'ere, bee tibe'eog wol wolesomaa; 44 se'el n so la, i nan baŋ tii woo yit la ka wola ni. I kun tɔ'ɔn laɣah mu'ut gɔ̃'ɔ̃h niŋa, bee i pĩ'ĩh ta'ama dɔ̃ɔ̃h niŋa. 45 Nivosoŋ tomit u toonsoma mi ka la zɛ'ɛn u sũũr yit na, ka nivobe'eog mi tomit u tooma ka la zɛ'ɛn na u sũũrin yit na; se'el n so la se'el woo m be nirisaal sũũrin la, yela nɔɔ ka u daana tɔɣɔt.

46 La iŋa yela ka ya bɔɔn Mam yi <Daana, Daana,' ka pu it se'el ka N yet ya la? 47 Mam nan pa'al ya seba n ken N sa'ani na ka womit N yetɔɣum la, ka dol bu ba vom ni. 48 Nivokãã la daan ŋmani ni so m mɛɛt u yir, ka tũ di ɛ̃ɛ̃bir la sigi yaɣɛl taŋ zugu; sakãt n ni ka mɔɣir pɛ'ɛl doo, ka kɔ'ɔm tana ŋmɛ yir la, se'el se'el kun iŋ dii, se'el n so la ba mɛ di la somma. 49 Amaa so daana n wom tɔɣuma, ka pu tar bu tomira, la ŋmani ni so n mɛ u yir ka ɛ̃ɛ̃bir pu be niŋaa. Mɔɣir n kɔ ka kɔ'ɔm ŋmɛ di, nila nila nɔɔ di nan lu, lu gberaam?>>