1 Yezu n da be Na'ayen po'ohug dobil la ni la, U da gɔrig nyɛ ka bondaanam tar ba teeb it teeb peog la ni; 2 ka mi nyɛ ka pɔkɔ̃ɔ̃r n a nɔndaan zaŋ laɣakɔ̃ba n pɔ'ɔ a aa wontiyi la iŋ peog la ni. 3 Ka Yezu yel yii, <<Sera ka Mam yet ya wa, pɔkɔ̃-nɔndaana teh gaat ba zã'ã. 4 Se'el n so la, bãã la wa lɔɔ la se'el ba mɔrum la poŋi te, ka ɔŋ ni u nɔŋ la zã'ã la, zaŋa se'el ka u naan dii n la zã'ã te?>>

5 Nir seba n da tɔɣɔt Yen po'ohug dobil la yela, pa'an ba n gol ku somma se'em ni kuga ni teson se'eb taab ka ba tar tet Na'ayen ku poŋi la, U da yel yii, 6 <<Laɣara woo ka ya nyɛta, dabihir kenna, ka kugir ni dikɔ̃ mi kun le paɣa di taraan zugo; ba zã'ã nan ti gbirig lu teŋ?>>

7 Ka ba bɔ'ɔh Yezu yii, <<Pa'ala, sankani ka la nan iŋe, ka lani n nan ti a dããluŋ pa'al yi la yi la iŋ mi?>>

8 Ka U yel yii, <<Baŋ mi ka da ke ka so pã'ãh yaa; Ka nirib berigu nan tana Mam wo'or zugu yet ya yii, <Maan a Krista la!> ka, <Saŋa la pɔ̃r mi!> Da dolin baa.

9 <<Ya n ti womit zaba ni gbirigir yela, yan da zot dabɛɛm, ka yel ãã la wa a la se'a n nan ti iŋ yiiga, ka ba'ahug kun dol nila nilaa?>>

10 Ka U pana da yel ba yii, <<Teŋ nan dɔɔ zabir ni teŋ, ka so'olum mi dɔɔ zabir ni so'olum; 11 teŋ miiun-kãra nan ti be, ka kompɛɛlig ni bã'ãh mi nan ti be zĩ'ĩ woo; yan-ɛ̃k yela ni yel nyalinkãra dããluŋ nan ti be saazugu ha.

12 <<Ka laa la wa zã'ã n ti nyaŋ iŋ la nya'aŋ, ba nan gbã ya namih, ka zaŋ ya te ba zamehug yɛ' ni paɣarib dotin. Ba nan tar ya ti zɛ'ɛl nanam ni tenso'orib tɔɔn Mam wo'or zugu. 13 Laa la wa n nan a ya sɛhira dii pa'alug. 14 Yela, ya da fabin ni yan nan yel se'el gu ya mɛŋa; 15 Mam nan te ya yam, ka ya baŋ yan nan tɔɣɔ se'em, ka ya dindem la kun tɔ'ɔn zɛ'ɛl ni ya bee tɔɣɔ nyaŋ ya ka yel yi ya tuu mii. 16 Ya dɔɣɔrib ni ya sɔ̃ɔ̃t, ya yir-dem ni zɔnam nan kɔɔh ya teh; ka ba nan ko' ya seba. 17 Nirib zã'ã nan dim ni ya Mam wo'or zugu. 18 Da bahin ka ya yam ŋma'ara, ka ya zugu zɔbug ni kukɔ̃ mi kun borige. 19 Ya ninŋmibir la zugu ka ya siih nan nyɛ fããgir.

20 <<Yan ti nyɛ ka zab-zabirib gilig kaa Geruzalɛm, yan baŋim yi teŋ la sã'auŋ pɔ̃r mi. 21 Yela, seba m be Geudiya la zom do zɔya la ha, ka seba m be tenkãra la poŋi la bahum si ka yi, ka seba mi m be tenkpeh la da kpɛ̃ tenkãra la nii; 22 ŋwala a la toom-be'et dem namehug saŋa, ke ka se'el n da poɣun golih Na'ayen gbauŋ la ni la a mɛɣɛla. 23 La nan tɔ te pɔɣɔpooh ni bilɛɛh manam dabih aŋ ni! Namih-kãt nan be teŋa zugu ka sã'auŋ nan paa niriba. 24 Ba nan zaŋ zaba so'oh ko' ba, ka gbã seba teh tehin a aa da'aba la; ka nir seba m pu dol Na'ayen la, nan nɔ Geruzalɛm taal teŋ, gur ka ba saŋa ti ba'ah.

25 <<Dããluŋ nan ti be wuntɛɛŋ la ni, ŋwarik la ni ŋmaribibih la ni, ka dããluŋ la nan ti a la sũsa'auŋ be tehin ka teok kɔ'ɔm damig ni bu kɔmiih la ke ka nirib yam borig. 26 Dabɛɛm nan ke ka nirib ligi ni se'el n it teŋa la, panse'eh m be saazugu ha la nan dam. 27 Niŋa ka ba pana nan nyɛ' Asaal Dawɔɔ la m be sangbauŋ ni sigit na,' ni paŋ ni pɛ̃ɣɛb berigu. 28 Yel ãã la wa n ti pĩ'ĩl it, dɔɔ mi zɛ'ɛn gɔr saazugu, ka ya fããgir vurihit du'ut na.>>

29 Ka Yezu mak maɣahir yii, <<Behimi nkaŋa ni tii ha zã'ã; 30 ban ti pĩ'ĩl puhit vamɛla, ya mɛŋ ni nyɛ baŋ yi sɛ̃ug a yamma. 31 Yela mɛŋ, yan ti nyɛ ka yel ãã la wa it, yam baŋim yi Na'ayen so'olum la a yam ma.

32 Yelemɛŋir ka N yet ya wa, ti zomaan-kãã la wa niriba kum ba'ahe, yel ãã la wa n pu iŋe. 33 Saazugu ni teŋ nan gaat, ka Mam yelehum ma ka gaarugo.

34 Baŋ mi, ka da zaŋi ya saŋa zã'ã tẽ'ẽhit yan nan iŋ se'em dit bee ŋwũũt bee tẽ'ẽhit ya vom putẽraa, ka dabih den ti di'igit ya mi, 35 a aa bɛ̃rug la. La nan sigi nir woo m be tempabira zugu na. 36 Maahum mi ya mɛŋ saŋa woo, po'ohit yi ya nan tar paŋ nyaŋ pɛ̃ɛ̃ yel ãã la wa woo n yi a iŋ la, ka nyaŋ zɛ̃'ɛ̃l Asaal Dawɔɔ la tɔɔn ka U poor pɛɛ?>>

37 Daar woo U da ni be la Na'ayen po'ohug doog la ni pa'an, ka wo'oŋ, U da ni do la Olifs Zɔɔr la zugu ha. 38 Beogin wo'oŋ wo'oŋ, nirib la zã'ã da ni dɔɔ keŋa Na'ayen po'ohug doog la ni ti womihit Yezu tɔɣum.