1 Yezu Krista n a Na’ayen Dawɔɔ la Yelesoma la pi’ilug.

2 Maɣah wuu Azaaya Na’ayen nɔdɛ’ɛhit la n golih se’em la, wolemaa,

<<Mam tomit la N ntomit yi u gaat I tɔɔn,

ti maal sɔr la te I;

3 so nkɔr n kaahit sɛ̃ɣir la ni baɣa baɣa yet yii,>>

<Maahum Daan la sɔr la, ka tẽẽ U sɔya la ntɔɔ.> >>

4 Geon Baptis nɛɛ u mɛŋ sɛ̃ɣir la niŋa, ka tɔɔn vom tɛɛgir ni suguru dii yela. 5 Geudiya nirib zã’ã ni ba kɔrunkɔrum teh la zã’ã laɣum ni Geruzalɛm nirib da yitin ken u sa’ani ka u tet ba soob Geɔdan mɔɣir la ni, ka nirib da ki’ihit ba yelebe’et. 6 Geon ningbiŋ lauk da aa woɣun kɔ̃bit ka u sɛgbaŋ a gbauŋ, u diit da a la nta’aba ni mɔɔgin sĩĩt. 7 U da tɔɔn yet yii, <<So n be mam nya’aŋ kenna la tar kpe’eoŋ gaat mam, ka mam poɣum pu sɛk yi n dɔ̃bel U tɔɔn lorig U taɣara miihe.>> 8 Mam tet ya la Na’ayen soob ni kɔ’ɔm; ka Ɔŋ nan so ya ni Vo’ohun Som Sii la.>>

9 Dabih aŋ ni la, Yezu da zɛ’ɛl la Nazarɛt n be Galilii teŋ la tana, ka Geon da te U Na’ayen soob Geɔdan mɔɣir la ni. 10 Ka Un da dɔɔ kɔ’ɔm la ni doot na la, U da nyɛ ka sangbana wo’o ka Vo’ohun Som Sii la sigit na a aa nangban la, yaɣel U zugu. 11 Ka nkɔr da yi saazugum na yet yii, <<Nyɛ n a Mam Dawɔnɔŋirig, I zugu ka Mam nyɛt popeelum.>>

12 Vo’ohun Som Sii la da tar Yezu kalam yi keŋ sɛ̃k la ni ha. 13 U da be la sɛ̃k mɛŋ ni dabiha pihinaahi, ka sitaana maɣahit U, ka U da be ni yeog dumih, ka Na’ayen maleka-nam la gur U.

14 Ba n da gba’a Geon ba’ah la, Yezu da tã Galilii na tɔɔn Na’ayen Yelesoma la, 15 Ka yet yii, <<saŋa la paa ya, Na’ayen tensoŋ la vurih du mi na, ki’i mi ya yelebe’et ka sak sera te Na’ayen Yelesoma la.>>

16 Yezu n da dol mɔɣir la bɔba gat la, U da nyɛ Simɔn ni u sɔ̃ɔ̃g Andiru ka ba lobit woɣih mɔɣir la ni, ban a zingba’arib la zugu. 17 Ka Yezu yel ba yii, <<Dolin Mam na ka N nan bah ka ya kã’ãhit nirib.>> 18 Kalam ma, ba da zaŋ ba woɣih la bah ka dol U. 19 Un da keŋ gaat tɔɔn bɛ’ɛla la, U da nyɛ Gemis n a Zebedii dawɔɔ la ni u sɔ̃ɔ̃g Geon, ka ba be ba ããruŋ niŋa ligit ba woɣih. 20 U da bɔɔl bam mi kalam; ka ba da bah ba ba’ Zebedii ããruŋ la ni, ni u ntomerib la, ka dolih Yezu keŋ.

21 Ba da keŋ la Kapanaum teŋin ka Yezu da pa’an ba yendobil la ni, la mi da a la voohug daar. 22 Ŋwala da iŋ niriseba n da womihit la la pakir, den zugu, U pa’alug la da tar kpe’eoŋ ka pu ŋman ni wara pa’an pa’alib seba ka ba ni womihit la. 23 Bura se’e n da tar sibɛ’ɛ ka be yendobil la ni womihit Yezu pa’alug la, 24 da kaah suppi yet yii, <<I bɔɔra nan ti sa’ani, Yezu Nazarɛt teŋ nira? I tana yi I sa’am ti mi? Mam mi nyɛ n a so, I a la Kassi Daan yi Na’ayen sa’ani na.>> 25 Ka Yezu da tãh sũi yii, <<ŋmɛkum i nɔɔra bããlam ka yi buraaga ni na.>> 26 Ka sibɛ’ɛga da zugum buraaga ni paŋ ka kaah suppi ka yi ŋwala vugubi. 27 Nirikooŋ la zã’ã da iŋ la lɛɣibi ni yel la, ka zɛ’ bora bɔ’ɔhit taaba yet yii, <<Lan n ŋwala? Pa’al sããuŋ n tar kpe’eoŋ! Hali sibɛ’ɛh nan ni ka dol U nɔɔr.>> 28 Yezu wo’or da yi mi tii Galilii ni ka kɔrunkɔrum zã’ã.

29 Ban kɔ’ɔn da bah po’ohug dobil la, bam ni Gemis ni Geon da keŋ ti kpɛ̃ la Simɔn ni Andiru nam yir. 30 Saŋ kãã la wa, Simɔn dɛɛmpɔk da dɔ la doog ni gbi’it ni ɔɔt, ka ba da yel Yezu ka U pu go’om. 31 U da tana gĩ bompɔka nu’ug darig u dɔɔ. Ka u ɔɔt la bah u ka u da dɛ’ɛ ba saan. 32 Zaanɔden la, ba da tar seba woo n bẽ’ẽt bee kolekpãbɛ’ɛh n dol ba la, tã U sa’ani na. 33 Ka teŋ la nirib zã’ã da laɣah zanɔrin la. 34 Ka Yezu da teb seba woo n bẽ’ẽt ni bã’ãh buuri buuri la ka ba nyɛ ba nima’ahum; Ka kar kolekpãbɛ’ɛh yih badem sa’ani ka U mi da pu sak yi kolekpãbɛ’ɛh la tɔɣɔ, bam n mi U la zugu.

35 Beogin wo’oŋ wo’oŋ ka sɔ̃ɔ̃rum nan pu nyeege, ka Yezu da yi keŋ zĩ se’e n a suramm ti po’ohit. 36 Ka Simɔn ni u taab mi yina ɛɛt U. 37 Ban da nyɛ U la ba da yel U mi yii, <<nir woo ɛɛt I mi!>> 38 Ka Yezu da lebih yel ba yii, <<Bah mi ka ti keŋ tenkpɛ’ɛh la, ti tɔɣɔ Na’ayen yela la pa’al bam mi; ka den zugu ka Mam tana wa.>> 39 U da dolih Galilii so’olum zã’ã tɔɔn Yelesoma la Geudem yempo’og dobibih ni, ka mi kat kolekpãbɛ’ɛh bahit.

40 Nin-sa’auŋ daan n da tã Yezu sa’ani na kpã duna belimit U yii, <<Nyɛ m behih ka la a somma, nyɛn tebum.>> 41 Yel la da vɛ̃k Yezu sũũr mi, ni nimbɔ̃’ɔ̃g ka U tɛ̃ɛ̃ nu’ug kalim nira ka yel yii, <<Mam bɔɔt yi N teb i ka i a fassi.>> 42 Nin-sa’auŋ daana da nyɛ u tebuk nila nila ka u ningbiŋ leb saalim. 43 Yezu da kpa’am u ka yel u yi u kema. 44 U da yel u yii, <<Behima, da yel so se’el se’ela, ka kem ti zaŋ i mɛŋ pa’al Na’ayen kããbug kpɛm la, ka tar laɣase’et ka Moozis da pa’al yi ŋwala n nan a i sera dii, tet nirikooŋ zã’ã ka ba nan baŋ yi i nyɛ tebuk.>> 45 Ka nira n da ti yi ba’ah la, u da kɔ’ɔm tɔɔn ni zĩ’ĩ woo, bah ka Yezu da pu le nyaŋ nɛɛgit U mɛŋ yit kpɛ̃’ɛ̃t teh la nii, nirib da zɛ’ɛl zĩ’ĩ woo ken U sa’ani mi na.