1 Yezu da pĩ’ĩl pa’an Na’ayen yela ya’ah mɔɣir la nɔɔrin. Ka nirikooŋ da be ni, yela zugu la U da zĩ la ããruŋ ni kɔ’ɔm la niha, ka nirib la zɛ’ doon womihit. 2 U da zaŋ la maɣaha ma’a pa’an ba Na’ayen yela wa, U da yel ba yii, 3 <<Womih mi! Kpaat n da yi’ yi u ti bor. 4 Ka bomboora* la baseba lu sarɔɔg zugu, ka niih gɔ ba. 5 Baseba mi da lu la tah zugu zĩ’ĩ ka ntan pu zɔ’ɔge, bomboor ãã da bul kalam, ka ba nyaɣa da pu nyaŋ sige ntan n pu zɔ’ɔ la zugu. 6 Ka wuntɛɛŋ da ŋmɛ ba ka ba kpi ba nyaɣa la n pu sigi la zugu. 7 Bomboora baseba mi da lu zĩse’e ka gɔ’ɔh be, ka gɔ’ɔh la da nyaɣɛ ba ka ba kɔŋ okir, ŋwala da bah ka ba pu nyaŋ wole. 8 Baseba da lu tansom ni, da kpik somma, ka wol pihitã-tã, pihi yoob-yoob seba wol kɔbig kɔbig.>> 9 Ka U da yel yii, <<Bah mi, ka seba n nan womih wom!>>

10 Un da be U ma’a la, niriseba n da be ni U la ni U nya’andolib pii ni bayi la, da bɔ’ɔh U maɣaha la gbin. 11 Ka U da lebih ba yii, <<Yam seba dɛ’ɛ Na’ayen yela la, ka seba n be yeŋ la bam den dola maɣaha; 12 se’el n so la

<bam nan behit, amaa ba kun nyɛɛ,

ba nan womihit ka ba kum bɔke;

ka yela n bah ka ba kun ŋmɛrig leb Na’ayen sa’ani ka nyɛ ba suguru diiga.> >>

13 Yezu yel ba yii: <<Yam pu bɔk maɣahiraa? La nan iŋa yela ka ya bɔk maɣaha wa zã’ãga? 14 Kpaat la da bot la Na’ayen yela. 15 Niriseba ŋman ni bomboora seba n lu sɔr zugu la, ba nan wom Na’ayen yelehum la, nila nila ka sitaana tana dɛ’ɛ yelehum la ka ke ba. 16 Bomboor seba n lu tah zugu ka pu nyaŋ sigi nyaɣa la, bam n a niriseba n nan dɛ’ɛ Na’ayen yelehum la ni popeelum kalam. 17 Ka bam n ka nyaɣa la zugu, ba nan nyaŋ be la saŋa bɛ’ɛla wa, ka dauŋ bee yeletoot n ti paa ba yelesomir la zugu, ba ni lu mi kalam ma. 18 Ka seba mi a aa bomboor seba ka ba bor gɔ’ɔh ni la; bãã a la seba n wom Yen yelehum la, 19 ka teŋa yeletoot zugu, ni mɔrum pã’ãhug, ni laɣat putẽ’ẽr ni tana pɛ̃’ɛ̃rig bah ka yelesoma la pu tar taɣalim tet baa. 20 Ka niriseba mi n a aa bomboor seba n lu tansom ni la: bam wom yelesomir la dɛ’ɛ di won wola: seba pihitã tã, seba pihiyoob yoob, seba mi kɔbig kɔbig.>>

21 Yezu da bɔ’ɔh ba yii, <<Ba ni tar kania kpɛ̃ na zaŋa pe’eog vugul, bee zɛ’ɛn garug leuŋ ni, ka la ka ba zaŋ sugin na kok zugo? 22 Se’el pu sɔɣɔ, ka kun nɛɛ peelum mii, bee la lil ka kun nɛɛ peelumi daase’ere, 23 So n tar toba nan wom, un womih ma!>> 24 Ka U yel ba yii, <<Iŋ mi ki’i ni yan womit se’el, Nyɛ n makit se’em tet la, yela nɔɔ ka ba mi nan mak te i, ka berigu nan malegun pa’ah te i. 25 Lan a la seba n tar la, bam nan malegun dɛ’ɛ berigu pa’ah, ka seba n ka se’el la, hali ba nan dɛ’ɛ bɛ’ɛla wa la, ka ba tar la, ka bah ba.>>

26 Yezu da le yel yii, <<Na’ayen Na’am Yir la, a mi aa so n zaŋ nkansɔ̃ɔ̃g biili lob teŋ sãii, 27 u nan gbihit ka vo’ohit wuntɛɛŋ ni wo’oŋ, ka biili la nan bul ka zɔ’ɔgit, ka u pu mi lan a se’em. 28 Tengbauŋ la maan na ku mɛŋ, yiiga a la vãug la, taɣel nkãr, taɣel puut, ka wola pana ba’ah zã’ã daan. 29 Ka wola la n pana ti bi’i u yit ti ni u so’o, den zugo, bunik saŋa paa ya.>>

30 U da le yel yii, <<Ti nan zaŋa lan maɣah ni Na’ayen Na’am Yir la, bee maɣah-den ka ti nan zaŋ make? 31 La a mi aa nkansɔ̃ɔ̃g biiluh, ka un lu teŋ u pɔ’ɔ mi gaat biili zã’ã n dɔ teŋa. 32 Ka un bul yi na u nan iŋ tikãt gaat tiih berigu ni yilekãra ka saazugu niih woɣɛt ba teɣet u ma’ahum la ni.>>

33 U da doliha maɣaha ni bah ka Na’ayen Yelesomir la paa ba, ka ba da nyaŋ wom. 34 U da pu mak tɔɣɔ te ba ka maɣaha ka niŋa, ka U da ni pirik tɔɣum la gbin pa’al U nya’andolib la mi.

35 Dabih den la, zaanɔɔr n da ma’agit la, Yezu da yel U nya’andolib la yii, <<Bah mi ka ti yak yaɣadee ha.>> 36 Ba da bah nirikooŋ la niŋa ka zaŋ U ni ba ããruŋ la, se’eog ka U da poŋin gur la. Ããrina ba seba mi da be niŋa. 37 Sambekãt da pĩ’ĩl lobit mɔɣir la ni, ka kɔmi’ih da kpɛ̃’ɛ̃t ããruŋ la ni ka ku da bɔɔt yi ku sim. 38 Yezu da dɔ la ããruŋ la mi nya’aŋ gbihit, ka ba da nɛɛ U ka yel U yii, <<Pa’alaa, tin yɛ yi ti kpi wa pu pak nyɛɛ?>> 39 U da vaa dɔɔ tãh sambeok la ka yel mɔɣir la yii, <<Sambeogaa! A bããlam!>> Ka sambeok la da gɔ’ɔ, ka zĩ’ĩ woo da ma’a boririri. 40 U da yel ba yii, <<Lan n so ka dabɛɛm tar ya? Ya pu tar sera sakiree?>> 41 Ka ba zã’ã da ya’ nɔya won taaba ka yet yii, <<Ɔ̃ɔ̃ wa a la ɔni, hali ka sambekãt la ni mɔɣir la nan U nɔɔre?>>