1 Geudem vo’ohug daar la n da gaat ka beog yelik la, Mɛɛri Magedalin ni Mɛɛri so n da a Gemis ni Salomi nam ma’ la, da zaŋa kpaam n tar wũsoŋ yi ba keŋ ti sɔ̃ɔ̃h Yezu ningbiŋ la. 2 La da a lahir daar beogin wo’oŋ wo’oŋ ka ba da keŋ wɔɔg la ni. 3 Ban da yɛ la, ba da bɔ’ɔhit taaba yii, <<ɔn n nan ti bilik sɛtaŋ la te ti?>> 4 Ban da zɛ̃k zut la, ba nyɛ ka sɛtaŋ la, n kãrig ka tebig yela la, poɣun deŋ bilik mi dɔ ha. 5 Ka ban sigi wɔɔg la poŋi la, ba nyɛ ka buribepaalig zĩ dituŋ nu’ug bɔba, yɛ fupɛɛlik, ka la iŋ ba pakir. 6 Ka u da yel ba yii, <<Da bahin ka la a pakir tet ya; ka mam mi yi ya ɛɛra Yezu n yi Nazarɛt na la, so ka ba daa kpa mpuuredɔɔg zugu la. U pu be kpelaa, U vo’o dɔɔ mi. Behimi zĩse’e ka ba daa laa U la n la ha. 7 Ka kemi, ti yel U nya’andolib la ni Pita yii, U deŋ ya tɔɔn yɛ Galilii ha, niŋa ya nan ti nyɛ U a aa Un daa yet ya se’em la.>> 8 Ka ba do wɔɔg la ni zot ka gbi’it, ka pu yel so so se’el se’el la, dabɛɛm n da sãã ba la zugu.

[Ba da yel seba n da gilig Pita la se’el woo ka ba nar yi ba yel la ŋwala gi’i. Ka ŋwala wa n da ba’ah la, Yezu mɛŋ da tom ba yi ba ke ka Na’ayen yelesomir la n a wolam ka ka ba’ahug la paa tengbauŋa gɔbig ni ku dituŋ zã’ã ka nirib nyɛ fããgir.]

9 [Un da vo’o dɔɔ lahir daar beogin beogin la, U da nɛɛ U mɛŋ yiiga te la Mɛɛri Magedalin, so ka U da kar kolekpãbɛ’ɛh siyopoi yih u ningbina ni bah la. 10 Ka Mɛɛri wa da yi keŋ yel seba n da ni be ni Yezu la, ka da pana fabin ka kumit. 11 Ka ba n da wom yi U vo’o mi ka ɔŋ nyɛ U la, ba da pu sak seraa.

12 Ŋwala wa n da iŋ gaat la, Yezu da tɛɛ U nindaa ka nɛɛ U mɛŋ te ba bayi n da be sɔr zugu ken yɛ yit tembil kakɔ̃ ni ha la. 13 Ka bam mi n da leb la, ba da yel ba taab la, ka ba da pu sak sera te baa.

14 Nya’aŋ ka U nya’andolib pii ni nkɔ̃ la, da laɣun taaba zĩ dit ka Yezu da nɛɛ U mɛŋ te ba. U da ŋwɔm ba mi, bam pu tar sera sakir ka mi le tar tob kpa’aug la, den zugu, bam n da pu sak sera te seba n da nyɛ Ɔŋ n vo’o U mɛŋ dɔɔ la. 15 Ka U yel ba yii, <<Kemi kpɛ̃ tengbauŋa ni ka loɣa zã’ã, ti tɔɔlum Na’ayen yela te nir woo. 16 So n sak sera ka dɛ’ɛ soob nan nyɛ fããgir, ka so n pu sak sera nan nyɛ namihug Na’ayen sa’ani. 17 Yelenyalin ãã wa nan dol seba n sak sera ka tar Mam wo’or tomit la, ba nan kat kolekpãbɛ’ɛh nirib sa’ani bahit; ba nan tɔɣɔt tɔɣum buuri buuri; 18 ba n gbã bombɛ’ɛh ni ba nu’uh se’el kun iŋ baa, ban ŋwũ yabik se’el se’el kun iŋ baa, ban zaŋ ba nu’uh paɣɛl ba’anam zut ka po’oh te ba, ba nan nyɛ nima’ahum.>>

19 Yezu, Daan la n da tɔɣɔ te ba ba’ah la, U da do la tensoŋi ha ti zi’in Na’ayen dituŋ nu’ug. 20 Ka U nya’andolib la da yi tɔɔn Na’ayen yela la zĩ’ĩ woo ka ba keŋ, ka Daan la da serin tomit ni ba ka yelenyalima dol ba a aa Ɔŋ n da yel ba se’em la nɔɔ.]